中六個年 我鍾意左叫我起身個女仔: 鏡頭下的你(二)

我將部相機拎咗落嚟，然後交到佢手上：「你睇下邊張唔要。」

講就咁講，事實上應該係睇下邊張要。

佢拎住部相機碌咗幾張之後就將佢遞返比我：「全部都唔Del。」

「你認真？」我掛返好部相機。

「人哋唔信你啫，我信你咪得囉。」佢摸咗摸我個頭。



「你唔會。」我好肯定咁講。

「你估我唔知？」

我嘅黑歷史，每一單都好大單，而且每一次都發生喺學校裡面，佢的確冇可能唔知。

而喺每一單嘢發生之後，我喺學校嘅朋友就會減少，呢個就係我喺學校冇朋友嘅原因。

「咁你仲信我？」我用右手整咗個加滕老師常用嘅手勢：「你唔驚我食咗你？」



「我覺得你唔會呃我，但就算你呃咗我，我都唔會好傷心，因為你唔係第一個呃我嘅人。」佢睥住我：「你冇呃我架嘛？」

「冇。」我有少少心虛。

「影相啦，講咁多。」我發動「轉移話題魔法卡」。

其實，到底佢經歷過啲咩，先講得出呢番說話？我想知，但我而家問，佢都唔會答。