中六個年 我鍾意左叫我起身個女仔: 是誰(四)

五十米，十米。

都係差少少啊！

我腦中閃過我以前睇過嘅memes圖，係一個田徑選手飛撲出去衝線，然後因為隻手快過前面嗰個掂到終點線而當咗係前面嗰個嘅名次。

雖然聽落好唔合理，但係人一世物一世，咩都試下啦！

我喺準備衝線嘅時候，一嘢用力起跳，飛撲出去！



我跳過咗終點線，然後趴咗喺到。

負責旁述嘅體育老師宣讀緊名次：「嚟到第三名…係未有架，因為要睇返慢鏡。」

過咗幾秒，佢再一次開咪：「第三名係Form 6嘅啊武啊！佢終於重出江湖啦！」

黐撚線，真係Work架！

我企返起身，慢慢離開賽道範圍。



我諗住行返上看台，點知行行下個肚抽曬筋，完全行唔郁。

我撳住身邊個欄杆，深呼吸咗幾下，然後…

開始狂咳。

絕對唔係因為中咗肺炎，純粹係我個肺差啫。

咳咳下，有人隊咗枝哮喘藥過嚟。



「吸啖會好啲。」

我拎走枝哮喘藥吸咗啖，好似又真係好返啲。

我調整咗一下個呼吸，然後終於冇再咳。

喺我諗住轉身還返枝藥比人嘅時候，我身邊一個人都冇，所有人都離我好遠，唔似係借哮喘藥比我嘅人。

我將枝藥放落褲袋，然後行返上看台。

啊晴睥咗我一眼，然後又擰返轉頭同啲Fd傾計。

我行返上最後一排，托住個頭，視線喺啊澄同啊晴之間來回跳動。

學校唔會提供呢啲個人藥物，所以今次又係邊個？



唔似係啊澄，因為佢有食煙。

但調返轉嚟睇，都唔會係啊晴，因為我上次見佢食煙食得好順口。

但係咁講的話，即係唔係佢兩個。

但冇可能唔係佢兩個其中一個，所以等陣一定要再搵線索。