一覺瞓醒，你竟然同我講香港有喪屍？！: Zombie 48：盧偉廷.

「講多次個地址喺邊？」家輝問。
 
「香港中環昭龍街十九號。」洛雯唸出卡片上用紅筆手寫的地址。
 
「昭龍街十九號？噉熟嘅……」
 
由於我以前曾有一段時間在中環某高級會所上班，中段的休息時間有時候會跟同事們外出用餐，所以對附近一帶不感陌生。
 
不出一會，家輝把車停在盤谷銀行大廈前面「應該到喇！」
 




街道上還是佈滿亂停在路中心的車輛，路上有少量行動緩慢的喪屍，未見有活人。眼看著這種變成鳥不生蛋的甲級寫字樓區，我們根本不會期待盧偉廷還活著，又或許他已經逃到某個安全的地方也說不定。
 
我牽著Mayu的手走到了十九號鋪位，我不禁懷疑自己的眼睛，向身後的洛雯確認著卡片上的地址。
 
「老公！呢個好好食，我中意食！」Mayu開心得手舞足蹈指著招牌說。
 
「張卡片的確係呢度，但係『永洛園』又點會係診所！」
 
我冇可能會記錯呢度，我細細個由佢有迷你熱狗食到佢唔再出，呢度根本未開過診所！
 




「有冇第二張卡片？會唔會寫錯？幫手睇吓隔離啲舖頭。」
 
這條小巷我熟悉不過了，我根本未看過這附近有一個寫著「西醫盧偉廷」的招牌，不要說未看過，我更可以肯定它未曾存在過。
 
「既然搵唔到，不如我哋入去睇吓？反正道閘開咗一半。」小鳳蹲下身探頭視察店內的狀況。
 
「我都贊成，都嚟到咯，去睇睇啦！」嘉琛走上前蹲下身跟小鳳視察內裡的環境。
 
我對家輝點頭示意，我負責做先鋒，女生們和財福緊隨我身後，家輝則留後關門。
 




我把手機的手電筒打開，照射了一下那烏漆墨黑的熱狗專賣部，我屈膝爬進店內尋找電源的開關。
 
「啪啪啪！啪噔！」電燈瞬間照亮了整個店舖，這種開燈聲可以證明這家店存在著一定的歷史。我現在真的很想來一個這裡的招牌熱狗，話說我也有好幾年沒有再吃過了。
 
「呢度唔係應該有條樓梯落去㗎咩？」我看著眼前的景象感到難以置信。
 
「阿哥！你究竟幾耐冇嚟過？條樓梯改咗喺隔離呀！」洛雯嘆了口氣看著我。
 
「即係要出返去啦……頭先又唔講！」
 
「鬼知咩？我以為要睇咗呢度先吖嘛！」洛雯嘟著嘴抱怨道。
 
步出熱狗專賣部後，重複著剛剛的行為，開電筒，探路，進入。我們一行人先走下樓梯，從門縫窺探著餐廳的內部。燈火通明卻空無一人，應該是我剛剛把下層的電源也打開了。
 
進入餐廳，我感到一種非常懷念的親切感，小時候吃這裡的熱狗吃到店員都認得我們，有時候還會特地多送我和洛雯各一個迷你熱狗。




 
「好想吃隻熱狗呀！」洛雯挽著小鳳的手臂嚷道。
 
「真係咁好食咩？」小鳳問。
 
「正呀！可以用『Good呀！』去形容，荷蘭腸配上佢哋獨有嘅醬，仲有熱辣辣嘅包，諗起都想食。」
 
「嗯！好食，我朋友帶我嚟過，Good呀！。」Mayu一說起吃就異常興奮。
 
正當我們你一言，我一語時，廚房突然傳出一個聽上去似是中年男人的聲音。
 
「細路，你哋都幾識食㗎喎！呢度啲熱狗真係好出名㗎！」
 
