中六個年 我鍾意左叫我起身個女仔: 一日女友(二)

我就咁一直望住挨喺我膊頭上面嘅佢，佢瞓教個樣成隻豬咁…真係好得意。

呢一刻我想做更多，但又驚做得太多。

無錯，我就係一個咁無膽、怕失敗又怕柒嘅人。

如果你要我揀用型嘅飄移定柒嘅減速，我會揀柒嘅減速。

你話我無大志？飄得過先係型，飄唔過就柒過減速仲要填埋海，以後連車都揸唔到。



我兩隻手成程車都好乖，唔係拎住部電話就係擺咗喺自己大髀上面。

明明只係望咗佢一陣，但唔知點解時間就好似過得好快咁，話咁快就嚟到大埔中心，我哋都準備要落車。

我拍咗拍佢膊頭，佢慢慢坐返直個人，然後挨前望住我：「到喇？」

我趕佢未醒曬，摸咗摸佢個頭：「係呀，就到啦。」

「你行唔行到啊？」我問佢。



佢揈咗揈頭：「應該OK。」

架車仲行緊，但係我哋再唔落去，一間車長可能會以為無人落然後就咁閂門開車。

啊晴起身，而我跟喺佢後面。

佢腳步輕浮咁行咗兩步，然後…架車就急停咗。

佢向住我呢邊仆過嚟，我即刻行前用雙手抱實佢，比我抱住咗嘅佢擰轉頭嚟望住我，而我哋兩個個嘴就只有10cm唔到嘅距離。



因為呢個畫面，我終於知原來啲膠劇橋段係真架。

「鍚落去？」

當我仲諗緊呢個問題嘅時候，一切都已經嚟得太遲。

架車到站停低，我放手，然後我哋就好似枝箭咁衝咗落車。