一覺瞓醒，你竟然同我講香港有喪屍？！: Zombie 33：名偵探柯叔！

跑！
 
我可以跑開遠離他，至少可以爭取一點時間，好讓我顫抖的雙手可以緩和下來，但我這個想法好像有點過於天真。
 
兩米小弟竟然可以從幾米的距離跳到我的面前，那我剛剛死命的跑是為了什麼？
 
「我唔係一般嗰隻新人類，我身體每一個部位都好似得到重生噉，你以為走得甩咩？」兩米小弟一拳打在我的胸口上。
 
「咳咳！」我不知道我被打到有多遠，只知道我雙腳離地了好幾秒，短短幾秒就好像慢動作般把時間拉長了一倍，甚至更多，而且胸口的痛感比起刀傷更為嚴重。我感到有一股暖流從我的嘴裡緩緩流出，一股帶著鐵鏽味而且微咸的溫暖液體。
 




看著滿地鮮血的我，頓時感到一陣眩暈，應該是失血過多的反應。從被肥陳擲向牆壁那一刻到現在，我應該得了不少內傷，就算我把兩米小弟殺死，我應該也殺不了帶路小弟。
 
「咁快就唔得嗱？我都未玩夠！你知唔知你係第一個可以殺死我哋呢個Level嘅人？我仲期待可以同你打得更加痛快……」兩米小弟抽起我的衣領說道。
 
「……咳咳……點打？同你班怪物打又點會贏……你估我係超人咩……」我用盡僅餘的力氣自嘲著。
 
兩米小弟將雙手分別放在我的額頭和下巴處「噉你唔好怪我囉！」，看來是要扭斷我的脖子。
 
「嗖！」一聲，一把刀穿過了兩米小弟的頭顱，刀鋒垂直插進了他的眉宇之間。刀身並沒有因而停下來，而是一直往下移動，直至它到達肚臍的位置才停下來。
 




兩米小弟的內臟瞬間傾瀉到地面上，帶黑的鮮血亦急速湧出，在他倒地的一刻我才清楚看到帶路小弟的身影。
 
「龍哥！我只可以幫到你呢度，之後就要靠你自己喇！」帶路小弟握緊充滿鮮血的開山刀往自己的腦袋用力插進去。
 
「喂！」失血過多的我隨後亦跟著倒下去了。
 
待我醒來已經是三天之後了，我的記憶還停留在帶路小弟自殺的那一刻。
 
「醒嗱？𡃁仔，估唔到你真係打得贏。」一個聲音從隔壁位置輕聲說道。
 




我望向聲音傳來的方向，是他，那個在醫療室隔壁床位的大叔。
 
「阿叔……聽到你把聲，我即係仲喺工廠啦。」
 
「佢哋話你醒咗就可以自己離開，直接走就得喇。」大叔托了一下鼻樑上的眼鏡道。
 
因為眩暈的關係，其實我還未能理解現有的情況，只透過布簾的影子看到大叔正要走過來我的床隔位置。
 
「咻！」布簾被大叔一把拉開，刺眼的陽光令我不得不用手遮掩雙眼。
 
「喂！屌！好掁眼呀！」
 
「細路，我幫你檢查過喇，無細菌感染，可以走喇。」
 
今天的大叔不是穿著病人的服裝，而是穿著一套簡單的襯衫西褲，而且還穿了一件白色的醫生袍。




 
「……咪住！我記得你話過，如果我有命返嚟，會話我知你係邊個。」
 
「柯林，我叫柯林。」大叔望著我說。
 
「咪玩啦阿叔，你當自己係名偵探柯南呀？」
 
「衰仔，我姓柯名林，森林個林呀！」柯林指著我罵道。
 
「我身上嘅傷係你幫我醫㗎？」我望著身上受傷的位置都被繃帶包紮好。
 
「我助手幫你醫，我唔係醫生唔識醫人。」
 
柯林繼續說「我係科學家，我助手係護士，我都識少少醫學噉啦。」
 




回想之前肥陳的話，我一直抱持著不能相信的心態。
 
「噉我……係唔係真係唔會受感染？我唔會變成喪屍？」
 
「嗱！話唔會感染呢，就係假嘅。正常被咬嘅話，最遲半日內就會變成感染者。你之所以冇變，係因為我助手俾咗樽水你飲，我發明㗎，可以暫時抑制啲病毒，但係我唔知可以維持幾耐㗎啵。」柯林解釋道。
 