「邊個？」我和家輝幾乎同一時間拔出武器大叫道。
 




「喂喂喂！有事慢慢講。」
 
一個身穿牛仔褲黃色Polo恤衫的中年男人，高舉著雙手從廚房慢慢走出餐廳。
 
「細路，放低武器先啦，呢度得我一個，我又冇武器。」男人說。
 
「你係咩人？仲咩鬼鬼鼠鼠匿喺廚房呀？」嘉琛高聲問道。
 
「細聲啲啦！我唔想班痴線佬走入嚟！況且，我問妳哋先啱，入嚟我間舖做咩？」
 
「你間舖？你係老闆？」我訝異問道。
 
「間舖我阿哥嘅，我有時候會借嚟用！」男人拿出了一串鑰匙解釋。
 
經過一番了解後，男人決定暫時給我們留下稍作休息，順便弄幾個熱狗出來給我們懷念一下。




 
「係喎！我叫浩龍，阿叔你點稱呼呀？」我一口熱狗，一口可樂，恍惚餓了一個多月似的。
 
「小朋友，好唔好食呀？」男人笑得開懷地問正吃得津津有味的財福，同一時間說出了一個此刻非常動聽的名字。
 
「盧偉廷，叫我盧醫生啦！」
 
「有冇噉好彩！我哋要搵嘅人就係你！」我立即遞上卡片，感覺像做夢般難以置信。
 
「佢叫潘財福，係你法醫朋友個仔，佢有樣嘢要我哋交俾你。」家輝附和。
 
「停！等等！我個朋友？佢叫咩名？」
 
盧偉廷這一問，令在場的所有人都啞口無言，因為除了阿昌以外，根本無人知道財福爸爸叫什麼。
 




「福仔，你爸爸叫咩名呀？」小鳳輕聲問道。
 
財福搖搖頭，說了一句「爸爸」便繼續吃他的熱狗。
 
「邊有人唔知自己老竇叫咩㗎？小朋友都唔會唔知㗎！」盧偉廷嘆了口氣。
 
「盧醫生，你不如睇吓部電腦先再諗吓你係唔係識佢老竇。」家輝遞上預先插好USB的筆電，並打開相關資料頁面。
 
盧偉廷熟練的操作著電腦，而且在未得知密碼的情況下把上鎖的資料夾解鎖，並閱讀著那些寫著亂碼的文件。
 
大概二十分鐘後，盧偉廷深深地呼了一口氣，並將電腦歸還給家輝。
 
「所以我老友死咗？」
 
「係！」家輝回應。
 
「點死㗎？」
 
「俾喪屍咬死！」家輝隨便撒了個謊，希望蒙混過去。
 
「你親眼睇到？」
 
「我同伴在場，睇到所有嘅嘢再話我知。」
 
「邊位睇到？我想親耳聽佢講一次。」盧偉廷快速掃視了在座各人。
 
「死咗，阿昌死咗喇，中咗喪屍毒……」小鳳瞪眼看著盧偉廷，眼淚緩緩滴下。
 
盧偉廷見大伙神情變得嚴肅起來也不再多問，看著本來吃得高興的財福也忽然停下，默默的低泣著，盧偉廷再次開口
 
「個USB只係得一條Formula，而且係失敗嘅，佢要我解開失敗嘅原因去做解藥……但問題係，我根本唔識……」
 
「你唔係睇得明個File咩？點會唔識呀？你係醫生喎！」我忍不住追問。
 
「……我係黑市醫生，冇牌㗎！我專醫古惑仔嗰啲刀傷呀槍傷呀噉，鬼識整藥咩！」
 
「你唔識？點解佢又會俾個USB你？仲指名係你！」
 
「唔係俾我！係俾我師父，佢叫我轉交俾佢。」
 
又點呀？搵嚟搵去得個吉……咩師父呀？學功夫咩？
 
「我師父係名偵探柯南，嘻嘻嘻。」盧偉廷嬉皮笑臉道。
 
「柯林？」
「柯博士？」
 
我和嘉琛幾乎同一時間說出口。