時光突然倒流，打完飛機啲精縮返入龜頭: （4）

問題係，點解時間無啦啦會突然倒流？

唔通有人用特異功能操控緊時間？

又或者係地球自轉方向改變咗？

定抑或好似《天能》咁，我唔知幾時穿過咗某道門，進入咗一個時間逆轉嘅空間？

然而無論係咩原因都好，「時光倒流」已成嘅定事實，呢個時候我應該要諗吓，點樣脫離呢個「身不由己」嘅困境。





除咗保留住自主意識之外，身體無一個部分係受我控制。

我依家攤咗喺客廳梳化上㩒電話、碌連登。

之前睇過嘅po，全都由留言碌上去「回帶」睇多次。

我嘗試放低部電話，可惜隻手根本唔聽使。

於是我降低難度，試吓自己眨眼，結果一樣都係唔得。





後尾再試多十零廿次都係失敗，我就無曬符，只能放棄掙扎。

而時間倒流影響嘅唔單止我一個，我身邊嘅人同事物，總之所有嘢都跟住時間一齊倒流。

既然無法作出反抗，我唯一可以做嘅，或者就只有等待。

等時間倒流去到某個點，可能就會停低。

時針同秒針倒轉行完一圈又一圈，從窗口照入屋嘅陽光，隨住太陽向東移，而逐漸改變照射嘅角度。





時間由下晝變返做上晝，我老豆老母相繼喺出面返嚟屋企。

佢地嘅動作同我一樣都係倒返轉嚟做。

我老豆有食煙嘅習慣，吐出嚟嘅煙索返入佢個肺，至於支煙仔俾佢一路chur，一路就慢慢變返長。

此外，今朝早我老母出門口之前，為咗家用嘅事同我嘈咗幾句。

佢想我每個月俾多啲家用，我就話無，家吓我地「案件重演」，倒返轉嗌霎多一次。

有睇過天能（或者小薯茄party game）應該就會知，當一句說話倒轉講，咁成句嘢就會變到好似外星文咁，完全唔知噏乜。

我同我老母都控制唔到自己把口，大家一人一句，嘰哩咕嚕咁將講過嘅說話，倒轉咁講一次。

實際內容主要係，我老母投訴我一個月俾兩千蚊家用太少，要求我加多三千蚊。





但我只係個月入萬三蚊嘅外賣仔，連自己都未顧得掂，有乜可能加家用。

好似我地呢啲窮鬼公屋戶，基本上三日唔埋就會為錢而鬧交，所以其實只係好小事。