「所以被指甲搲傷都會感染？」我問。
 
「呢層就唔知喇，你有冇俾佢地咬過吖？」
 
「……假牙算唔算？」我望向被繃帶包紮好的左手手臂問道。
 
對於我的提問，柯林擺出一副「死人樣」看著我，完全將我無視。
 
「柯博士。」那名先前幫我包紮的護士走進來並把門鎖上。




 
「嗱！我助手，你見過啦，阿嘉琛。」柯林指著正步向我們的嘉琛。
 
「唔該晒！」我連忙向嘉琛再次道謝。
 
「細路，帶埋佢走啦，呢度始終係一個冇希望嘅地方。」
 
「吓？」對於柯林的話，我不明所以。
 
「唔得㗎！佢會殺咗你㗎！」嘉琛不斷搖頭拒絕。
 
「唔洗擔心我，佢殺咗我就冇人幫佢複製嗰啲病毒出嚟。」柯林嘆了一口氣說道。
 
「你為咗生存，竟然幫班仆街整病毒！你仲係唔係人嚟㗎！」
 




「唔係你諗噉樣，博士係研究緊解藥。」嘉琛突然貼近我耳邊輕聲說道。
 
「……」
 
如果他們所說的是真話，那我沒有變異，應該也是他們的功勞，說不定真的可以拯救香港。
 
「快啲走！唔好俾佢哋見到阿琛！」
 
「點解突然間叫我帶佢走？你之前唔係叫我自己走咩？」對於柯林的態度轉變，我抱持著很大的質疑。
 
「我諗清楚喇！既然你可以打得贏，噉即係有返咁上下身手，你可以保護到阿琛，靠晒你喇！細路。」柯林拍了拍我的肩膀拜託著。
 
「博士……」
 
「乖，將我條Formula交俾值得信賴嘅人。 」
 
老實說，我現在除了自己本身的一Team人以外，我完全相信不到其他人，更何況眼前這個未曾了解過的陌生人，而且更有可能是肥陳派來的臥底。
 
「好多謝你相信我，但我仲係想自己一個人。」我婉拒道謝。
 
「細路，你冇事都係多得佢幫你急救，如果唔係，你嗰日已經死咗喇！」柯林說。
 
的確，我身體上的痛楚減輕了很多，至少我現在可以輕鬆站起來，眩暈感也消失了。我看著柯林身旁的嘉琛，感覺她跟我的年紀相約，清純的外表下帶著堅毅不屈的眼神。再仔細一看，也算得上是一個美女，札著馬尾，有雙大眼睛，而且身材也不錯，我不禁懷疑肥陳怎麼沒有把她鎖到那個「洩慾房」。
 
「……唔洗望喇，我冇比人搞過！」
 
聽到嘉琛突然說出的一句話，我整個愣在原地，覺得她可以看穿我心裡所想的，令我頓時有種不安的感覺。
 
看我沒有反應，嘉琛接著說
 
「係珠珠同我講，你係好人，我先會救你……」
 
「珠珠？」我完全不認識一個叫珠珠的人。
 
「俾個衰人掉去埲牆嗰個女仔呀！」嘉琛見我望頭問號便解釋道。
 
「佢冇事吖嘛？」
 
「死咗喇，內出血加上肋骨插穿內臟救唔返……」
 
此刻的嘉琛露出一副極為難過的神情，如果這不是真的，那她的演技可以跟一些大明星相比，甚至可以說得上更為精湛。
 
「細路，唔好蹤時間，班友仔好快就會返嚟，到時候阿琛就走唔到喇，求吓你做個好心帶佢走啦！」柯林竟然跪在我的面前乞求著。
 
「柯博士起身先，不如我哋一齊走？」
 
「我跟住去，佢哋班人一定會追上嚟，到時三個一齊死咩？乖，細路，快啲帶佢走。」
 
「我叫黃浩龍，唔係咩細路……」
 
語畢，我牽著嘉琛的手走出醫療室，臨走前我不忙留下了一句
 
「柯博士，唔好死呀，有機會我一定會返嚟救你……救班女仔……」