中六個年 我鍾意左叫我起身個女仔: 是誰

我返到最後一排坐低之後，突然諗起一樣嘢。

呢幾日啊晴都冇搵過我，而我都以為佢已經Block咗我，但如果…

唔係呢？

講多無謂，試一試佢最實際。

我拎部電話出嚟，喺Whatsapp打咗個問號，然後望去前面。



中間隔住好多人，完全望唔到佢，我唯有望返自己個Mon。

我深呼吸一口氣，然後撳咗落個傳送制到。

單灰色剔，然後…

雙灰色剔！

佢收到我個Message，證明佢冇Block我。



我將部電話擺去隔離，然後雙手托頭，揞住口鼻不停上下捽。

呢刻嘅我有啲興奮、有啲緊張，但同時又驚唔知點答佢覆嘅嘢。

「叮！」

我拎開兩隻手望過去，佢覆咗我。

「做咩？」



我應該點講呢？直接問？直接兜個圈引佢講？

「想講咩就快啦。」

咁就直接啲啦。

「你係咪有嘢想講？」

「冇，但睇嚟你有嘢想講。」

我諗咗一諗，其實都唔係冇。

「我都叫做有嘢想講，但唔知你想唔想聽啫。」

「請講，願聞其詳。」



我決定將所有疑問，一次過講曬出嚟。

「我想問點解前台會同你講好耐冇見？點解嗰日你要扮醉？」

「你問呢啲嘢有咩目的？」

其實，就算佢答咗我又點？

「我想知。」

但我就係想知，因為我覺得佢有嘢想講。

「咁不如你講下點解會同啊澄去飲酒，你講完我咪講。」



「我冇約佢，係佢水我去。」

「乜佢揸枝槍逼你去咩？」

「都係…」

駁唔到。

「Testing Testing。」

身後嘅喇叭傳嚟體育老師把聲，應該係有宣佈。

「聽宣佈啦，你答到我再講。」啊晴覆我。

「嗯。」



我睇咗睇時間，已經差唔多放學，個宣佈應該關三千米事。

「甲組三千米賽事開始召集，參賽者請到看台正對面嘅帳篷報到。」

果然。

我綁實條鞋帶，然後就行咗落去。