是咁的，我無啦啦收到隻戒指: 三十一.

我相信大家都有鍾意嘅顏色，有啲人甚至會鍾意嗰隻色到一個地步係…

成間房都係嗰隻色。

而啊武都有鍾意嘅色，而佢成間房都係嗰隻色，而佢鍾意嘅色…

係粉紅色。

大至牆身，小至一枝筆，都係粉紅色，唔講仲以為去咗「粉色地獄」



「笑咩啊笑！」啊武兇咗兇啊金。

啊金即刻停咗，然後挺直個身。

佢幫我拉櫈：「啊龍，請坐。」

「認真？」我有啲受寵若驚。

「認真。」佢行去對面坐低。



我摸咗摸張櫈，確認冇機關之後都猶豫咗一陣先坐落去，而啊金佢哋就企喺我後面。

黑社會大佬無啦啦咁客氣，你都咪話唔驚。

「所以係咩事？」我問佢。

「其實…」佢雙手托頭，擺出一個嚴肅嘅樣。

仆街，唔撚係轉咗行咁耐先出事啊嘛？



佢沉默咗一陣，然後伸手去枱底。

我下意識褪後張櫈，以防佢拎啲咩出嚟攻擊我。

而下一秒…

佢擺咗張紅色嘢上枱。

我鬆咗啖氣：「派帖啫，唔洗搞到咁緊張嘅。」

佢搖咗搖頭：「唔係派帖啊，你睇清楚啲。」

我認真咁睇咗睇，原來真係唔係囍帖，而係…

提親信。



左上角寫住「楊慕龍收」，中間大大隻字寫住「提親」，右下角寫住「林悅晴啟」