因為炸雞店一次意外，我變成了超級英雄。: 第九章 意想不到的事

我約左阿誠係德村大排檔食宵夜，目的自然係想問清楚佢係咪我地其中一個同伴。將電單車泊係附近既馬路，就徙步行過去。

不過有樣野令我覺得好在意。就係同阿誠講電話既時候，佢表現得好冇精神，而且講野既語氣同以前唔同哂，感覺就好似變左另一個人咁。

好快我就泥到德村大排檔。門口前面，阿誠著住件黑色皮革，頭髮亂到好似成拃芽菜咁，個樣又冇泥精神，成個道友咁。

我上前，問︰「阿誠你搞乜泥？」

佢望住我，對眼既黑眼圈大到好似一個充滿負能量既吸盤，彷彿將我既能量都可以吸得一乾二淨。





「冇野，呢排唔夠訓姐。」佢係咁答我。

我地坐左係其中一張露天既檯，位置都幾角落，所以唔怕我地講既野比人聽到。

一坐低叫左幾枝青島，幾碟撚手小菜，然後就同佢講起炸雞之神同我講既所有內容。

佢聽完只係不斷點頭，完全冇任何震驚既情緒。幾碟小菜到左，佢開始自己猛咁夾餸，連回應都唔比我。

我有啲唔耐煩，問佢︰「點解你咁冷靜？唔通你唔覺得成件事好不可思議咩？」





佢繼續無視我，我開始有啲火氣，一手捉住佢夾餸既手腕。

突然佢怒睥我，用一種好惡既語氣講︰「行開！」

我比佢既舉動嚇窒左，以往我認識既阿誠，絕對係唔會咁架。事情一定唔簡單，我有必要調查阿誠性格大變既原因係咩。

我放低手，諗住借啲意行開暗中觀察，於是同佢講︰「阿誠，我去個廁所先，好快返。」

佢依舊都係唔理我，我行去大排擋對出馬路既暗角，暗中觀察住阿誠既一舉一動。





就算我行開左接近兩個字，佢始乎都唔係太在乎。而令我驚訝既係，佢竟然可以一個人食哂兩份小菜既份量，呢個係幾咁驚人既食量呀。

而接下來發生既事，更係我呢生人最意想不到既事。

阿誠見到我地張檯已經冇哂小菜，竟然大膽到去夾隔離檯既餸。隔離檯坐左成8個男人，個個隻手都紋哂身，有幾個又望上去大大隻咁，一睇就知來頭唔簡單。

個幾個人一定以為阿誠挑釁緊佢地，於是其中一個大嗌一聲︰「喂！乜撚野事呀？」

佢捉住阿誠衫領，正想一拳打落去之際，阿誠居然單手接住拳頭。