【校園／愛情】戀上鄰家女孩（布甸篇）: 37. 女朋友神秘驚喜

其實到目前為止我都仲未知道今日嘅行程，但見曉琳原來仲有個背囊孭住喺身，相反我就兩手空空，我覺得我有必要盡返男仔風度，於是我主動提出不如交俾我孭。

「唔使啊唔使啊，呢隻色咁女仔，唔啱男仔孭㗎。」

我輕輕睄一睄曉琳個背囊，係薄荷綠色，仲吊住咗隻布甸狗公仔。

布甸狗…？

假期嘅地鐵站人潮如湧，唔使幾個站，四方八面嘅人群將我同曉琳越逼越入，車裡面嘅人想走出去，車外面嘅人就搏老命咁塞入嚟，總之每次停站都要經過一輪你推我撞，曉琳今日打扮咁靚，我擔心容乜易會俾啲麻甩佬乘機抽水。





「啦～啦～啦～」不過曉琳完全無呢個憂慮，佢挨咗喺我懷抱裡面哼歌，有股稚氣不斷散發緊出嚟。

「你唱緊咩啊？」見佢唱得咁開心，我專登伸隻耳仔埋去扮專心聽。

「你估吓吖。」跟住佢又真係哄埋我耳邊，繼續哼佢首歌，唱唱吓仲自己忍唔住喺度傻笑，你個傻妹吖，又會開心成咁嘅，睇嚟早幾日個病都已經好返晒。

有曉琳嘅甜美歌聲伴隨，就算呢程地鐵再逼都好，都唔算得上係啲咩，霎眼間我哋就嚟到中環，我哋順住人潮行到上嚟一座行人天橋。

「估到我哋要去邊未呢？」曉琳搖住我手臂問。





自我呱呱落地以來，我都未踏足過港島呢塊土地，我真係完全無頭緒我哋去緊邊度，但又唔想顯得我成個大鄉里出城咁，好彩呢條天橋每隔兩步就有啲方向牌不斷俾緊提示我。

「長洲？南丫島？」我答，但我統統都未去過。

曉琳擰擰頭：「唔啱啊～」

「咁係迪士尼？」

曉琳又擰擰頭：「都唔啱啊～迪士尼無得搭船去㗎，我哋係去愉景灣啊。」然後笑瞇瞇望住我。





吓？愉景灣？聽個名都感覺到係高尚地方，但諗諗吓又幾合理，配合返曉琳嘅小康家庭背景，斷估佢之前有同屋企人去過。之但係，我連愉景灣喺邊度嚟都唔知。

唔緊要啦，好快我就會知道答案，我同曉琳穿過天橋嚟到中環碼頭，由七號碼頭沿住海傍一直行，經過梅窩、長洲、索罟灣碼頭，沿途有好多大哥哥大姐姐孭住個笨重背囊準備露營，偶爾又會有幾個外國人揸住杯咖啡出沒，又有一對對情侶手拖手準備上船，而我同曉琳就係其中嘅一對小情侶，雙雙嚟到三號碼頭閘口。

望一望個船票價，嘩頂你成四十幾蚊，來回差唔多成舊水，好彩我哋有學生優惠，我終於知道點解曉琳話要預先增值定張八達通。

「點解你八達通有咁多錢嘅？」曉琳笑問。

「因為你叫我增值定先吖嘛，我好聽女朋友話㗎。」我答。

「正傻瓜，咁都唔使入成幾百蚊落去㗎～」

呢刻曉琳笑得好開心，我唔知佢係笑緊我蠢將銀包啲錢塞晒入八達通裡面，定係因為聽到我講我好聽女朋友話而笑得咁燦爛，但係只要佢開心，我就好滿足。

「咁入多啲錢，咪可以請你食嘢。」我自圓其說。





「唔使啊～我準備咗好多食物…」曉琳講到一半即刻雙手揞住自己個嘴，眼仔碌碌咁望住我，佢好似唔小心爆咗個秘密出嚟…

曉琳眼神開始流露出失望嘅表情：「啊…唔講得㗎，唔講得㗎，講咗就會無驚喜。」仲垂頭喪氣咁扁晒嘴。

「傻瓜嚟嘅，我都唔知有咩食物，放心啦，個驚喜仲喺度。」我摸摸佢頭髮安慰佢。

「咁陣間去到公園草地嗰陣，你要扮唔知道有食物㗎。」曉琳依然扁緊嘴，撒嬌道。

啱啱曉琳係咪唔小心自爆埋我哋今日個拍拖活動？

「公園草地？原來我哋今日係去野餐啊？」我唔係故意逗佢，但又真係忍唔到口。

「喂吔…」好喇好喇，望住曉琳楚楚可憐嘅表情，叫我仲點忍心再刺激佢。