「黃子瑜你傻咗啊?突然間咁樣衝出馬路?」當我截停佢嘅時候,我哋已經身處馬路嘅彼岸。

「你咁惡做咩啫?」子瑜竟然仲駁返我。

「我咁都叫惡?我係擔心你咋。」

「邊個要你擔心...」子瑜擰轉身避開我眼神,最後呢句細聲到幾乎俾雨聲遮蓋。

但見子瑜之後一語不發咁耷低個頭,我順住佢視線望落地,先發現佢雙腳原本嘅一對拖鞋,其中一隻已經不知所踪,露咗隻雪白幼嫩嘅腳掌出嚟,赤住腳咁踩喺塊濕漉漉嘅地板上。



直覺話俾我知,肯定係頭先衝紅燈嗰陣甩咗,於是我回身一望,果然見到有隻鞋孤伶伶咁遺留咗喺馬路中心。

唉,真係無你咁好氣。

「拎住啦,我去幫你執返隻鞋。」跟住我將把遮塞喺子瑜手上。

我仲捉住佢手確保佢真係拎穩把遮之後,我冒住雨再一次衝出馬路,眼明手快將對拖鞋執返起,然後跑返去子瑜度。

我先摀低身將隻拖鞋放喺地上,等子瑜著返好再企返起身,到最後喺佢手上接返把遮,先至發現原來佢一直嘟住嘴咁望我。



「做咩咁樣望住我?」

「無啊,邊有人望住你啫。」子瑜斜望住地下,避開我眼神。

「又唔嬲我喇?」我故意激下佢。

「嬲啊,嬲你一世添啊。」跟住子瑜就轉身行開。

你個衰妹吖,搞到我真係成個阿四咁,又要幫你拎餸,又要幫你擔遮。



不過點都好啦,有驚無險之下,我哋總算叫做安全返到屋企樓下,只係明明我就有遮在手,但我哋兩個都要各自經歷咗一場暴雨洗禮,搞到全身濕淰淰。

「我條鎖匙呢?」呢程𨋢,又係得我同子瑜兩個人,個傻妹一到呢個時候就會喺度摷鎖匙。

「喺我度啊,仲有你個銀包同電話。」我逐件逐件摷返出嚟俾返子瑜。

至於講到個銀包,其實我都有啲驚會俾佢發現我睇過張合照,但只要我唔講出嚟,照道理佢無可能會知。

「你有無偷睇我個銀包㗎?」話口未完,我就要接受測謊審判。

「冇啊,點敢啊。」最緊要保持冷靜,唔好緊張。

「真係無?」子瑜哄個頭埋嚟望住我雙眼,我知呢個時候只要我眼神一有閃縮就穿煲玩完。

「你唔想知入面有啲乜咩?」子瑜仲要露出一個奸笑眼神,誘惑嘅聲線,手指仲要作勢解開銀包粒鈕扣。



「有乜啊?身份證、學生證、八達通,哦...我知喇,你入面有張瑞士銀行一千萬本票,原來我隔離屋住咗個隱形富婆,其實你係千金小姐嚟嘅。」

講真,如果唔係我已經意外地知道入面有我同子瑜張合照,我應該會抵唔住誘惑,想子瑜打開個銀包俾我一窺佢嘅神秘面紗,雖則我都唔介意再望多次嘅...

「唓!唔想睇咪算囉,講埋晒啲廢話,如果我真係有一千萬,我啊...到時肯定第一時間買起你,做我阿四,幫我洗衫煮飯。哼!」

吵吵鬧鬧之中,我哋連升降門正在打開呢句機械語音無聽入耳,直至𨋢門自動打開我哋先至知道返到屋企,其實可以咁樣同子瑜繼續嘻嘻哈哈,就好似將心裡面一個結解開咗咁。

「黃子俊,我返嚟啦。」子瑜打開屋企道木門。

「你哋咁遲先返嚟㗎,我見咁大雨,我閂好晒啲窗啦。」黃子俊一聽到家姐把聲就出嚟迎接佢。

「黃子俊你咁乖仔得唔得㗎。」子瑜摸摸佢細佬個頭。



「陳佑男,我幫你拎啲餸入去吖。」話雖如此,其實我係俾佢細佬捉住隻手走入廚房,咁袋餸呢,就全程都係我攞住嘅。

「你加油喇,我返去打機先。」回身已經見黃子俊又跑返入房。

亦都因為咁,我又再一次踏足子瑜屋企,當我喺廚房行返出嚟嗰陣,見子瑜同時喺房行咗出嚟,換咗套短袖衫同短褲,就係嗰種普通到無得再普通嘅款式,但正正係因為咁,先突出到佢鄰家女孩嘅味道。

「你使唔使都換咗套衫先?」子瑜企咗喺房門外問。

「唔使啦,一陣都乾。」咁男仔又真係無咩所謂,橫掂聽日又唔使返學。

「你成身濕淰淰,如果一陣你攝親病咗咁點算?」

「咁啊...咁我返屋企換套衫先。」

正當我伸手扭開門鎖,準備返去換衫嗰陣,背後再一次傳來子瑜嘅聲線。



「喂!」

「做咩?」我回身望向子瑜。

「你...換完衫之後,會再返嚟㗎可?」 
已有 0 人追稿