【校園／愛情】戀上鄰家女孩（布甸篇）: 1. 追女生要約吃飯

「你知唔知道，《牧羊少年奇幻之旅》呢本書有講到，當你真心渴望某樣嘢嘅時候，全個宇宙都會聯合起嚟一齊去幫你實現。」眼前呢個扎住柔長直馬尾嘅女仔，趷高腳拍拍我膊頭同我講，聲線清脆悅耳。 

「咁係咪你都會嚟幫我？」我望住佢嗰對水汪汪嘅大眼睛。 

「嘻嘻，咁睇你係咪真係咁有決心要追到曉琳喇。」 

佢雙手翹喺背後，側頭仰望住我。經過升中四呢個暑假之後，而家我差唔多比佢高一個頭有多，仲記得當年中一我哋啱啱認識嗰陣，佢仲笑我矮佢2cm。 

「喂，陳佑男我話你知啊，如果你唔係認真鐘意佢嘅話，你就唔好追人哋喇，如果俾我知你傷害佢嘅話，我實唔會放過你㗎！哼哼！」 





「知啦知啦！」如果牧羊少年真係正如你所講，咁即係黃子瑜你都會一齊幫我去追曾曉琳㗎可？不如你再俾多啲意見我，教我點樣可以追到曉琳。 

「係呢，咁你一陣Lunchtime有無約人啊？」我接住問。 

「無啊！約我你就敢，約佢就咁細膽。」子瑜鼓起兩邊腮，嬲爆爆咁睥咗我一眼，然後就轉身返入佢間班房。 

「咁一陣間課室門口等你喇！」雖然子瑜並無親口應承我會一齊食晏，但我知道佢個表情已經等於答應咗，於是我亦都轉身入返自己課室。 

嗯，呢個叫黃子瑜嘅女仔，同埋我暗戀緊嘅曾曉琳，由中一開始，我哋三個已經係同班同學，直至去到中四分班揀科嗰陣，子瑜堅持讀佢鐘意嘅文科，而我同曉琳就隨波逐流入咗理科繼續同班。 





至於我幾時開始鐘意曾曉琳？就係上年中三陸運會前嗰排，我哋三個經常約埋喺運動場練跑，曉琳同子瑜兩姐妹糖黐豆咁，成日要我幫佢哋計時，我喺後面望住曉琳跑步個背影，一個唔覺意就俾佢攝走咗個靈魂。 

返到課室坐低，小息鐘聲再度響起，教Bio個鍾sir簡直同催眠師無分別，佢習慣每次上堂先播十分鐘理論片，但唔知道佢有無諗過，成間課室熄晒燈，剩返個螢幕響度微微發光嘅昏暗環境，從生物學角度嚟講，呢個時候腦內嘅褪黑激素分泌會增加，好自然就會想瞓覺。 

正當我意識開始進入模糊狀態嗰陣，冷不防有把男仔聲喺我耳仔邊招魂：「唉，自從分咗班之後就無得同黃子瑜一齊上堂…」

介紹返先，坐我隔離嘅呢個鄒家樂仲叻，佢對住個螢幕手指指咁扮同我討論劇情，實際係細細聲撩我傾偈，等老師仲以為我哋睇得津津樂道。 

「隔咗個暑假無見，佢依然無長高過，都係咁可愛…」但你知唔知自己響度吟吟沉沉，好擾人清夢㗎？點知佢仲雞啄唔斷咁繼續講落去： 





「喂！你頭先同黃子瑜傾啲咩啊？你個死仔包，咪扮瞓覺唔理我…」 

「咪咁八卦，專心上堂啦。」我無佢咁好氣，更何況開咗學個幾禮拜，日日聽住佢講黃子瑜已經有啲煩嫌… 

「唓！你咪又係響度恰眼瞓。」鄒家樂即刻窒返我轉頭。 

我仲記得上年陸運會嗰排，鄒家樂嬲我無叫埋佢嚟一齊練跑，話我一個人約兩個女仔係獨食難肥，而家我更加唔會話俾你知，頭先我同子瑜傾緊點樣追曾曉琳。 

一諗到曉琳，我視線又不自覺咁聚焦向前，搵緊坐喺最前排個女仔嘅身影，佢而家全神貫注咁望住螢幕，但又一路撩緊自己條微捲馬尾，再加上佢條白𠽌𠽌嘅後頸，點解我仲咁傻仔響度瞓覺，完全浪費晒眼前呢片良辰美景。 

「坐最後排嗰兩個男同學，唔好再傾偈喇吓！」嗱家樂你係咪衰呢，任你再高明都係逃唔過鍾sir法眼。 

剎那之間，曉琳向後回望我同家樂，咁啱俾佢撞到我都望緊佢，我哋兩個你眼望我眼，然後佢擺出一副鬼臉，似係怪責我上堂唔留心聽書，然後嫣然一笑又擰返轉臉。 

曉琳呢一下驀然回首，個畫面一直喺我腦海裡面揮之不去，鍾sir喺度教緊啲咩，我已經唔係好聽得入腦，鄒家樂喺我旁邊繼續問我黃子瑜點點點，我都懶得理佢，直至到期待已久嘅食飯鐘聲響起…