[少甜][愛情][校園][真人真事改編] 自從我爸爸過左世，我遇上左佢: 22
返到屋企，空無一人。
兩位媽媽都照舊未返黎，夢兒姐姐應該喺房到。
已經兩日冇見過夢兒姐姐，到底佢諗緊咩?
「夢兒姐姐，我返黎啦。」我照樣都嗌左聲先。
「夢兒姐姐，其實你喺唔喺到架?」
「你可唔可以出句聲應下我?」
「我真係想知到我錯左啲咩架，你可唔可以話我知啊?」
叫左好耐，都係冇應到我。
唉，我真係盡左力架啦。
我仲有啲咩可以做啫? 唔通真係爆開佢間房? 冇可能。
我都係去左沖涼先，然後喺張床到繼續等，睇下夢兒姐姐會唔會開門。
一路等，終於聽到有一下「啪」既聲。
我即刻衝去開左對門。
打開對門，果然夢兒姐姐岩岩出左黎。
「夢兒姐姐!」眼前既夢兒姐姐，雙眼腫到前所未見，頭髮凌亂，真係好頹。
我衝左過去，攬住左佢，唔想佢再離開我。
「對唔住... 對唔住... 求下你唔好唔理我啦。」我攬住夢兒姐姐講。
眼前既夢兒姐姐唔知經歷過啲咩，但我個心好痛。
到底點解佢會變成咁，係咪因為我?
我真係好努力回想自己做過啲咩，我真係唔知。
「放...手。」瞳孔已經冇左任何色既夢兒姐姐，輕輕咁講。
「我唔放啊，你話比我知啦，我真係好辛苦啊，到底我做左啲咩啊? 我一定會改架，我唔想再見到你咁啊。」我就黎喊。
「唔好咁... 我已經好辛苦，你知唔知我呢幾日喊得有幾辛苦。我求下你，你放過我啦。」夢兒姐姐既眼淚好似泉水咁湧出黎。
「你比我幫下你」
「你幫我唔到。」
「點解啊!我有咩幫你唔到。」
「咁你係咪會同詠兒分手啊!」
空氣即刻變得勁安靜。
「咩...咩...分...咩...咩意思?」
「我話! 咁你係咪會同詠兒分手啊!」
「關...關詠兒姐姐咩事。」
「我鐘意你啊! 但你鐘意詠兒啊!」
夢兒姐姐講完之後繼續喊，喊得仲勁，成個人震哂。
呢一刻既我好亂，腦海浮現哂夢兒姐姐同詠兒姐姐既片段。
同夢兒姐姐一齊好開心，同詠兒姐姐一齊都好開心。
我揀唔到... 我好自私... 我兩個都想同時有哂。
「我明架... 你會揀詠兒我明架... 我有逼自己接受架... 同我做唔到啊!」夢兒姐姐震住咁講。
可能係沖昏頭腦，我向前將哭成淚人既夢兒姐姐攬住左。
「夢兒姐姐... 對唔住。我冇可能同詠兒姐姐分手，但我，都鐘意你啊!」我喺夢兒姐姐耳邊輕輕咁講。
「我明白架希希，我都鐘意你啊，我有你呢份心意就夠架啦。」夢兒姐姐喺我懷裡講。
我地就咁攬住左好耐，起返身之後我陪夢兒姐姐返左佢間房。
突然醒起嗰時個音樂盒同張卡，我即刻去間房到拎左去比夢兒姐姐睇。
「你幾時買架?」夢兒姐姐個樣好驚訝。
「咪就係你唔理我嗰日囉。」我諗起都有啲唔開心。
夢兒姐姐睇到張卡之後，佢又再次喊。
「你做咩喊啊。」我有啲驚。
「我感動到喊啊!! 我冇諗到自己嗰時咁樣嬲你，你仲咁樣哄我，我仲望都唔望你一眼!! 傻豬，下次
唔準哂咁多錢啊! 你睇你，連價錢牌都唔記得搣!!」夢兒姐姐講到後面哭笑不得。
「為左哄你開心，幾多錢都值得架。」我用手幫佢抹眼淚。
「係咪真架?」夢兒姐姐問。
「當然。」
「咁信裏面個內容呢。」
「都當然係真架啦。」
「咁一言為定架wo，你到時一定要帶我去坐旋轉木馬架!」
「一言為定。」
之後我喺佢床邊陪左佢好耐，到佢訓着左我先至返房。
臨返房之前，我喺訓着左既夢兒姐姐嘴邊鍚左佢一下，輕輕咁講:「我愛你啊，夢兒姐姐。 」
攤喺張床到，我諗緊，到底我係咪真係鐘意詠兒姐姐?
