[少甜][愛情][校園][真人真事改編] 自從我爸爸過左世，我遇上左佢: 2

「hi...我返黎啦。」我急急腳想走去沖涼，但...
「咪走住，嘻嘻，你應該知道你答應左auntie啲咩架可，小希希。」楊夢兒用一個好可怕既眼神望住我
「你...你想點啊楊夢兒。」我完全唔明佢想做咩。「無咩既，如果你想我幫你講次大話扼auntie，你就答應我以下既野。」
1. 以後唔准再叫我楊夢兒，要叫我夢兒姐姐或者姐姐
2. 每一日返學放學都要等埋我，周末出街除非有特別理由如果唔係都要同我一齊
3. 每個禮拜都要抽時間同我温書做功課
4. 唔可以對我發脾氣
「如果你答應我呢啲野，我保證每日你都可以打波打到呢個時候而auntie唔會知。」無錯... 佢威逼利誘我。
身為一個有骨氣既男人，我當然，會答應。冇錯，我既惡夢就係咁樣開始。
而楊夢兒亦都講左大話幫我過阿媽嗰一關，只係我都付出左相應既代價。





「早晨啊希希。」楊夢兒一早已經換哂校服喺度食早餐，而我先岩岩起身。
「早晨啊楊... 姐姐。」差啲嗌錯左既我楊夢兒用一個殺得死人既眼神瞪左一眼。
「乖~快啲刷牙食早餐啦，我地仲要一齊返學架。」佢既語氣温柔得黎又好似特登強調我地既條例咁，驚死我唔記得。\
廢事遲到，所以我好快咁梳洗完就拎塊面包同夢兒姐姐行番學。
由於夢兒姐姐喺學校好出名，令我返學嗰時一直都覺得啲人講緊我地。
我地成程都冇咩點傾計，返到學校之後各自返自己既課室。
雖然我唔鐘意讀書，上堂日日訓教，放學又唔會做温書，但小學啲野真係智商測試黎，好鬼死簡單。
啲老師同學唔知點解都好唔鐘意我，我有諗過係咪我太摺，但老實講比較似係我唔鐘意佢。
成班都好鬼低能，玩埋啲野又智障，講埋啲野又無鳩聊，所以好多時我都係訓教算。





放學之後因為約定，我冇得衝返屋企再去打波，而係要等埋夢兒姐姐。
去到6B既班房，我發現夢兒姐姐真係好受歡迎，無論男女都捉住佢係咁傾計。
「啊，我細佬等緊我，我走先啦。」夢兒姐姐見到我就揹住書包去我到。
屌，邊個係你細佬啊。當然我冇咁講出黎。
我地一路咁樣行返屋企，經過一間面包店嗰時佢入左去買野，我就喺外面等佢。
佢拎住一盒野出黎。「咩黎架。」我好奇咁問佢
「係蛋撻啊，我見你今日咁乖，買黎獎勵你架。」呢一刻，佢簡直就係我世上最愛既姐姐。
我地返到屋企之後就拎蛋撻出黎，一人一個食左佢。
「多...多謝夢兒姐姐。」我唔係幾好意思咁講。「乖乖希希，你鐘意食既我之後再買比你食啊。」佢摸左下我個頭




「好啊!」我好開心，係真係發自內心咁開心。 
之後我換完衫就出左去打波，臨出去之前夢兒姐姐提我唔可以咁遲返。

今日既球場比平時多好多人，不過我同班阿叔照樣都係霸住成場黎打。
基本上真係無咩人打得過我地，除非我地唔想打。
偉哥既身高，籃底根本冇人打得過佢，更加唔講佢既技術本來都屌打唔少人
不過我今日既手感仲可怕，我咁既身高其實冇咩可能有wide open 射，但今日啲fadeaway 完全冇人mark到
每一球都穿針入哂咁濟，啲高中生都比我打到o哂嘴。
當然，班阿叔就覺得呢啲都係正常事，始終佢地都已經習慣哂。
打爆哂所有人之後我就準時咁返屋企。

補上: 希希小四既身高為 148cm