盛夏85天的我們: 第十七章 快樂

「好似有個沙灘喎，不如去嗰邊燒下菲林！」
「行唔行到過去㗎，好似冇乜人咁嘅！」
「得㗎啦，我愉景灣地膽嚟」

用餐完畢後，我們朝著沙灘的方向進發，此刻的陽光已經沒有這麼猛烈，一層層烏雲也籠罩著整個天空。

「又真係比你行到入嚟喎，不過好似想落雨咁嘅」

我觀察著雲層的範圍，然後舉起手，感受著風的方向和移動速度。





「應該係多雲姐，唔會落雨嘅，風係唔會呃人！不過一陣日落我諗冇咁靚」
「笑死！你咪天氣先生？」

這裏和一般的公眾泳灘有少許不同，除了沒有救生員之外，沙灘裏的樹林有一個人手打造的小型遊樂場，旁邊也有一條小溪流，碎石和樹枝遍布著整個海灘，而在接近海邊的濕地裏，就有一個老人在沙石中尋找些甚麼，看到此景象的我突然聯想起一個畫面。

「你見唔見到嗰邊有個阿叔」
「見到呀，做咩？」
「佢同你好似」
「邊到似先」





「都係鍾意掘蜆」

我們對望了數秒，隨即開懷大笑著。

「我屌…你咪記埋啲白卡野！咁我嗰陣真係搵唔到張八達通吖嘛」
「真係勁好笑…頂你同呢個畫面match到癲！可唔可以cosplay一下」

她馬上蹲下身子，手放在沙地當中，奇怪的姿勢與在海邊掘蜆的老人相映成趣。

「唔得…你唔好再扮..就嚟笑到肚痛！不過你hold住個姿態先，我幫你影張相！」





我拿起手中的相機為她拍下這個奇景，沒一會，她跑到海邊與浪潮競賽，來回跑動著。

「喂你小心啲仆親呀！」
「呀！！差啲比佢捉到我啦！」
「你試下轉身望過黎呢邊！」

在灰白色的天空和陰沉的海面之間，少年拍下了她玩耍的瞬間，他一直解不懂女孩的眼神，直到在那張殘舊的菲林底片中，看到這一張笑臉，快樂也從此定格在少年的腦海裏。