是咁的，我無啦啦收到隻戒指: 二十四.

之後我哋喺唔同樓層都兜咗個圈，嚟到頂樓終於見到有個目測年齡至少有五十嘅女老師。

「喂龍仔，就佢啦。」啊聖喺我耳邊細聲講。

「好。」我扤咗扤頭。

我睇咗睇佢名牌，姓陳嘅。

我深呼吸，然後踏前一步嚟到佢身邊。



我清咗清喉嚨：「好耐冇見啊Miss Chan！」

「我識你？」佢眼裡充滿疑惑。

「你唔認得我喇？我係龍仔啊！」我指住自己。

「嗯…」佢托住下巴諗咗陣：「就係之前好鬼曳嗰個。」

「係呀係呀！」



雖然我唔知佢講緊咩人，但係認咗先一定冇死。

「你返嚟做咩啊？好耐冇見過你啦！」

「冇呀，咁耐冇返嚟，想返嚟睇下囉。」

我望向啊聖，佢比咗個眼色我，叫我入正題。

「話時話，你有冇悅晴嘅消息？」



「邊個悅晴？你話林悅晴？」

「係呀係呀！」

無錯係啊，快啲講啲嘢嚟聽下。

「你哋之前唔係好Friend架咩？」

「係啊，但係近排佢唔知點解突然唔見咗。」

「咁大件事，我睇下我有冇佢聯絡方式先！」佢拎咗部電話出嚟。

「唔該曬你啊Miss Chan，我真係想搵返佢。」