「算啦,唔重要嘅嘢我唔想提。」我收埋電話:「我哋而家要去下一個地方喇。」

「喂。」啊金叫我。

「做咩?」

「我驚。」佢成個人震曬。

「放心啦,冇事架。」拍咗拍佢膊頭。



「真係?」

「我都走咗咁耐,咩都唔關我事架喇。」我拍咗拍心口:「佢哋啲老一輩講道義架嘛,唔會亂咁嚟架。」

「嗯…咁行啦。」啊金扤咗扤頭。

「咁其他人呢?怯嘅真係可以走架喎,我唔會怪你。」我同另外兩個講。

「怕咩啊,以前大把老友都撈嗰飯嘅。」啊聖搭住我膊頭。



「我都幾廿歲人啦,早死遲死又咪差嗰幾年。」狗卷搭埋另一邊膊頭。

「多謝你哋,咁我哋行啦。」

多嘅唔講,在心中。



..



.

我哋好快就嚟到一棟工廈樓下,呢棟工廈都係喺我哋Office附近,但係呢棟個樓齡大過我哋Office嗰棟好多,用緊嘅仲係舊式嗰隻要手動閂嘅𨋢。

我拉開門,等佢哋三個入咗去之後先入。

我閂門撳𨋢,部𨋢隨即開始向上攀升,老舊機械零件磨擦發出嘅噪音喺𨋢裡面迴盪。

我哋四個半句嘢都唔夠膽講,連呼吸都唔夠膽太大力。

四個唔講嘢嘅人,加上嗰啲越聽越恐怖嘅噪音,簡直同恐怖片冇分別。
已有 0 人追稿