因為炸雞店一次意外，我變成了超級英雄。: 第六章 回歸生活

我孭住背囊返到自己既居屋。呢間屋係屋企人生前留比我，望落唔係好大，不過都夠我自己一個人住。

我放低背囊係張床度，坐係張電競椅上面。每次返到泥都會令我記起細個既事。細個既時候，最開心既事，莫過於就係同屋企人一齊食炸雞。老豆負責買返泥，而我同阿媽就係屋企等佢。即使佢地知道呢樣野係唔健康，但為左令我開心，佢地都會肯為我買。

到大個左，書又讀唔好，工又搵唔到，係最無助同絕望既時候，又係得佢地對我不離不棄。死左之後仲留左呢間屋比我，我真係欠佢地太多啦。

不過最痛心既，係當我想為佢地爭光既時候，我先發現自己係幾咁無能。或者能夠係炸雞店炸一世雞，就係我做仔能夠帶比佢地最好既光榮。

諗野會令人肚餓，突然好想食炸雞。





換左件衫，就落去樓下商場既炸雞店。街道既人好少，或者係同個隻怪物有關。我係炸雞店叫左兩桶雞，一餐晏晝，另一餐就夜晚，咁就可以慳返一次唔洗落街。就係咁我抽住兩桶炸雞，踢住拖咁行返番去。

總公司同我講會調我過去半山區既炸雞店做，至於其他既同事，始乎要同佢地各散東西。

阿光既事我一直都仲未消化到，上一秒明明仲同佢傾緊計，但下一秒竟然就陰陽相隔。係醫院既時候，我見住阿光既老豆老母白頭人送黑頭人，心入面都唔係特別滋味。終歸個陣時，係我拋棄左阿光。

諗下諗下又返到泥屋企。拆開包裝，狼吞虎嚥咁開始食雞。

雞髀、雞胸同雞翼排住隊咁隊入我把口。外皮好脆，肉汁都好多，唔知點解好似越食越餓，同埋啲雞點解好似好食左咁多既？





我好似感覺唔到飽咁，反而好想繼續食落去，即使我已經食左16件雞。

我又拆開第二桶，又開始猛咁啃落肚。去到最後我總共食左32件雞。

食左32件雞我先終於有飽既感覺，而且睡意都開始湧上泥啦。

我洗乾淨對手，然後就走左上床訓教。

訓左唔知幾耐，我擘大眼爬起身。咦？點解我身體咁漲既？而且全身都好精神好有力量。





我碌落床，行入廁所，照鏡。

「喔…唔係呀嘛。」我摸住自己塊面，個樣點解會精神左咁多既？同埋我個兩舊胸肌係乜野事，同美國隊友個兩舊有得揮喎。

我又揦起件衫泥睇。痴鬼線，有埋八舊腹肌，發生咩事。

簡直係難以置信，我搣自己既面珠墩，又痛喎…姐係唔係發夢？唔通係個36件雞？

我望住垃圾桶裝炸雞既紙盒，額頭流埋粒大汗珠。