是咁的，我無啦啦收到隻戒指: 四

我拎個盒出嚟：「咁我準備開佢架喇喎。」

佢閘住我：「喺我開之前，我想問你一樣嘢。」

「想問咩？」

「你條友點知係1226？」

我反咗白眼：「日期嚟架。」



「咩日期嚟？」

我比咗兩隻中指佢：「我生日啊屌你。」

「哦，好啦，咁你開啦。」

老實講，睇到係戒指盒嘅時候，我都有啲緊張，因為我好驚啲讀者送啲好貴嘅禮物比我。

「清空個枱面先啦，比啲儀式感。」



「好。」佢將個盒擺落地下。

而家成張枱得返個戒指盒，咁先有儀式感架嘛。

「嚟架喇喎。」

「請。」

我慢慢打開個盒，開到一半我已經覺得唔係好對路，因為佢有啲閃。



個盒完全打開，喺裡面嘅係一條鍊，鍊上面有隻戒指，戒指上面例牌地有粒鑽石。

「我屌啊！」狗卷望住隻戒指，忍唔住屌咗出聲。

「咪屌住先。」我扮曬冷靜：「嗰枝筆仲喺唔喺到？」

「鑽石測試筆？」

「係。」

「我去拎。」

講完，佢就行咗去拎嘢，而我就開Whatsapp問啊金。

「啊金。」我要Confirm佢得閒先。



「係，咩事？」

「我想問有冇辦法知NGL個留言係邊個留？」

「有啊，好似可以買Plan。」

「有冇用先？」

「有啩，我唔知。」

「Thx。」

我撳入NGL搵咗陣，終於搵到啊金所講嘅Plan。



我諗都冇諗就買咗，然後就去睇下句「I Miss you」係邊個Send。

「找不到用戶。」

多鳩謝，你嘅資料真係好有用。

呢個時候，狗卷拎住枝鑽石測試筆行咗返嚟：「預熱咗喇。」

「直接吉佢啦。」我同狗卷講。

狗卷將個筆頭一嘢吉落粒鑽石到，枝筆即刻響咗。

「拎去鑑證，可能係莫桑石。」我合返埋個盒：「我有冇稿未交？」

「冇呀，做咩？」



「咁你有冇嘢做？」

「冇呀，做咩？」

「咁行啦。」

我未等佢答我，就已經拎住個盒拉住佢行咗出門口。