成個星期日日陪住曉琳整壁報板幾乎不問世事嘅我,到今日曉琳請咗病假無返學,先至有時間去望吓子瑜整嘅壁報板係點嘅樣。而當我見到子瑜同家樂兩個埋頭苦幹嘅時候,第一刻嘅感覺係佢兩個似難兄難弟拍硬檔,多過享受緊咩嘢二人世界。

小息過後,我同家樂又返埋位坐低,呢短短十五分鐘佢已經做到汗流浹背。

「你哋仲差幾多啊?」今次我所講嘅你哋,真係出於關心,無揶揄嘅意思。

「應該趕得切嘅...」家樂拆開包紙巾抹走額頭上面嘅汗水,原來佢仲拎埋疊顏色紙返嚟喺櫃桶慢慢剪,剪緊咩圖案我就真係睇唔出,但多數都係子瑜啱先吩咐落嘅。

「咁點解咁趕嘅?」



「子瑜無同你講咩?佢哋班為咗個壁報板嘅主題嘈到反面啊!」趁下堂老師仲未嚟,家樂繼續耷低頭喺度埋搞佢啲勞作。

「吓?點解嘅?」

「係咁嘅,一開頭有幾個女仔想用咩…銀河鐵道之夜嚟做主題,但係子瑜想做…牧羊少年奇幻之旅,原本諗住全班投票決定做咩主題,跟住有一日呢,嗰班女仔趁子瑜唔喺度,偷偷地開始釘底紙…唉咪就係我約佢去睇戲失敗嗰日囉...」

其實咩銀河鐵道之夜我都聽唔明,但當講到牧羊少年奇幻之旅,我個心打咗個突,而家樂又繼續講落去。

「第二朝子瑜返到班房,見到塊壁報板已經釘晒底紙,子瑜睇唔過眼,覺得班女仔出爾反爾,明明應承咗投票決定但又搞小圈子,跟住仲同嗰幾個女仔嘈交,最後有個女仔發晦氣話:『黃子瑜!你咁巴閉咪自己做晒去囉!』,弊在子瑜又真係同嗰個人鬥氣,攬晒啲嘢上身自己做。」



傾咗咁耐老師都仲未嚟,身為班長嘅我理應要落去教員室搵老師,但一來我想繼續八卦落去,二來我都想俾家樂有多啲時間剪顏色紙。

「咁嗰幾個女仔又係咩人嚟?」

「我認得個樣,但噏唔出名,我又費事問啦,不過好似中一同你同班。」

聽完之後我忽然有啲頭緒,於是我粗略咁描述吓分別嗰幾個女仔嘅樣貌俾家樂認人。

「係呀,咪就係呢個...」家樂逐一咁幫我認晒佢哋。



咁唔怪得啦…呢幾個同子瑜嘈到反面嘅女仔,以我所知今年都係讀Visual Arts嘅,不過佢哋嘅八婆指數就遠超過我哋班嗰幾朵金花。

「同埋佢哋好似本身就唔妥子瑜,之但係佢哋個班主任又剩係識欽點啲讀Visual Arts嘅同學整壁報板,唔知佢哋其實火星撞地球。」家樂續道。

啱啱升上高中,好多班主任都未摸清楚班裡面嘅私人恩怨,而我就好清楚子瑜因咩事同嗰班女仔結怨,但數數下都差唔多成三年前嘅事,估唔到佢哋仲會懷恨在心。

「Good morning class!」忽然間一把懶係高貴嘅女聲響遍整個課室,嚇咗我一跳,我掛住同家樂傾偈完全無為意到英文老師Miss Lau入咗嚟。

家樂同樣聞風喪膽,即刻㨃晒啲嘢入櫃桶起立敬禮,我見佢咁狼狽實在又有啲於心不忍。敬完禮之後,家樂都唔敢再掂櫃桶入面壇嘢。

「唉,睇嚟今日真係連Lunchtime都要留喺度整先趕得切。」家樂嘆道。

「If you speak, please in English.」Miss Lau嘅英式口音總係有種暗串緊你嘅感覺,而佢對耳仔又出咗名特別靈敏,我哋坐到最後排佢都依然可以聽到家樂講嘢。

「咁我go buy lunch for you啦。」我輕聲向住家樂安慰說道。
已有 0 人追稿