一覺瞓醒，你竟然同我講香港有喪屍？！: Zombie 52：Boss！

肥陳不再嬉皮笑臉，而是用一個嚴肅的表情看著我。
 
「柯林未死！佢俾我大佬捉走咗，仲喺我呢度帶走咗一啲人……一啲普通人。」
 
「噉柯博士喺邊？你好快啲講喇喎！」
 
嘉琛拔出家輝送的軍刀作勢要刺上去，不得不說，家輝為我們各人都準備了一把小軍刀，那種腳板大小，可以一手掌握的軍刀。
 
據他說，這是之前拿航拍機時一拼放進背包的。由於當時對抗阿強後就急著調整航拍機，把整個背包掉在船艙裡忘記分發，剛好這次要帶齊裝備才又被翻出來，但拿出數量那麼多的軍刀也令我們驚呆了好一會。
 




「等等！」我伸手擋著嘉琛，不讓她做出衝動的行為。
 
「學吓龍哥啦！做起嘢上嚟真係唔同啲。」肥陳把目光再一次集中在我身上。
 
「記唔記得我同你講過我點變成新人類？係灣仔警署嗰個人將我打成噉……我原來真係唔夠佢打……哈哈哈哈——」
 
「你哋唔係都係新人類咩？做咩鬼打鬼？」我完全想不到他們要自傷殘殺的理由。
 
「柯林，就係因為佢，條賤人要柯林整紅針！」
 




「紅針係咪……第五級嗰隻？」我用微微顫抖的嘴唇問出這一個我不想成為事實的問題。
 
「係！聰明！」
 
聽到這裡，我們都感到大事不妙，如果柯博士成功製造出紅色藥針的話，到時候香港，甚至全世界都有可能變成一個新人類口中所說的「新世界」！
 
「等陣先，你唔係第四級咩？點解會有第五級嘅能力？」我疑惑道。
 
「紫色，係一定只係去到第四級，但並唔代表你唔會有能力。」
 




「噉你即係第幾級？一時又四，一時又五。」
 
「四！所以我會輸係整定……」
 
如果肥陳所說的是真話，那我們就算吞下藥劑，最多也只能去到第四級別而已。肥陳的力量那麼強都可以被虐成這樣，那我們那六分之一的藥劑又有什麼用？又怎樣去救柯博士？
 
「肥仔，仲有冇多幾枝紫色針？」後方的家輝突然問道。
 
「我認得你！哼！上次唔敢郁嗰個吖嘛！你估我開藥廠咩？邊得嚟咁多？」
 
「如果我哋吞咗噉嘅量，會唔會變到新人類？」我拿出那六分之一的藥瓶斬釘截鐵地問。
 
「你哋想知咪試吓囉！我只可以同你講，支針係堅嘅，用唔用你自己決定。不過就算你用咗，都唔一定變到，仲有可能變喪屍！」
 
其實我很清楚明白肥陳的話，我只是要確認多一次他給我的是真貨而已。




 
「老公，走啦好唔好？」Mayu躲在我身後拉著我的衣尾輕聲問道。
 
「我哋上去睇埋個Cam先。」
 
「一五二八。」肥陳說。
 
「吓？」
 
「我話部電腦個密碼係一五二八！」肥陳對我反了個白眼。
 
我小心地拉開房門，先探頭查看四周的動靜，此時，身後的肥陳卻再度開腔。
 
「三日前走晒喇，出面冇晒人……龍哥，一陣你哋走之前我想你幫我一個忙。」
 




我望了一眼肥陳後便帶領著眾人走上二樓辦公室，不出家輝所言，監視器的電線都被接駁到辦公桌上的這一台桌上型電腦。
 
經過一輪簡單的操作後，電腦的主螢幕出現了十六個細小的方格，每個都放映著現時監測著的地方，但有好幾處卻被某樣東西遮蔽住什麼都看不到。
 
家輝用滑鼠點擊入口的地方，把時間調回三天前的錄影，再把螢幕放大，螢幕立即播放著當時的情況。一個長髮且身穿皮夾的男人率領了十人左右的小隊，光明正大地從正門進入，幾乎見人就打，毫不手下留情。
 
