【校園／愛情】戀上鄰家女孩（布甸篇）: 42. 幾個飄零在外頭

由今朝早返學到而家，一直有股陰霾籠罩住家樂，直覺話俾我知有事發生咗。

我原本諗住趁早會完結，轉堂個空檔關心下佢，但係見佢無厘神氣，同平時會主動撩我傾子瑜點點點嘅佢有好大差別，我又唔知點樣開口問。

但退後一步諗，假如佢同子瑜有咩感情上嘅進展，肯定一早捉住我雞啄唔斷咁分享，咁睇嚟件事應該點都同子瑜走唔甩。

小息嗰陣，曉琳擰轉身向我打咗幾下眼色，我即刻醒水喺書包度將佢尋日揀嘅嗰幾盒朱古力拎出嚟，走埋去芯玲三姊妹旁邊。

「Miss Chan請我哋食㗎，佢話想多謝你哋上個禮拜留低幫手，不過佢叫我哋記得要低調啲。」我壓低聲線，曉琳亦都跟埋過嚟，企咗喺我旁邊。





「嘩！好靚啊！」三姊妹異口同聲，咪話咗低調啲囉，嘩大聲做乜？

「咁係Miss Chan專登買嘅？」芯玲望住堆朱古力雙眼發光，

「唔係吔！係我揀㗎。」曉琳攝咗個頭入嚟搶答。

「咿咦？啲朱古力係曉琳你揀嘅，但就由陳佑男拎過嚟，咪住先，有啲古怪喎。」芯玲搭住曉琳膊頭，一語道破重點。

「喂喂你哋睇吓，佢兩個條手繩！！」另一個短頭髮嘅妹妹加入戰團。





「情侶手繩啊！」芯玲拎起曉琳隻右手大叫。

又咁大聲做乜...

曉琳塊面紅卜卜，傻更更咁望住我，三姊妹食住個勢繼續逼供落去，直到曉琳招認咗我哋嘅戀情先肯罷休。

好快全班都知道晒我同曉琳拍拖，就算唔係嗰三姊妹大喇叭，芯玲同我講，曉琳望住我嗰陣，含情脈脈個眼神已經出賣咗我哋，再唔係嘅，望一望塊壁報板上面我同曉琳嗰兩張相，都知發生咩事。

芯玲再三叮囑我，曉琳係個好女仔，佢睇得出曉琳好投入同我呢段關係，仲用個筆尖指住我，叫我一定要對曉琳好啲，如果唔係佢肯定唔會放過我。





我諗返起，子瑜都曾經同我講過類似嘅說話...

另外，隔咗幾日我終於第一次聽到關於子瑜嘅事，其實只係芯玲唔覺意透露出嚟，原來子瑜最終都係趕唔切完成塊壁報板，聽講嗰日五點鐘老師入去俾完分之後，子瑜又再返入班房繼續整。

難得可以聽到關於子瑜嘅消息，我忍唔住追問芯玲係點知道呢件事，佢話都係聽高form啲師兄講。

「你同子瑜唔係好熟㗎咩？乜佢無同你講咩？」問多兩句搞到芯玲起埋疑心，我先醒起我唔應該咁樣打聽子瑜嘅近況。

但係我成日都想借啲意問吓芯玲，曉琳同子瑜一齊上Visual Arts堂嗰陣有無啲咩特別，話晒芯玲同佢哋同班，如果有唔妥佢肯定會留意到，但我又怕問得太多會俾芯玲懷疑。

你想問點解我可以同芯玲有咁多偈傾？因為壁報板比賽結果出爐第二日，Miss Chan話技術性調整下個座位表，曉琳依然坐最正前，家樂就自己一個坐喺走廊嗰排，我同芯玲就做咗鄰居，位置係最近窗口嗰行。

每逢小息、食晏同放學呢啲時間，我都會留意家樂仲會唔會一支箭標出去搵子瑜，但係呢個星期佢都只係悶悶不樂咁一個人過，偶然先會同另外幾個男仔食晏，不過就無再同我同曉琳有任何夾雜。

講到家樂，自從嗰日之後，我同佢多咗層隔幕，雖然曉琳同佢返埋同一間補習社，但係曉琳甚少提起佢，就好似幾乎無再提過子瑜一樣。子瑜已經變咗我哋之間嘅禁忌詞，連帶埋家樂同樣都避而不談。





至於當日家樂拍心口話會幫我監視曉琳同藍社社長嘅瓜葛，自然亦都不了了之。

呢段日子，我間唔中都會出去補習社接曉琳放學，除咗可以氹曉琳開心之外，都係一種方法等我可以近距離觀察情敵嘅動向。

「你咁好嘅，成日接我放學。」曉琳見到我喺補習社課室外面等佢，衝埋嚟攬住我，軟綿綿嘅感覺好治癒。

「我驚你夜媽媽會俾壞人拐走咗。」

「你咪係嗰個壞人囉，你係咪會拐走我。」曉琳係咁擢我隻手，好似叫緊我快啲拐走佢咁。

「你補習嗰陣，無男仔黐埋嚟同你坐咩？」我故意試探一下曉琳嘅口吻，估唔到曉琳居然好快就睇穿我諗緊咩。

「嘻嘻你唔使擔心喎，我知你想講邊個，佢由上個禮拜開始就無再補呢科喇。」





正當此時，一個熟悉嘅身影喺課室行出嚟，係家樂。

但係佢一見到我同曉琳就耷低頭避開我哋眼神，急急腳喺我哋身邊擦肩而過，望住佢個背影，我個心其實都唔好受。

曉琳同我互望一眼，唔知佢係咪都有同樣嘅感受，而當家樂離開咗之後，曉琳又再延續返啱先個話題。

「不過最近佢好似同子瑜走得好埋...」當然呢個佢係指緊個社長，唔係指家樂。

隔咗咁耐，竟然喺曉琳口中重新聽到子瑜呢兩個字，仲要係關於同另一個男仔嘅事，我不由得心裡打咗個突。

只係礙於曉琳喺面前，我要盡量扮到毫不在乎。

「而且...聽講好似係子瑜做主動嗰個...」