聽到呢到,我真係哭笑不得。

首先,多謝呢位女士肯做我老婆,因為我都唔肯定自己以後搵唔搵到老婆。

但係,我唔知你係邊個都算喇,你仲要我玩完一輪解謎遊戲先話比我聽你係邊個。

仲有啊,叫雞都有得彈鐘啦,而家講緊結婚喎大佬,人生大事嚟架喎。

而家你當我咩人啊?我雖然唔係靚仔、高大、有錢、有樓仲要大賓周啫,但係我都唔係咁隨便架喎大佬。



「南哥。」我拍咗拍佢膊頭。

「做咩啊?」佢耍耍手:「我唔答架喇。」

「我冇話咩,只不過就叫雞都有彈鐘,結婚呢啲大單嘢冇可能唔比機會我彈鐘架嘛?」

我喺到說服緊佢講啲有用嘅嘢出嚟,并唔係因為我放棄解謎,而係…

南哥都係呢隻Game嘅NPC嚟架嘛。



同NPC攞料,唔算係咩犯規行為啩?

「乖啦,我唔會答架。」

我相信一樣嘢,叫做「啲老人家好心軟架!」

「南哥啊,你諗下如果到時我真係彈鐘,喺嗰間嘢到逃走出嚟,你話成何體統呢?」

循循善誘唔一定Work,但Work嘅機率一定高過盤佢。



「咁呀…」

啱呀,快啲講啦!

我好似性上癮病人咁喺內心吶喊:嚟啦嚟啦,快啲啊!

佢嘆咗啖氣:「我哋呢啲講口齒,真係唔講得。」

仆街,咁就洩咗道氣。
已有 0 人追稿