我想喺夜場搵真愛，你陪唔陪我癲？: 四十五.

我用手捽咗下隻眼，然後抬高頭眨咗下眼，將啲眼淚留返喺眼框裡面。

我好似真係從來冇諗過有人會關心我，好多時都係得我關心人。

個個都話人大個咗就唔應該再咁自我中心，應該要多啲關心人，但其實去到最後，最需要關心嘅唔係邊個，而係自己。

愛都係一樣，要學識愛人，首先要愛自己。

其實好多嘢都係一樣，你以為要唔好諗自己先，但其實應該要諗自己先。





「你做咩啊？」佢有啲唔知點反應：「做咩無啦啦喊啊？」

我擰咗擰頭：「冇呀，啲麻辣湯彈咗上眼乸到啫。」

「你過嚟啊。」

我挨過去：「做咩啊？」

佢冇講嘢，淨係拎咗張紙巾出嚟輕輕咁擦我對眼，然後再用口吹咗下。





「咁樣有冇好啲啊？」佢微笑住咁問我。

我想講仲差咗…

我仲想喊過啱啱。

我吸咗啖氣，平伏返個情緒：「嗯。」

「快啲食嘢啦。」





我扤咗扤頭，然後又耷返低頭繼續食。

嗰啲眼淚湧曬出嚟，喺個眼框到𠺘下𠺘下。

點頂啊大佬？我頂到最入你都叫到殺雞咁啦，你係咁頂我個淚點，點樣唔喊啊？