中六個年 我鍾意左叫我起身個女仔: 是誰(六)

轉眼就嚟到放學時間，我帶住一大堆疑問離開運動場。

我諗住急急腳行走就冇人見到我，因為我想一個人靜落嚟思考下。

可惜，女人呢種恐怖嘅生物并不允許我咁做。

「喂，啊武！」

有人喺後面嗌上嚟，我認得出係啊晴把聲，但我決定扮聽唔到，然後加快腳步。



行行下，我件衫比人扯住咗，我都冇再做任何無謂嘅掙扎，乖乖地擰轉身。

果然係佢。

「做咩啊？」我問佢。

「你…」佢好似有啲嘢想講。

「冇嘢講我走先，好攰。」我拎開佢隻手。



你想講係你嘅事，我有權唔聽，而家亦都真係冇心情聽。

我諗住行，點知件衫又比佢扯住咗，仲要係雙手扯住。

「想點啫你？」我開始有啲唔耐煩。

「你有冇發現啲嘢？」佢問我。

「冇呀。」



其實有，但我唔想再煩。

「咁…你有冇嘢要同我講？」佢再問。

「冇。」我直接出大技：「不如你講你想點？」

「我…冇呀。」

「咁我走啦。」

我拎開佢雙手，轉身就走。

嚟到巴士站，今次撞到嘅係啊澄。

佢排喺我前面，希望佢唔好見到我。



佢擰轉頭望，我即刻踎低匿埋，用前面條友擋住自己。

「唔洗匿喇，見到你喇！」佢直接大嗌。

講完，佢就已經嚟到我身邊。

「勁喎武哥。」佢望住我條頸：「做咩唔戴住個獎牌啊？」

「黐線咩，咁撚柒。」我懷疑佢傻咗：「你又搭呢架車？」

「架車得你一個搭得咩？」佢反咗個白眼。

「問下啫，唔洗反曬白眼嘅。」



「咁你返邊？」

「問嚟做咩啫？」

「問下啫，我就返廣福嘅。」

「你講到咁，我都冇得唔講啦。」

「你喜啦。」

「鹿茵山莊。」

早知唔問，原來唔同Level，真係崩口人忌崩口碗。

我哋上車嚟到上層，得返最後靠左邊窗嘅兩個位。



因為我行先過佢，所以我坐咗喺靠窗位，而佢就坐咗喺靠走廊位。