【校園／愛情】戀上鄰家女孩（布甸篇）: 28. 留給我的這滴淚

「嗱，如果你病咗嘅話，唔可以賴我㗎。」曉琳含羞答答咁望住我，兩邊面珠墩紅到好似個蘋果，但係仲有粒淚珠掛咗喺佢眼角上面，個樣好惹人可憐。

我不由自主伸隻手指出嚟，對準個位置，就住度力，好溫柔咁幫佢抹走滴眼淚。眼睛呢個靈魂之窗咁敏感嘅部位，曉琳都無縮開到，由得我幫佢抹走嗰滴眼淚，係信得過我先會咁放心...

曉琳滴淚水就係咁沾咗喺我手上面，好想舔落肚...當留個紀念。

唔～鹹鹹地又幾好味...

「你做咩舔我啲眼淚啊，黐線佬啊...」曉琳嫣然一笑過後，又多咗滴淚珠從眼眸裡，滴咗落佢條白𠽌𠽌嘅校裙上面，濕咗一撻。





「唔係啊，我想咁樣好好記住，以後唔會再整喊你。」我仲想舔埋曉琳條校裙上面嗰撻眼淚。

「係至好講啊，你做咩係咁望住我啊？」曉琳雙手抱住膝頭坐喺地板度，嚴格上嚟講我哋兩個對腳嘅擺位已經係去到互相交纏嘅地步，曉琳所散發出嚟陣陣嘅少女體香周不時刺激住我嘅嗅覺，而我哋之間個距離大概係只要互相哄埋就應該可以錫到對方。

不過，曉琳咪又係同樣含情脈脈咁望緊我。

我都已經懶理有無人會突然之間喺呢個時候行入課室咁唔識撈，呢刻我都唔想郁，只係想維持現狀同曉琳互相對望，佢對水汪汪嘅大眼睛真係好靚，啲眼睫毛又長又自然，越望我個心就越舒暢，仲有股衝動想錫佢。

「曉琳...我可唔可以...」我嘗試靠腰力支撐着身體嘅傾前幅度，慢慢哄埋去。





「唔俾啊～」曉琳伸手揞住我個嘴，唔俾我再向前，於是乎就係咁我就錫咗落佢手掌心度，雖然比唔上曉琳嘴唇嘅軟熟，但都係另一種享受。

「一日只可以錫一次。」曉琳扁扁嘴，用教訓小朋友嘅語氣對住我講，我就係嗰個挫敗嘅細路仔。喂咪住先？咁講咪即係可以日日都同曉琳錫錫？

我呢啲細路仔百厭係天性嚟㗎嘛，駁嘴就梗㗎啦。

「不過今日例外，要紀念下。」我嘟起個嘴瞇埋眼，期待住曉琳再錫落嚟。

我憋住呼吸，空氣靜止咗兩秒鐘...





然後我好快又感受到另一次同曉琳嘴唇碰觸嘅快感，雖然今次只係一下蜻蜓點水，但係我早有預備，諗住曉琳錫落嚟嘅時候，我就即刻擘大眼，咁就可以近距離望多次佢錫錫嗰陣個怕羞樣。

點知我一擘大眼，見到嘅係曉琳用食指同中指平排打橫咁扮嘴唇，當俾我發現咗就即刻縮開隻手。

可惡啊...估唔到原來你先係最百厭嘅細路女。

「錫咗喇～」曉琳仲要笑住咁講大話，曉琳笑嘅時候特別靚女。

不過我都唔會咁輕易就失望嘅，話晒而家可以同曉琳匿喺課室裡面打情罵俏，我諗都夠我開心成晚，而且曉琳話過一日可以錫一次㗎嘛。

「曉琳...」

「嗯？」

「你病咗都專登返嚟搵我咁好嘅？係咪掛住我...」原來甜蜜感覺係會沖昏頭腦，講嘢唔覺意仲放膽咗，誰不知曉琳又再一下搣落我手臂度。





嘩！痛！辛苦你啦手手…

「你就想喇，我返嚟係要去開會啊，藍社嗰邊啊。」我又諗起嗰個藍社社長，不過我而家應該要對自己有返啲信心。

「你病咗就唔好返嚟嘛，睇咗醫生未㗎？好返啲未？」

「咁我應承咗佢哋嘛，所以點都要返嚟...同埋，我未好返㗎，因為有人頭先激到我又病病哋，又唔氹返人。」

睇嚟曉琳對於承諾呢樣嘢真係睇得好重，佢應承咗要開會，就算唔舒服都會換埋校服返嚟學校，而且會記得尋日我請過佢食章魚燒，然後專登去買返杯珍珠奶茶俾我飲，話就話我本身唔好呢埞甜到漏嘅肥仔水，但而家就算曉琳買苦茶俾我，我諗都可以化成糖水甜到入心。

「咁陣間我等埋你開完會一齊放學啊？」

「嘻嘻，你唔使等我啦，今日佢哋要開會傾陸運會嘅準備細節啊，我都唔知要開到幾點㗎，你呢...就乖乖地去搵Miss Chan罰留堂啦，睇吓佢今次會罰你寫幾多字悔改書～」





「吓...但係我唔捨得同你分開喎...」雖則我把口就話唔捨得同曉琳分開，但實際我係擔心佢又會俾個藍社社長強行綁架多啲。

「哼哼，第一日就咁口甜舌滑，唔理你喇，我走喇，嗱你杯珍珠奶茶啊，咁一陣...喺雨天操場等啦。」曉琳拎起杯珍珠奶茶直接塞咗喺我手裡面，然後就轉身跑走咗。

我接住曉琳杯珍珠奶茶，又一次目送佢離開我嘅視線範圍，雖然今次呢杯奶茶就一滴曉琳嘅口水尾都無，但係佢嘅珍貴程度...

喂等陣先？曉琳啱先話第一日？咩第一日至得㗎！？