中六個年 我鍾意左叫我起身個女仔: 好人(四)

我企返起身，比咗個尷尬而不失禮貌嘅笑容佢：「冇…冇呀，你張床軟呀嘛，咪試試佢囉。」

我Feel到佢已經WTF緊，但佢冇講出口。

「哦…咁你感受完未？」佢將電腦櫈上面嘅雜物擺曬上床，然後坐咗落去：「你出去食住煙等？」

我原本都係咁諗，但係一諗起女仔化妝要幾耐，都係不了。

「唔啦，坐喺到睇你化妝唔好咩？」我咁講。



講就好聽，事實就係我驚我隊到包煙冇曬佢都仲未化完。

「好啦，咁你坐低等下啦。」

佢係電腦枱櫃桶拎咗塊鏡同粉底之類嗰啲嘢出嚟。

無錯，我對化妝品可以話係零識，基本上淨係知咩係唇膏同粉底。

我一邊撳電話，一邊睇住佢化妝。



見到佢係咁喺到搽嘢，我只有一句嘢想講…

到底有乜撚嘢分別？

但係無論我睇唔睇得明個過程，最後個結果都係靚到令我吞曬口水。

佢個妝好淡，唔似夜場啲女化到馬騮屎忽咁，明顯睇得出嘅就只有白咗少少同埋唇色有少少改變，但係淡還淡，唔代表冇用。

佢個妝係可以帶到嗰種清純、鄰家女孩嘅感覺出嚟，雖然唔會勾起性慾，但係絕對係女神級。



唔算高嘅佢着住米色工人褲加白色長袖打底，仲要揹埋個細細粒嘅唐老鴨鈄揹袋，淨係睇佢外形真係唔會知佢讀緊中六。

佢將一間要用嚟補妝嘅嘢擺曬落裝，然後就企起身：「行啦！」

我將佢撳返落張櫈到：「傻妹，冇相機點影相？」

「係喎，差啲唔記得。」

講完，佢就喺另一格櫃桶拎咗部相機同SD卡出嚟，佢拎住部相機諗住塞埋落個唐老鴨袋到，然後…

佢成功咁證明咗女仔個袋係黑洞呢個都市傳說係假嘅，因為部相機根本塞唔到落去，就算拆埋枝鏡出嚟都一樣。

「兩樣比我啦。」我伸咗右手出嚟。

「好啦。」



佢裝返枝鏡就遞咗部相機同SD卡比我，我較好條帶之後就將部相機掛喺條頸到，張SD卡就屧咗落銀包暗格。

「去邊架？」我而家先醒起冇問過佢呢個問題。

「大美督。」

「咁我哋…出發啦！」

我轉身諗住開門，開木門都冇咩事，然後…

我唔識開佢道鐵門。

佢喺後面一直偷笑，而我就好硬頸咁一直搞把鎖。



佢忍住笑：「洗唔洗幫手啊？」

「唔洗，我識。」半秒後：「你嚟啦。」

講完，佢就伸手過嚟撳住把鎖向上推，之後道門就咁開咗。

我轉身望住佢，佢又望住我，我哋兩個半隻字都冇講，靜過太空。

無錯係，我柒咗。

我行出門口扮咩事都冇：「行啦行啦，就天黑啦。」

佢企喺屋入面比咗個禮貌而不失尷尬嘅笑容我，然後就行咗出嚟。