【校園／愛情】戀上鄰家女孩（布甸篇）: 8. 糖果屋的小逆襲

「吓…秘密？」冷不防俾曉琳咁樣一問，嚇到我措手不及，唔通佢發現咗啲咩？ 

我腦海隨即閃過知道我鍾意曉琳嘅，只係子瑜同埋家樂兩個人，我相信子瑜唔會爆俾曉琳知，而子瑜亦都話佢信得過家樂份人，咁我都信得過嘅… 

「哈哈，無呀。見你同子瑜兩個最近走得咁埋，仲唔係喺度傾咩秘密。」曉琳笑道。 

「邊有啊！佢今日約咗鄒家樂去睇戲啊，佢兩個就真係走得埋喇。」我見有空隙，趁機將個波推俾家樂先。 

「哦哦哦，啫係有人妒忌緊喔，我話俾子瑜聽先。」但見曉琳雙手前後前後咁擺動，個步姿好可愛。 





「黐線我點會妒忌…」做咩我反應會咁快嘅。 

「唔使怕醜喎，我可以幫你追子瑜㗎，你條件好過家樂咁多。」曉琳揮拳一下打落我手臂度，感覺唔到痛，因為我已經開始理解唔到發生緊咩事… 

我鍾意緊嘅女仔，啱啱同我同講可以幫我追一個，教緊我點樣追佢嘅女仔…吓？咁咪即係曉琳以為我鍾意嘅人係黃子瑜？ 

天大嘅誤會啊… 

今次我真係有口難辯，唔通直接同曉琳講，我鍾意嘅人其實係你，雖然聽到佢講我條件好過家樂，係有種莫名嘅開心，都唔代表可以即刻表白㗎。 





「咦？我哋唔係去文具鋪咩，做咩嚟咗呢度嘅？」我見曉琳帶我行行吓，竟然去返尋日同子瑜去過嗰間舊式糖果鋪，而我就乘機轉移話題。 

「我想買返盒糖送俾子瑜啊，因為佢尋日放學嗰陣，送咗筒朱古力糖俾我。」曉琳說。 

「不過呢，唔知邊個送咗支布甸狗波板糖俾佢囉，咁知佢心意，知道佢鍾意布甸狗，搞到我都唔知揀咩俾佢好。」曉琳續道。 

正當我暗地裡慶幸，曉琳無再斟酌喺上一個話題度，可以平平安安咁買完糖就算數，但佢啱先嗰兩句說話，分明就係懷疑緊送布甸狗俾子瑜嗰個人就係我。 

我開始感覺到，曉琳叫我陪佢出嚟買壁報板紙嘅真正原因。 





然後我留意到老闆娘陰陰嘴笑緊嘅表情，睇怕佢記性都有返咁上下，一陣間如果俾佢揭穿我就大件事，所以我覺得而家最好都係唔好輕舉妄動… 

「咁…唔送布甸狗都仲有其他選擇㗎嘛。」我只能夠繼續嘗試避開鋒芒。 

「子瑜份人好從一而終㗎，你又唔係唔知道，佢個布甸狗銀包由form 1用到而家都仲用緊。」曉琳回應道。 

咁呢層我都知嘅，但係唔知個銀包同揀糖有咩關係呢？ 

「喂吔，你幫手諗吓呀。」曉琳雙手篤住手指，兩邊臉珠墩漲起咗好可愛。 

「一係送朱古力？女仔通常都鍾意食朱古力。」但霎時間我都係無咩好主意。 

「咁求其㗎你，子瑜已經送咗朱古力俾我，我唔可以抄佢㗎嘛。」睇見曉琳著急個表情，我忽然間醒起我應該要認真啲幫佢諗，咁先可以喺佢面前留個好印象。 

「啊！我諗到，曉琳你跟我嚟啊。」我大踏步離開糖果屋，同時唔使再擔心老闆娘突然間爆我尋日同另一個女仔嚟過呢度。 





「我哋去邊啊？」曉琳一直跟住我後面。 

「好快你就知㗎喇。」我已經可以想像到，當子瑜見到呢樣野嘅時候個興奮表情，肯定俾起布甸狗波板糖，有過之而無不及。 

我哋穿過商場電梯嚟到最頂層嘅美食廣場，呢個美食廣場係由十幾間小食店組成嘅，而唔係大型商場嗰種food court，只係得啲連鎖餐廳俾你揀嗰種。 

放學時段呢度早已經多人到水洩不通，我帶住曉琳一直向住目的地進發，但擠擁嘅人群逼使我同佢只可以勉強一前一後咁行。 

我周不時轉身向後確保曉琳無跟甩我，有次差啲撞到前面揸住杯珍珠奶茶嘅路人，好彩我機智及時避開，今晚先唔使踎喺廁所裡面洗校服。 

經過呢次險象環生嘅場面，曉琳叫我唔使再轉身望佢，專心向前行就可以，但我始終有啲唔放心，只係行咗兩步之後，我感覺到有人輕輕咁扯住我左手襯衫衫袖。 

然後我聽到曉琳細細聲喺我背後講：「你行啦，我會跟住你。」四周圍途人嘈吵嘅聲音，幾乎掩蓋咗曉琳悠揚悅耳嘅聲線。 





而家嘅我只需要專心一致向前行，我個衣袖角有時俾佢扯到一時鬆一時緊，我就藉此調整返自己步速，同時間我都留意到，耐唔耐就會有啲男仔借啲意向住我哋個方向望過嚟，斷估都唔會係望我，肯定係望緊曉琳，偶爾仲會撞到幾個同校高年級嘅師兄。 

旁人羨慕嘅目光不斷，令我不自覺地沉醉咗喺呢種虛幻嘅世界裡面，係咪所有人都妒忌緊我同曉琳一齊行街街買嘢食呢？ 

之但係！乜我哋本身唔係要去文具鋪做正經野㗎咩，點解變咗好似同佢拍緊拖咁嘅？