返到屋企之後,望吓個鐘已經九點幾,我即刻主動打俾曉琳報到。

「你返到屋企喇?你咁好嘅打俾我。」鈴聲響咗一秒都未夠,電話就即刻通咗。

「係啊,你接電話又會接得咁快嘅。」

「唔話你知~」你個傻瓜,咁都可以有秘密要保守?

「係咪僕喺個電話面前等我打俾你㗎?」我決定要篤穿曉琳個秘密。



「唔係呀唔係呀~不如聽朝一齊買早餐返學校食好唔好?」正傻妹,仲想避開我個話題。

「好啦,咁我聽朝早啲起身喺你樓下接你。」

其實可以咁樣嘻嘻哈哈同曉琳傾電話都幾幸福,而我哋兩個都有默契咁避開子瑜嘅話題,但係避開唔講,唔等於個腦唔會諗,尤其係收咗線之後,夜闌人靜嘅時候。

呢晚我發咗個怪夢,夢境裡面有個女仔死纏爛打要我陪佢坐過山車,而我平生最怕就係坐過山車,但又俾佢捉住排隊走唔甩。

當架過山車爬到最高點嗰陣,喺半空之中停低,眼前所有事物進入咗靜止狀態,原先周圍嘈吵嘅遊客呼歡聲變到鴉雀無聲,跟住我隔離個女仔突然間捉住我隻手,仲向我表白,然後下一秒鐘,我就俾過山車向下衝嘅離心力嚇醒咗…



醒咗之後,我已經記唔返起個女仔係邊個…

第二日朝早,天一光我就彈起身刷牙洗面梳好個頭,著好件校服孭埋書包就出門。你問曉琳織嗰條手繩?我除咗沖涼之外幾乎廿四小時都戴住。

學校附近其實都幾多早餐選擇,間唔中都會撞到啲同校嘅同學拎住袋早餐行緊返學,甚至有啲高年級嘅師兄姐見到曉琳會點頭打招呼,有啲仲會同我打埋招呼。

今日返學無咩特別嘢發生,都係上堂嗰陣聽芯玲講吓啲八卦嘢又一日,芯玲大膽過家樂好多,好多時傾到老師望過嚟都繼續講,但佢仲可以若無其事咁,反而搞到我望住老師有啲尷尬。

不過都好嘅,芯玲就好似一座全天候廿四小時運作嘅天文台咁,啲料準唔準我就無得控制,但叫做有個預警都係件好事。



譬如我而家知道原來個藍社社長有約過芯玲出街,但芯玲話佢太花心,佢最討厭啲花心蘿蔔,所以約咗一次就再無下文。欸...好似只係啲無乜參考價值嘅資訊...

呢日安然無恙就咁過咗,但今日係星期五,曉琳又要去開會。不過佢話仲有唔夠一個月就到陸運會,又要幫手整deco,又要負責啦啦隊排舞,無八點都唔使旨意有得走人,所以叫我唔使咁辛苦等到咁夜接佢放學。

「好啦好啦,既然你咁想接我放學,咁我到時差唔多走得嘅時候就打俾你,再去一齊食嘢好唔好?」不過最終曉琳都係改變主意。

「等你電話啊。」既然氹到曉琳回心轉意,我都安心揮揮手同曉琳講再見。

「咁一陣見喇~我打俾你先再慢慢出嚟都未遲㗎,唔好咁傻更更喺學校等我啊。」親眼目睹曉琳個身影消失於走廊盡頭之後,我返入課室執埋書包準備返屋企。

行出學校大門之後,我抬高頭望下個天,仲係一片藍天白雲,睇一睇時間原來而家先至四點幾,返到屋企都仲有大把時間可以消遣。

呢段日子每次自己一個人行呢段路返屋企嗰陣,我都會幻想撞到子瑜嘅各種情況,等緊紅綠燈過馬路嗰陣見到面要唔要打招呼?又或者,如果咁橋搭埋同一架𨋢,仲要得我同佢單獨兩個嘅話,應該點做好。

不過過咗咁多日,我哋一次都無碰過面,就算住埋同一條屋邨同一棟大廈,甚至同一層兼且同一條走廊都好,唔知道呢啲係咪叫做無緣份。



唔知道子瑜佢而家做緊咩呢?

唔知道𨋢門打開嘅一剎那,緣份會唔會眷顧我哋?

「20樓,Twentieth Floor,升降機門正在打開。」

「陳佑男!我終於等到你返嚟喇!!」

嚇得我吖,我半個身仲喺部𨋢入面嗰陣,遠處已經傳來一把熟悉嘅𡃁仔聲響我全朵。

「黃子俊?」我滿腦子問號咁望住呢粒豆釘。

「做咩你坐喺走廊唔返屋企?」我續問。
已有 0 人追稿