我想喺夜場搵真愛，你陪唔陪我癲？: 四十三.

我衝上地鐵站，架車都好配合地即刻到咗。

我衝上車，好快就嚟到石門。

我行埋一邊，然後拎部電話出嚟。

「你到邊？」我喺Whatsapp問佢。

過咗陣，佢就覆咗我。





「未放飯啊。」佢再補一句：「你到咗？」

「未呀。」

時間過得好快，就嚟十二點，佢都仲未…

「叮！」

佢Send咗個Whatsapp嚟。





「我放咗，而家嚟緊，你喺京瑞一期門口等我。」

好啊，最好快啲到，咁就可以…

比我見多你幾分鐘。

五分鐘後，未到。

十分鐘後，未到。





十五分鐘後，都係…未到。

差唔多到架喇，唔好咁心急啦。

再過多陣，差唔多踏半，但都係冇消息…

「愛我別走~」

電話響，係佢。

我聽咗個電話：「你到喇？」

「係呀。」佢再講：「你喺邊呀。」

我望過去門口嗰邊，見到佢企喺門口到轉嚟轉去咁搵我，好似啲蕩失路嘅細路女喺到搵媽媽咁，好得意但又好好笑，我一個唔小心就笑咗出嚟。





唔知係我笑得太大聲定佢真係搵到我，佢向住我呢邊行過嚟。

等佢行到嚟我面前，有樣好重要嘅嘢我一定要做，就係…

攬攬！

我舉高雙手準備好，但見條街咁多人，突然嚟個情人深深的擁抱好似太浮誇，就將雙手放低咗少少。

放低咗少少啫，應該都知嘅。

佢嚟到我面前，然後轉身：「行啦。」

我扁咗扁嘴，有一丁丁唔開心。





不過唔緊要啦，今日趕時間，下次補返就得喇。