是咁的，我無啦啦收到隻戒指: 三十四.

我換上西裝，然後又上網查咗一陣點打呔，足足用咗成個鐘先出到門口。

我返到Office，狗卷同啊聖一早已經坐咗喺梳化到等我。

雖然唔知新娘係邊個，但係佢哋都隆重其事，著上咗整齊嘅西裝。

「啊金呢？」我問佢哋。

「唔知啊。」狗卷答我。



喺佢答我嘅同時，電話響起。

拎出嚟睇，係啊金。

「喂，啊金？」

「我臨時有啲嘢做，你哋過咗去先，我後到。」佢答我。

「好。」



收線之後，我睇一睇錶。

五點。

「佢後到啊，我哋行咗先啦，還掂都差唔多時間。」我同佢哋講。

「Call的？」啊聖問。

「唔洗啦，而家先五點，去彩虹轉小巴啦。」



「咁行啦。」狗卷企起身：「講明先啊吓，過埋今日就要寫稿架喇。」

「知喇。」我行出門口：「我邊次呃過你。」

「成撚日架啦。」佢勁細聲講。

「我聽到架屌你。」

…

..

.

我們好快就嚟到西貢大會堂，十一月仲要嚟啲又郊區又近海嘅地方，真係凍到仆街。



我哋慢慢行去上次嗰間餐廳，越嚟越接近目的地，我都越嚟越緊張。

雖然唔知新娘係邊個啫，但係結婚咁大單嘢，點都要緊要下。

我哋嚟到餐廳門口，而啊金都喺到等緊我哋。

啊金同我Friend咗咁多年，佢雖然冇著西裝打呔，但係都著上咗白色嘅恤衫同牛仔褲仲有Converse高筒步鞋，算係Smart Casual。

我整理咗一下件西裝：「行啦。」

我帶頭行入餐廳，而佢哋就跟喺後面。