因為炸雞店一次意外，我變成了超級英雄。: 第十二章 伙伴

新聞報道緊琴晚係德村大排檔發生既兇殺案，死者就係個三個男人再加一個警察，據了解個警察頭部撞向警車導致腦出血死亡。

城市接二連三發生恐怖既事，先係帕特修斯係醫院食人並大肆破壞，然後就係阿誠係德村大排檔向市民進行大屠殺。雖然我知道佢地兩者一定有微妙既關係，但唔知情既政府認為兩宗事件係唔存在關聯。於是佢地就係冇任何資訊既情況決定發出戒嚴令。

城市再次被恐懼包圍，更多既人開始離開呢個城市，住係我隔離既鄰居日日話唔敢出街，又抽住成大拃即食罐頭返泥，搞到好似要準備係深山避難咁。

阿誠自然被全城通緝，自從個晚之後，我亦都聯絡唔到佢，想求證都冇辦法。但唯一確認既，就係阿誠似乎唔可以定義成係我既伙伴。

我又憑住記憶記返起當日意外發生時候既當值同事，除左阿誠同阿光，仲有個MK仔阿鋒。





個條咁既死MK我同佢平日都唔會有超過兩句野講，我除左問佢幾時出糧之外，幾乎都唔會搵佢。

但依家情況特殊，我難不免都要放下成見，拎起個電話打比佢。

「嘟…嘟嘟…喂，邊個？」電話另一面接通。

「佐治呀，有啲重要事要搵你。」

「嗝~喂我依家隊緊酒喎，陣間先打比你，拜拜。嗶。」佢就咁直接收左我線。





佢唔會打返比我，呢個係我對佢既認知，所以就算呢條友真係得到個種能力，我都唔認為佢可以幫到咩手，搵佢真係傻。

我𢲷爆頭，除左呢幾個人，我點解就諗唔起個個時段有咩人呢？原來我平時係咁少關心身邊既人嗎？可惡！

就係我唔知點做既時候，電話突然響起。

我拎起電話望望聯絡人，來電既人係馬寶琳，係發生意外個間炸雞店既其中一個員工。

我即刻聽，道︰「喂？」

「係咪麥佐治？」

「我係，搵我咩事？」

「我有啲事想搵你，不如我地出泥傾？」

搵我？真係令我意想不到，我記憶中既馬寶琳係一個宅女，平日都好少同人有交流，點解會突然之間搵我呢？唔通，佢都係個場意外入面既其中一個？但就算係咁，點解佢識得搵我呢？睇泥今晚要同佢好好傾下。

「好，無問題，咁我地一陣兩點係觀光道個間意大利餐廳見面？」我即刻約佢出泥，問個究竟。

「好。」佢覆。

我地約好時間地點就收線。

我望一望時間，依家係晏晝12點。我換好衫，稍為整理下個髮型，就出門見馬寶琳。