一覺瞓醒，你竟然同我講香港有喪屍？！: Zombie 26：失去！
「呢度係咩地方？我而家究竟喺邊？」我環視著四周。
「我地頭呀！我間廠，俾你食嗰隻老鼠藥都係喺呢度造㗎。」肥陳又從嘴裡呼出一口煙。
「你帶我嚟做咩？」
「講真，如果唔係你當初幫我，我有可能一早比老闆炒咗。帶你嚟，算係報答你！」肥陳望著天花，似是在回憶當日發生的事。
肥陳再度深深吸了一口煙「當初條契弟屈我撻嘢，好彩你出聲幫我，你都係唯一一個肯幫我……對唔住……我唔係想迫你，我一個人太寂寞喇。」
「你寂寞都唔洗開槍打人吓嘛！寂寞就可以迫我食死老鼠？」我生氣罵道。
「屌！你推我落地吖嘛！……支槍係氣槍，應該只係打到佢甩皮啫，唔死得嘅！」肥陳解釋。
「甩皮？爆血叫甩皮？你冇𨶙嘢呀！」
「應該係距離近咗，殺傷力大咗啫，嘻嘻。」
仆你個街！成堆藉口，根本無變過，都係咁黑人憎。
「多謝你先，但我唔想加入你哋，如果想報答我，唔該你唔好搞我！」我直接拒絕肥陳的「好意」。
「你諗真啲，變成我哋完全冇壞處，你睇吓！」肥陳一拳打在牆上，「砰」的一聲，把厚重的混凝土打出一個洞口來。
我並沒有給予回應，只閉上雙眼靜靜地深呼吸，回想起家輝教我的步法，在腦內架構起跟肥陳的對戰。但無奈的是，以現在的我來說太過勉強，更有可能落得只有捱打的份。
「喂！龍哥，唔洗劣喎，我實射住你㗎！」肥陳以為我在害怕他剛剛的出拳。
「你哋啲喪屍針，打完唔係個個都會變得好似你咁勁，我親眼見過有條友打完支針就變喪屍。」我懷疑道。
「你係話失敗品？哈哈哈……我唔會俾啲次貨你打，放心喎！」
「次貨？」我疑惑道。
「既然你唔係我哋『新人類』，我冇必要同你解釋。呢支係真正可以成為『新人類』嘅針。」肥陳在我面前放下一支裝滿紫色液體的藥針。
同阿強打嗰支綠色唔同……
「紫色……同綠色……」我望著藥針喃喃自語。
「綠色係最低級，紅色係最高級，我呢支已經係第二高級㗎喇，保證唔會失去理智。」肥陳似是聽到我的喃呢解釋道。
「噉總共有幾種？」
「我講過，你唔係我哋『新人類』，我冇必要同你解釋。想知咪打咗支針囉！」肥陳嘗試誘導著我。
另一方面，Mayu憑著記憶來到了之前停泊私家車的碼頭，家輝亦一早已經在等候。
「Mayu，快啲上嚟！」洛雯跟家輝在碼頭接應著。
「老公！老公被肥人捉咗！」Mayu緊張地指向灣仔的方向。
「……知喇，上船先。」家輝扶著Mayu。
當Mayu和洛雯一上船，家輝便把它往馬灣方向開去。
「輝輝！阿哥未上船㗎，你去邊呀？」洛雯感到非常疑惑。
「得喇！我知喇！」家輝簡單回應著。
「老公未上船㗎！」Mayu揮拳打著家輝的背部。
家輝沒有給予任何回應，任由洛雯和Mayu不斷大聲叫罵。心裡回想起浩龍離開青洲前交待的事。
家輝，如果我有事既話，記得唔可以嚟救我！我仲要你去照顧我個妹同Mayu，記得我所講嘅嘢！一定唔可以衝動，你就算以後變成罪人都好！一定要應承我！
「阿哥！放心，我會睇住佢哋！」家輝在心裡暗地說著。
遊艇一直在海中航行，縱使家輝已經把船調成自動航行，但他卻不願意返回船艙與眾人溝通。
此刻整架船都變得非常安靜，除了遊艇的引擎聲和眾人的呼吸聲外，以及大家對家輝見死不救的行為感到氣憤外，就只剩下悲傷的心情。
這一天，大家都沒有食慾，連喝水的心情也沒有。
零晨時分，除了家輝一人在甲板喝著啤酒外，都沒有人願意走出船艙。
「哥，呢鋪真係俾你講中，我變成千古罪人喇……我好想去救你……」家輝喝了幾口啤酒自言自語著。
「……真係阿哥叫你噉做……我應該一早估到先啱，輝輝你又點會掉低其他人……」洛雯輕輕從後抱著家輝說道。
「……雯雯，對唔住，Mayu佢……點呀？」
「喊到瞓著咗，個傻妹真係好愛阿哥，我……我都……」洛雯的臉幾乎整張貼到家輝的背上哽咽著。
心裡雖然難受，但其實大家彼此都知道，當時並沒有選擇，只能目送浩龍和Mayu離開。
「雯雯，有冇邊個地方妳覺得比較安全？我哋而家喺馬灣附近。」家輝牽著洛雯的手問道。
「唔知呀……而家仲有地方係安全㗎咩？」洛雯反問。
「咯咯」小鳳敲著甲板的門「阻唔阻你哋？」
「小鳳，瞓唔著？」洛雯輕聲問道。
「邊度瞓得著吖，龍哥都唔喺度。」小鳳坐到洛雯的身旁。
「小鳳……妳唔係對我阿哥有意思吖嗎？」洛雯驚訝的問道。
「的確有！但妳放心，Mayu係我個好朋友，我唔會做出背叛佢嘅行為，況且我只係羨慕妳哋兩個有另一半啫。」
「林仔？又或者可以試吓食嫩草揀阿昌囉！」洛雯笑道。
「唉！咪玩啦。」
「其實點解妳叫小鳳？吳鳳螢，應該叫小螢，螢螢先啱㗎。」洛雯好奇道。
「叫慣啫，以前我附近啲朋友仔，加埋我都有三個叫阿螢，後嚟為咗容易分辨，就將我叫做小鳳。」
「都幾難為妳。」家輝說。
一陣尷尬的氣氛慢慢升起，伴隨著心裡的不安感，彷彿一切都只是個夢，三人多想可以盡快從這個惡夢中醒過來。