我想喺夜場搵真愛，你陪唔陪我癲？: 四十七.

「你無啦啦去醫院做咩？」我問佢。

「冇啊，去睇我老逗咋嘛。」佢喺到撳電話。

哦，仲以為佢有咩事。

「咁你順便幫我問候下佢。」雖然一齊冇耐，但禮貌嚟。

「嗯。」





落車嚟到小巴站，我企埋一邊食煙，而佢就排隊等車。

車到，佢跟住條隊慢慢上車，而我就彈走枝煙睇住佢上車。

我見差唔多成車人都坐好曬，而佢就坐咗喺最後排雙人位嘅靠走廊位。

我向住佢揮手，但佢耷低頭撳緊電話，完全睇唔到我。

小巴開車，我繼續揮手，直到架小巴離開我嘅視線範圍，我先默默咁擺低手。





我慢慢行返去學校，返到課室已經係四點半，飯後嘅第一堂都差唔多完。

我一坐低，Miss就行咗埋嚟：「你搞咩咁遲先返啊？」

「冇呀，食飯啫。」我直接講咗出嚟。

「仲以為你有咩事，有咩急事要搞先遲到我可以幫你剔返今堂有到。」

的確係，但唔可以係齋講，要有證明。





「食咩飯食咁耐啊？」喺最後排嘅葉師傅大嗌。

佢一嗌完，成個班房即刻起哄。

我比出一個尷尬而不失禮貌嘅笑容去回應各方嘅提問，同埋…

掩飾我真實嘅情感。