我又係咪真係鐘意夢兒姐姐?
到底咩係鐘意? 咩係愛?
我係鐘意詠兒姐姐，定愛詠兒姐姐?
我又係鐘意夢兒姐姐? 定係愛夢兒姐姐?
佢地都係我生命中最重要既人，我唔希望失去佢地任何一個。
第二朝起身，今次唔再係鬧鐘叫我，係久違既夢兒姐姐叫醒我。
另外仲有樣令我好開心既野，今日終於係星期五啦!!
「希希，起身啦，懶訓豬!」夢兒姐姐喺我面前，好幸福啊。
「早晨夢兒姐姐!」刷完牙之後我地久違咁一齊食早餐。
可能係太耐冇講野，我地都好似有啲尷?
但呢餐早餐都食得好開心。
之後我地又一齊返學，好耐都冇試過同夢兒姐姐一齊返學。
明明以前會覺得呢啲係必然既事，唔會太在意。
宜家反而會好好享受呢啲時間。
好唔捨得咁道別之後就返左自己班房。
同夢兒姐姐好番之後，感覺上好似放低左心頭大石咁。
但同樣地，又有另一個問題衍生左出黎。
我應該點樣去面對詠兒姐姐?
我好內疚，感覺自己好似欺騙左詠兒姐姐咁。
明明自己同佢拍拖，但內心又鐘意夢兒姐姐。
唉，好討厭咁樣既自己。
就喺我沉思緊既時候，隔離條7頭拍左我幾下
「話說其實你平時係點樣練波架。」梓軒問。
「下，我冇特別點練波架wo。」我托住頭咁答佢。
「咁你到底點樣變到咁勁架!」佢突然有啲激動。
「我真係好想變勁啲啊，我都好想有咁多女粉絲啊!」佢繼續講。
「屌! 我都唔撚係為左女打波。」我都懶得理佢。
「不如你教我打波啊! 你平時練波叫埋我去啊!」佢雙眼發光咁。
「是旦啦是旦啦，你咪煩我。」我合埋對眼唔想理佢。
「咁我當你答應我架啦小王子!」佢好似好開心。
正一低能仔。
小息嗰時詠兒姐姐黎揾我。
意外地，夢兒姐姐好似都接受左詠兒姐姐，所以同佢講番野。
換而言之，我今日晏畫又冇人同我食。
唉哭撚左。
好快到左晏晝，我食完野冇野做就諗住去籃球場打陣波。
「喂7頭，你去唔去打波架。」我問埋梓軒。
「打! 小王子叫到，我點敢唔去。」之後佢就跟左上黎。
晏晝我唔想出汗，所以我都係喺球場到插左陣花，之後射下波咁。
到底係咩事... 我只係打陣波，周圍已經坐哂成班女。
「小王子，你知唔知佢地全部都係黎睇你。」梓軒喺我耳邊講。
「屌你打波就專心啦。」講完我就入左球穿針三分。
發現傷左之後反而手感越黎越好，啲三分好似唔識炒咁。
食完飯既牧楓同佢既嗰班fd黎左同我地打。
我地分左兩隊，我同梓軒加一個高form一隊，對面就係牧楓同佢兩個friend。
平時打開街場都係獨食既我，每一球都係單打。
牧楓主動黎守我。
我in face 左佢兩球三分，之後佢貼近左之後又比我一步過左，入到內線，面對補防我黎左個招牌拉杆上籃。
梓軒示意想打番球，點知佢拉左少少空間射左球中距離，但炒左。
我都懶得拎籃板，到牧楓示意要單打我。
我又點會比佢拎分，佢一直crossover都過唔到我，仲自己甩埋波。
我一拎到波就比佢地開始double team待遇，大佬，休閒籃球咁樣對我。
我唯有傳左比空位既梓軒，今次佢好生性咁入左球。
之後成個Lunch time我都唔想打，佢地就一直double team我，我唯有比梓軒打。
不過佢都有番咁上下實力，基本上都有入波。
你問我double team就打唔入? 唔係，只係唔想打啫。
「你個friend都幾有料。」牧楓行埋黎同我講。
「ok啦，你同我練多啲波啊，學界咪撚雷我。」我冷冷地說。
「你個細路咁鬼串。」牧楓講笑咁講。
「鬼叫我勁。」我都講笑咁講。
講真，本來我對牧楓係幾反感下，但後來發現佢份人其實唔差，係自尊心好強。
打完波就返左上去班房唞下，準備上堂繼續訓。