《在七日輪迴中尋覓真愛》: Week 0 Day 5·續

「話時話，本身你今晚約左阿Matt？」阿秦說。

「係啊！本身約左佢食夜晚，順便同佢傾下...」我答。

「嗯？想同我傾乜嘢？」阿Matt問。

兩個女生結伴去了洗手間，剛回來了。

然而我和阿秦都沒有意識這件事。





阿秦聽到阿Matt的聲音後，神色稍為驚詫，他很快把那絲詫異的神情壓下去，玩味地對我笑了笑。

阿秦走了過去，拖着Coco的左手，並裝作可愛女生，用嗲嗲的腔調說：「我好肚餓~BB~我哋兩個去食嘢先~」

然後他看著我，用正常的語氣說：「個場交返俾你！」

在他們兩人準備離去之際，我問阿Matt：「你食左飯未？唔同佢哋一齊食？」

阿Matt無奈地說：「未食啊，費事阻住佢哋二人世界啦。等佢哋返嚟，我先落去食。」





---------------------------------------------------------------------

「你想同我講咩啊？」阿Matt問。

「...」總感覺有點難以啟齒。

「我想問下你...」我說。

「？？？」滿頭問號的阿Matt說：「做咩口窒窒咁？」





她用力推了推我的右肩。

「冇啊，諗住問下你鍾唔鍾意我？」我故作輕鬆道。

阿Matt啐了一口，然後說：「乜阿然你咁自戀㗎！」

「咁你鍾唔鍾意我啦？」我繼續問。

既然已經開口，那就豁出去，直至找到答案。

「鍾意...掛！」她臉頰變得紅紅，害羞地說：「我都唔知啊！阿然你做咩咁突然，問埋呢啲嘢？」

我答：「阿秦囉！佢話你鍾意我。」

「...」阿Matt羞憤地說：「遲啲搵佢算帳！」





我不知道這時候該說些甚麼，只能等她繼續說。

雙方同樣無語，大約二十秒後，她才說：「我細個嗰陣好鍾意你。由你救我嗰一刻開始，係我最黑暗，無路可退嘅時候，我就對你有好感。你好似超人咁出現，雖然係唔夠反派打嘅超人。」

說到這她看著我輕笑，我只能無奈地半掩面，又是這段常常被人提及的黑歷史。

「細路仔緊係鍾意superheros，我諗十四、五歲之前都鍾意緊你。

直到我慢慢大個，知道好感同鍾意係兩回事。加上...我哋作為好朋友相處得好好，我怕做咗情侶之後關係會變質。」她說。

「依家嘅我，應該都只係對你有好感掛。始終我都冇拍過拖，我都唔清楚自己係咪鍾意你。

阿然。其實鍾意一個人係點？」





阿Matt拋出了一條世紀難題。

「鍾意...每個人鍾意另一個人嘅感覺都唔同。

不過有啲方法可以test下，當然唔係百分百準。

當你暗戀一個人，你會好容易受佢嘅情緒影響。

佢唔開心嘅時候，你會變得失落。

見到佢笑容滿面，你嘅嘴角都會唔自覺咁上揚。

又或者，佢同異性朋友玩得好埋嘅時候，你會有一種異樣嘅感覺，個心會酸酸澀澀。」我答。

「咁...其實你問我鍾唔鍾意係為左咩？你唔係仲鍾意阿晴咩？」阿Matt問。





「我...」對啊！若果我喜歡阿晴，那我問阿Matt究竟是為了甚麼。難道阿Matt說了喜歡我，我就會答應她嗎？

「嗯...」無論她是否喜歡我，而我又能否回應她的感情，我們都應該早點說清楚。

「如果你唔鍾意我，咁就...當冇事發生。

如果你係鍾意我嘅，咁我哋早啲講清楚。

無謂拖住你，哂你時間啦。」我解釋道。

「原來係咁！」她好像恍然大悟般說。

---------------------------------------------------------------------





隨便閒聊一會後，Coco和阿秦回來了。

阿Matt便跟我說：「下次再講，我去食飯先。」

「Bye Bye~」我跟她道別。

「我又去！」剛剛才回來的Coco跟著阿Matt走了。

留下來的只有阿秦和我兩人。

「頭先傾成點啊？」阿秦問。

「冇嘢啊！阿Matt應該係唔鍾意我㗎。」我說。

「應該？」他皺着眉頭說。

「咁冇理由一直追問㗎！加埋佢有機會口不對心。不過阿秦你feel錯嘅機會大。」我說。

「你啱！可能真係我錯覺。阿Matt以前鍾意過你，依家已經冇。」他說。

---------------------------------------------------------------------

時間就在我們兩人聊天之間流逝。

「十一點啦？」阿秦看了看手機才發現時間悄然過去。

「係啊！」我說。

「今晚十二點要睇波，我返屋企先。晏啲三、四點左右再返嚟！」他說。

尚未等我回應，他便急急離去。

我也準備在病房外的座椅上休息了。

沒有想到的是，我們猜錯了一件事。

Day 5 完結