一覺瞓醒，你竟然同我講香港有喪屍？！: Zombie 73：政府嘅重要公佈.

嘉琛簡略地向孫伯講述我們一路上的經歷，更將我身體的狀況向他解釋，希望以孫伯的經驗，可以解釋到我的身體為何突然變得那麼奇怪。
 
聽完嘉琛的話，孫伯只輕輕的呼了一口氣「我雖然以前做過軍醫，但係我都只係負責幫手做急救啊噉，最叻嗰次都係幫個兄弟做斷手斷腳處理咋，呢啲新型病毒……我可能冇辦法幫你……」
 
「爺爺，你幫吓浩龍哥哥啦！」麗怡挽著孫伯的手臂乞求道。
 
「最起碼你而家可以幫手檢查一吓佢嘅身體狀況，係咪？」嘉琛用著「你一定可以」的語氣向孫伯問道。
 
「龍仔，噉你瞓喺地下先，其他人出去等。」孫伯揚手示意其他人先行離開。
 




雖然說孫伯並不是一名專業的醫生，亦沒有進修過什麼現代的醫學課程，但從他的手法和經驗看來，還是有一定的能力在，只是可能太久沒有接觸生疏罷了。
 
「呢幾處地方有冇痛？」孫伯摸著我背上的肌肉問道。
 
「好似有好輕微嘅肌肉酸痛。」
 
語畢，孫伯命我翻身檢查著我的胸部和肋骨的地方，同樣按壓著我的肌肉。近肋骨的位置明顯感受到一點痛楚，但相比起之前已經少很多了。
 
「龍仔，你幾耐前受傷㗎？」
 




「差唔多一個月喇，嗰時我成身瘀傷。」
 
「……我係覺得你根本冇事，你身體康復梗，皮膚上嘅傷口應該已經好返，只係你仲有啲內傷，有機會之前骨折過，但你好好彩，應該冇傷到內臟。」
 
「噉我嘅聽覺同力量都變強，唔係新人類嘅能力噉係咩？」
 
「會唔會係你本來感覺就比較敏銳？而且你講過一路都有殺喪屍同埋同新人類打交，會唔會係你身體適應咗，令到你以為自己變強？」
 
的確，作為甜品師的我，對味覺和嗅覺的敏銳度比一般人高，而且它是一個非常消耗體力的工作，很有可能是我本身的體能變好也說不定。
 




「噉我有時候會見到一啲好奇怪嘅嘢，我可以好清楚知道我開始屍變……」
 
「我諗你太攰啫，再加上超過你本身可以承受嘅壓力，你精神狀態有少少偏離咗㗎啫，好好地抖吓好快就會冇事㗎喇。」
 
雖然我暫時接受孫伯的建議，但我始終覺得這一切都不可以用現有的醫學去判斷，我的身體始終是我最清楚。身體上的變化真的有可能在這短短的一個多月發生那麼大的變化嗎？我真的抱有很大的疑問。
 
「吾……睇落都好健康……」
 
不知何時，我褲檔的拉鍊被打開了，而且我的命根亦赤裸裸在孫伯的手上「喂！你做咩呀？」我連忙收起我的寶貝並拉上褲鍊。
 
在一旁的嘉琛此時面紅耳赤，用雙手掩臉別過頭去。
 
「我幫你檢查吖嘛，Check完上身咪Check下身囉！」孫伯一副無奈的樣子輕描淡寫的說道。
 
「噉你都唔洗喺個女仔面前拎我條……條嘢出嚟㗎！」




 
「切！都話而家啲𡃁仔成個腦都係性！佢係護士吖嘛，幫手檢查身體好正常吖，心術不正先會諗埋一邊！」
 
孫伯的斥責很有道理，但在這個氣氛下，多少都令我感到非常的尷尬。本來跪坐著的嘉琛亦趁機走進洗手間，明顯是躲起來不想面對我。
 
孫伯伯呀！孫伯伯，今次真係俾你累死！
 
檢查完畢後，我輕輕敲了敲洗手間的門「嘉琛……我想……」
 
未等我把話說完，嘉琛突然打開門對我說「冇！我咩都冇睇到，我頭先擰咗轉面呀！」臉上還是一樣像蘋果般赤紅，可愛得很，看得我有點入迷。
 
「噉妳做咩突然走開？」
 
「唔通我要望實佢咩？定係你想我望吖？」
 




被嘉琛突如其來的反問，我一時之間想不到可以說什麼去反駁，只好低下頭細聲回應「噉又唔係……」。幸好這時孫伯把門打開，大伙亦回到房間內，不然這種尷尬的氣氛不知道要持續到何時。
 
跟大伙講解檢查的報告後，我還是覺得自己多少有被影響到。我總覺得我們幾個都在工廠那天受到毒品影響，再者，我被新人類抓傷過，之後又喝過柯林給我療傷的藥劑。對於延遲屍化的時間也可能開始失效，我的能力也可能在這段時間被激發出來，我所擔心的是未知的突發狀況。
 
「唔洗咁擔心喎！我哋會幫你，相信我哋，相信柯博士喇！」家輝看得出我的擔憂，也可能是我瞼上露出了憂心忡忡的神情，我並沒有開口回應，只點了點頭。
 
這一晚，我們都沒有怎樣聊天，分別找了一個空房間在裡面休息，想起這一個多月的時間裡，遇到過壞人，也遇到了不少好人。縱使大家的理念或多或少都不一樣，但想拯救香港的心卻都未變，只是這種折磨人的時期到底要持續多久，我很怕大家內心的仁慈遲早會被磨滅，而我亦開始對周遭的事變得冷淡起來。
 
「老公，我好擔心你！」
 
「我會冇事㗎，妳乖，唔洗擔心。」
 
雖然對Mayu說這樣的廢話已經不止一次了，但又有什麼比這一句更適合呢？
 
深夜時份，月色皎潔，天上繁星滿佈，美得像一副銀河壁畫。洛雯此刻卻沒有心情欣賞，匆匆忙忙跑到我的房間，用力敲打著木門，聲響大得把整個樓層的人都驚醒過來。




 
「哥！快啲開門呀！」
 
我努力睜開雙眼，摸黑伸手把房燈亮起「雯雯，咩事呀？」
 
「唔好問咁多住，快啲打開個電視，快啲！」
 
我摸不著頭緒，但還是照做，因為洛雯不會做這種無聊透頂的惡作劇。其他人聽到洛雯的話也同時將電視打開，畫面出現了一個香港人不會感到陌生的人——香港的特首行政長官。
 
各位市民你哋好，對於今次呢件事，首先我要向各位道歉，政府未能喺適當嘅時候及時出手制止惡徒嘅暴行，對於今次嘅事件我深表遺憾。
 
「屌！又係啲官腔嘢！」小鳳忍不住吐槽。
 
「聽埋先！」我示意小鳳先安靜。
 




國家已經安排梗軍隊嚟香港，相信喺幾日之內會將大家拯救出呢個火海。我要對呢班惡徒作出最嚴厲嘅懲罰，殺害廣大嘅香港市民以及殺害多名政府公職人員，呢個係香港永遠都不能原諒嘅嚴重犯罪行為。
 
請各位市民暫時留喺安全嘅地方等待救援，唔好輕舉妄動，保護好家中的老幼，同埋相信政府，我哋會安排各位前往安全嘅地方。請大家相信政府……
 
「冇喇，之後就係一直噉重複！」洛雯說。
 
「早又唔嚟！而家死咗咁多人先嚟！正死仆街！」小鳳怒罵道，把所有的怨氣一口氣發洩出來。
 
「我哋要返上船！仲要帶埋柯博士走！」我說。