當時肥陳的小弟紛紛上前向這個長髮男敬禮，但卻被他身後的人打倒在地上，完全不顧同樣是新人類的一伙，感覺就像在恃強凌弱。
 
長髮男未有理會肥陳的小弟，只自顧自地走上二樓的辦公室。那些跟他同樣穿著皮夾的人就是長髮男的小弟們，這班小弟相比起肥陳那班烏合之眾有著極大的差別，不論從外觀衣著，或是身材上都比肥陳的小弟來得更有氣勢。
 
螢幕上的畫面已經不見長髮男的蹤影，家輝立即再度調整監視錄影，畫面一下子就來到了二樓的辦公室。
 
長髮男先是禮貌地敲門，待肥陳的小弟把門打開後，一腳便把他踹倒在地，再大搖大擺地走進辦公室。
 
「阿陳哥！乜整針呢啲小事要你自己做呀？」長髮男燃點起一根雪茄，然後慢條斯理地坐到梳化上。




 
「大佬，乜咁錯蕩呀！有事搵我可以叫我去你嗰邊吖，唔洗你行上嚟咁遠吖嘛！」
 
肥陳明顯畏懼著這個長髮男，從他出現的一刻，就算連隔著螢幕觀看的我們也感受到他那不一樣的氣場，那種黑幫老大或是最高長官之類的威嚴氣勢。
 
「點呀？唔歡迎我？」
 
「邊係呢？我只係唔想你咁辛苦行上嚟啫。」
 
對於肥陳這種「死狗Mode」，我已經不是第一次見，之前被老闆或大廚責罵時，他都會這樣，用這種拋下自尊的自嘲去應對，再在背後暗地裡咒罵對方。
 
「呢位著得咁四正嘅，應該就係整針嗰位醫生喇？」長髮男用食指和中指夾住飄著白色煙霧的雪茄指著柯林問道。
 
「我……我係……係科學家……」柯林明顯也受到長髮男的影響，嚇得連說話都結巴。
 




「科學家先生，我誠意邀請你加入，我可以確保你唔受任何騷擾，亦唔受傷害，而且唔會迫你打針吸毒！」
 
「但……但係……」
 
「你放心，阿陳哥唔會為難你㗎呵？」長髮男明顯給說話肥陳聽，擺明不把他放在眼裡。
 
「阿大佬，佢係唯一可以幫我哋嘅人，佢個助手又走咗，如果我哋有咩頭暈身㷫，得佢可以幫手咋！」
 
肥陳這種卑躬屈膝的態度真的不太討好，我不知道其他人怎樣想，但我已經看過太多次了，老實說有點噁心！
 
「噉得啦！只要係科學家先生你嘅人，我都一樣噉對待，你只要幫我造呢支針嘅液體出嚟，我就會重重有賞！對你完全冇壞處㗎！」長髮男客氣地對柯林說。
 
「我唔知整唔整到，而且我助手佢哋唔知去咗邊，我需要佢哋幫手！」柯林借勢提出自己的要求。
 
長髮男也不是普通角色，一眼就看穿柯林的想法，爽快答應會給予時間研究和幫忙找尋嘉琛跟浩龍二人。柯林亦知道浩龍帶有同伴，機智地隨便說自己有一個研究小隊，每個人都分配好應有的作用，缺一不可！藉此把浩龍的同伴也算上一份。
 
本應要離開的長髮男突然被肥陳叫住「喂！噉你即係搶人啦！」
 
「嘖！No！No！No！佢係自願跟我走，我冇迫佢㗎！我都有問你㗎！」


「問你老母，你噉叫問咩？」肥陳不甘自己的人被拉攏，隨即發難一拳把作為牆身的厚重鐵皮打出一個凹洞。
 
「肥仔，唔好敬酒唔飲，飲罰酒！」
 
長髮男只雙眼一瞪，就把肥陳嚇得倒退，雙腳一軟坐到地上擠不出半句話來。長髮男見肥陳呆若木雞般靜止不動，便勾搭著柯林的肩膀把他帶離辦公室。