「無啊,最衰都係我懶瞓啦,原本較咗七點半鬧鐘,但我拖到八點先落到街買餸,搞到之後趕頭趕命,我化妝又慢晒咗好多時間,結果要你喺地鐘站等咗我咁耐,而家個飯團又散晒,我無樣嘢做得好,對唔住啊...」

曉琳你正一傻瓜嚟㗎...

你付出咗咁多,但就剩係記住自己做得唔好嘅地方,仲不斷喺度自責,自從食物盒打開之後到而家都係皺住眉頭扁晒嘴。相反我瞓到十點先落床兼且兩手空空無所事事,我根本就無資格去恥笑你所花嘅心思。

「傻瓜嚟嘅,唔使講對唔住啊,下次可以叫埋我一齊準備吖嘛,你一個人整咁多嘢食會好辛苦。」

「唔辛苦啊,早幾日你又陪我睇醫生,返到屋企傾電話傾到我瞓著咗,你都無收線陪住我,你對我咁好所以我想搵個機會好好報答返你。唉...都怪我煮嘢食唔叻,我媽咪話過㗎,女人要留住男人個心,就要首先學識點樣留住佢個胃。」



明明嗰晚我因為子瑜而cut咗曉琳線,明明曉琳瞓著咗嗰陣我個腦一味回想返同子瑜嘅片段,反而曉琳仲親自下廚報答返我,調返轉頭我都覺得自己有啲慚愧。

「咁男朋友對女朋友好係天經地義嚟㗎嘛,你唔好咁放上心啦,無論你煮嘢食叻唔叻都好,我都一樣會對你咁好。」我攬住曉琳,安慰住呢個咁努力付出嘅小妹妹。

「嘻嘻。」曉琳終於有返啲笑容。

「做咩事咁開心啊?」我發覺曉琳其實係個好容易唔開心,但係又好容易氹得返嘅女仔。

「唔話你知~咦?原來舊飯團淡茂茂無味嘅,你食咗咁耐都唔同我講嘅...」



「唔係啊,好好食啊,好夠飯香。」我大啖大啖咁狼吞虎嚥。

「喂吔你唔好食得咁急啦,因住哽親啊。」

就算塊墨西哥卷再乾再硬又好,舊飯團變成淡而無味嘅紫菜撈白飯都好,都唔會難到我,我哋兩個食飽飽之後就挨埋一齊,開始談天說地,雖然大部份時間都係曉琳講,我負責聽。

眨下眼就過咗兩個鐘,附近都多咗幾對情侶坐低聚餐,曉琳就提議不如起身散吓步。

跟住我哋就起身執拾好啲餐具同野餐墊,然後我拎住曉琳個背囊,二話不說就孭咗上身。



「我幫你孭啦。」我笑說。

「唔好啦,隻色真係好女仔。」曉琳扯住自己個背囊。

「唔會啊,你諗吓,如果我一個人孭嘅話,就話覺得我孭女仔書包啫,但而家有你喺我隔離,啲人只會覺得我係幫緊女朋友孭書包。」

「好啦好啦,唔夠你講,我聽你話啦。」

就係咁,離開呢片草地之後,曉琳帶我穿過一排歐陸風格嘅露天商場,眼前仲有一座樓高大概三四層樓嘅鐘樓,附近有幾間戶外餐廳,四圍人潮亦都比頭先中央公園熱鬧唔少。

正當呢個時候,忽然間曉琳拉住我隻手,一股衝勁向前跑。

「咁急去邊啊?」

「好快你就知㗎喇。」曉琳邊跑邊答。



「唔通又有驚喜?」我心諗。

瞬息之間,幾棵棕櫚樹擦身而過,我哋沿住露天劇場嘅觀眾席樓梯急步而行,嚟到一處海濱長廊。

「到喇到喇,係心鎖長廊啊!」

唔知由幾時開始,曉琳手上面已經多咗個金屬鎖,佢捉住我隻手行埋去堆密密麻麻嘅情人鎖面前左望右望。

「你睇吓,我寫咗我哋個名喺上面㗎啦,我哋搵個空位扣起佢囉好唔好。」我哋個名之間仲有粒心心連住。

意想不到嘅係,原來今日除咗野餐之外,曉琳仲安排咗呢個情侶先會做嘅環節。

「就呢度?」我指住某處空位。



「好啊!嗯,等我摷埋條鎖匙出嚟先。」我仲諗緊曉琳會唔會唔知收埋咗條鎖匙喺邊度,但佢下一秒就拎咗條鎖匙串出嚟,扣住咗兩條細鎖匙。

「咁我哋扣呢度啦,一齊扣啊。」曉琳捉住我手。

咔嚓——

「鎖匙係一人一條㗎,唔可以整唔見㗎,我仲有份禮物要送俾你~」

「仲有禮物收?」我驚訝地問。

「你擰轉身先~」

正當我以為叫我擰轉身,係準備會有啲咩神秘驚喜彈出嚟之際,我聽見曉琳喺我身後打開背囊拉鍊,摷咗一陣之後就閂返好拉鍊,跟住就跳埋嚟我面前。

「登登~送俾你㗎,呢個都係一人一條。」



瞬間我眼前多咗條藍白間交叉編織而成嘅手繩。

「我幫你綁埋吖,你鐘意戴喺左手定右手?」

「唔...右手啦。」我答。

跟住曉琳就將條手繩綁咗喺我右手上面,之後曉琳另外再拎咗條薄荷綠配白色嘅手繩出嚟。

「你幫我綁吖。」

「咁你鐘意右手定左手?」我問。

「我學你,都係右手~」



忽然間,我諗起巴黎曾經有條舉世知名嘅情人橋,見證過唔同情侶在此留下彼此相愛嘅印記,而今日呢條沿住海濱而建嘅心鎖長廊,亦從此留低咗我同曉琳呢對名字,而我哋兩個人手上,都多咗條定情手繩。

「靚唔靚呀?我尋日整咗好耐㗎...整完之後我好想好想即刻同你分享,我忍得好辛苦,頭先好幾次差啲就唔小心爆咗出嚟,終於等到呢刻可以俾你知喇,呼~」

曉琳呢個傻瓜,咁短時間之內準備飯盒、情人鎖同埋DIY手繩,結合埋呢處良辰美景...

我將目光放遠,眼前所見嘅弧形海灣,午後陽光為海面波浪添加咗一層波光粼粼。曉琳挨咗喺我肩頭,望住屬於我哋兩個嘅情人鎖,喺我耳邊又繼續哼歌,加上微風翻起嘅海浪聲配襯,兩者一唱一和,我不自覺咁陶醉咗喺呢片氛圍當中。

我突然間靈光一動,終於認得出曉琳哼咗成日嘅旋律係咩歌,腦筋清醒過後,仲醒起有樣嘢差啲唔記得咗做。

「弊喇!我應承咗Miss Chan要買嘢食慰勞班女仔!」 
已有 0 人追稿