【校園／愛情】戀上鄰家女孩（布甸篇）: 71. 鑰匙早在你手上

呢一晚，我送完曉琳返屋企之後，我一個人漫無目的咁喺街上踱步，寄望周圍寧靜嘅環境可以幫到我整理混亂嘅思緒。

對我嚟講，無論係子瑜，抑或係曉琳都好重要，我唔想將佢哋兩個放喺天秤上面比較，但係我發現自從我同曉琳係埋一齊之後，我就好似將子瑜殘忍咁推開咗，而到頭來，我亦都親手將兩個女仔一併推入困局裡面。

返到屋企之後，我將收埋喺床下底櫃桶嘅禁品摷返出嚟放返原位，唯獨是我同子瑜仲有曉琳上年陸運會嘅嗰張三人合照，我捧喺手上面望咗好耐，耐到一個位係，甚至乎連時間流轉嘅感覺都變得麻木。

以前陸運會只要一有機會，屬於黃社嘅子瑜就會偷偷地過嚟藍社呢邊搵我同曉琳，一齊去汽水機旁邊傾偈，直至到俾風紀趕走，但係我哋好快又會搵到另一個地方重聚，有次我哋三個仲一齊俾風紀摘名，但係我哋完全唔會介意，摘完名就嘻嘻哈哈咁跑走。

我喺度諗，呢啲日子已經一去不返，應該唔會再有機會發生，假如呢個世界，男女之間真係有純友誼嘅存在，唔知道呢一切又會變成點呢？





放低張合照之後，我就要準備迎接另一屆陸運會，而今次，我嘅身份角色亦都有所變化。

「喂喂！星期六嗰日你有無對曉琳溫柔啲啊？」芯玲呢個八卦妹趁看台無熟人喺我哋附近，就挨近埋嚟問。

「唉…唔好提喇。」我講完之後，芯玲即刻收起奸笑嘅表情。

「吓？發生咩事？」

跟住我就將星期六嘅事，一五一十咁講晒俾芯玲知，講真雖然我同佢都係壁報板比賽嘅時候先至開始熟絡，但係我又好放心咁同佢分享我嘅心事，可能係因為芯玲有一種成熟嘅感覺俾到我？我總係覺得佢情史經驗豐富過人。





「唔係啩？你唔係真係將你同子瑜嘅事，講晒俾曉琳知吖嘛？你連子瑜問你有無鍾意過佢都講埋？」

「咁又無，嗰啲純粹係我自己之後喺條街度諗返起嘅舊事啫，我點敢喺曉琳面前講晒呢啲同子瑜嘅事，我只係同曉琳講咗個大概，總之就係想用嚟解釋我同子瑜真係唔係ex嘅關係。」

「咁都好啲…」芯玲個表情，本來的確係有啲震驚，聽完我講之後先定返少少，於是佢又繼續講。

「不過我都真係服咗你，咁樣俾晒機會你，最終都可以搞到一鑊粥咁，唔怪之得曉琳今朝一味掛住做嘢，無過嚟搵過你。」

芯玲又講得無錯嘅，由八點半鐘陸運會開幕禮到依家，曉琳除咗要幫手豎起支藍社社旗，又要搬物資、借釘鞋，成個朝早走嚟走去，跟住仲要帶頭嗌cheers幫運動員吶喊助威。





雖然已經踏入十一月秋天季節，但今日陽光普照，我齋坐喺度都覺得熱，曉琳仲要周圍走咁辛苦，我見佢頸上面掛咗條藍社頸巾，除咗係每位社幹事攬住以示歸屬感之外，更多嘅作用其實係用嚟抹汗。

之不過，唔知道依家子瑜點呢？

「唉…」

「你又嘆氣啦。」結果又俾芯玲捉到我無意之中喺度唉聲嘆氣。

「如果唔係睇在曉琳份上，可能我已經一巴車咗落你度。」芯玲續道。

「咁我又的確係抵死嘅。」

「吓？你吖，一啲責任感都無，若然你想認真維繫你同曉琳呢段感情，其實你就唔應該將你同子瑜嘅事講俾曉琳聽，那怕係少少都唔好，你諗吓，試問又會有邊個女朋友，鍾意自己個男朋友講關於佢前度嘅事？」

「我都話，我同子瑜唔係ex嘅關係...」





話就話附近無熟人，但我都怕俾人聽到我哋嘅對話，好彩今日我哋坐到最高，唔使提心吊膽背後有人偷聽。

「理得你啦，好似你頭先所講咁，一時又話從來無當過子瑜係戀愛對象，但係自己又成日同子瑜玩到咁埋搞曖昧關係，有啲嘢根本就唔使講到出口，只係你內心一直唔肯承認咋嘛，我有無講錯吖？」

我望住芯玲，避開咗佢眼神，但勉強點咗一下頭。

「所以啊，你唔好再鑽牛角尖，諗埋晒啲咩關係打咩關係喇，愛情呢家嘢，本來就可以好簡單，相信自己嘅直覺，同埋我話你知，鍾意一個人無分對錯，重點係睇你點樣處理呢段關係。」

「我…」

「我我我乜鬼吖？好心你就決斷啲啦，越糾纏落去，兩個女仔受到嘅傷害就會越大。講真吖，子瑜又唔係無男仔追，你都想佢可以過得開開心心㗎？定抑或…你已經下定決心做一個渣男？」