【校園／愛情】戀上鄰家女孩（布甸篇）: 65. 經過一些秋與冬

偏偏我總係日日諗住另一個女仔，或者一啲唔屬於自己嘅嘢，我就應該要狠心啲，唔好再藕斷絲連，乖乖地好好珍惜同曉琳嘅呢段關係。

呢晚我返到屋企之後，行到入睡房，第一時間要做嘅嘢就係執房，我企咗喺房中間默默咁轉咗一圈，心裡面盤算緊有啲咩嘢聽日絕對唔可以俾曉琳見到。

就好似呢張貼喺衣櫃門我同子瑜嘅合照，我哋兩個一個著住藍色運動服，另一個著住黃色運動服，子瑜條頸掛咗條男子初級組一百米冠軍嘅獎牌，塊獎牌事後我送咗俾子瑜留念，但係呢張合照係邊個影我已經唔記得咗，剩係記低子瑜有一日話佢唔小心曬多咗張，跟住塞咗俾我，嗰年我哋讀緊中二。

仲有枱面呢罐彩色紙星星，我好記得升中三暑期嘅某一日，子瑜無啦啦敲我門話送俾我當係生日禮物，但明明我生日係boxing day超好記，都唔知應該當係提早慶祝定係補祝，總言之就係莫名其妙。

我輕輕力將張合照搣咗落嚟，連埋罐紙星星，搵咗個糖果盒裝起佢哋，然後再收埋咗喺床下底個櫃桶暗角裡面，閂埋櫃桶之後，床頭嘅另一張合照隨即將我視線吸引住。





我記得，呢張相係上年陸運會影嘅，係我同子瑜、曉琳三個人嘅合照，上年陸運會係我大豐收嘅一年，總共收獲咗兩塊金牌一面銅牌，頒獎禮過後，兩個女仔走埋嚟喺我側邊一左一右搭住我膊頭，留低咗呢張合照。

望住呢張相，我忍唔住笑咗出嚟，子瑜發育遲緩，身材嬌小玲瓏，影相嗰陣佢專登趷高咗對腳，但係身高依然矮我同曉琳一截。

不過我都係隔咗成年先至留意到佢原來當日趷高咗對腳，靠對腳尖努力咁支撐住自己身體重量個模樣，真係好可愛動人。

而最終，我將呢張三人合照都放埋入個糖果盒裡面，再一次閂好床下底個櫃桶，就等呢啲回憶片段好好咁安放喺某個隱蔽嘅位置。

執好間房之後，我再用埋濕紙巾將頭先搣相剩低嘅膠紙痕跡刮得一乾二淨，務求唔會留低任何蛛絲馬跡，亦都等自己從此能夠心無雜念，一心一意咁對待曉琳。





希望聽日一切順順利利，唔好有咩事發生。

——————

第二朝起身，我刷好牙洗好面，裇埋個靚髮，就出發去曉琳屋苑樓下等佢。

望下手機時間都只係十點幾，依我做咗隔離屋三年鄰居嘅經驗，呢段時間應該係最安全，唔好問我點解，經驗呢啲嘢真係好難解釋。

只係希望今次曉琳唔會好似上次去愉景灣咁，為咗準備豐富嘅野餐盛宴而遲到，不過應該唔會嘅，我哋尋晚講好咗今日我會親自下廚，原因係唔使出街食、唔使叫外賣開門口攞，總之就係要盡可能降低風險。





去到曉琳樓下，依家連早更個保安叔叔都開始認得我，我凝視住電梯大堂個方向，期待緊今日我個女朋友會點樣打扮。

「陳佑男～」忽然間有把女仔聲嗌我全名，隔住道玻璃門都可以依稀聽到。

下一秒鐘就見到曉琳喺大堂向住我跑緊出嚟，上一次係未見其人先索其香，今次調返轉真係未見其影先聞其聲，而今日曉琳嘅裝扮...

係我哋套女生校裙。

保安叔叔見狀，非常識趣地拉開道玻璃門，等曉琳可以順勢衝過嚟我度。

「嘻嘻～」曉琳一埋嚟就攬實我，胸脯兩團小肉球壓晒落我心口度，兩隻眼睛含情脈脈咁望住我。

曉琳咩都好，人又靚女，秀色可餐，而且對我又全心全意，從來都無對我發過脾氣，啲人成日話初戀好容易因為少少爭執、少少誤會或者一時意氣就會鬧交，最後分手收場，不過曉琳就好似一個例外嘅存在，但我知道呢個世界並無一段關係，係必然長久維持...

所以我一定要學識好好珍惜。 





「好掛住你。」我錫咗一啖落曉琳額頭度。