【校園／愛情】戀上鄰家女孩（布甸篇）: 74. 但沙漠依舊未變

回想返起，我都已經唔係第一次整到曉琳唔開心，記得壁報板比賽嘅最後一日，明明我應承咗曉琳會留低喺課室幫手，但結果我走去咗子瑜班房，最後俾病咗都要返嚟開會嘅曉琳撞破。

但就係嗰一次，我衝出班房氹返曉琳，結合咗我哋嘅姻緣。

而今次，我揸住芯玲盒喉糖，一級一級走落去看台最前排，我見曉琳對住啲釘鞋點緊數，旁邊嘅社幹事見到我之後，竟然不謀而合咁執埋啲嘢行去第二度，而我眼見個社長又唔喺附近，無意之中製造咗個獨處機會俾我同曉琳。

「曉琳…係我啊。」我將盒喉糖收埋喺褲袋。

「邊個？唔識你喎，今日完咗喇，無晒釘鞋借。」曉琳雙眼依然專注喺堆釘鞋到，但至少佢肯同我講笑，即係應該仲有彎轉？





「對唔住啊曉琳，我買咗盒喉糖俾你啊，你今日嗌足全日喉嚨肯定好辛苦。」所以我決定順住個勢鼓起勇氣氹返佢。

「哼！咁你依家即係嫌我把聲沙晒難聽啫。」

「我無啊，就算你把聲沙晒都依然咁好聽，嗰種磁性更顯得你嘅韻味，其他人唔會識欣賞㗎，不過我鍾意聽你依家把聲。」

我一邊講一邊慢慢試探性咁行埋去曉琳面前，點知曉琳即刻擰轉面避開我。

「曉琳啊，你唔好嬲啦，做咩又唔講嘢喎？」我再走向曉琳面前，側住頭扮可憐咁望住佢。





「你鍾意聽所以我唔講，敵人擁護嘅我要反對。」跟住曉琳叉住手擰開咗。

但明明前一秒曉琳擰轉面避開我，不過下一秒鐘又調返轉個身過嚟，一拳打落我心口度。

「喂吔，明明芯玲叫我唔可以咁容易心軟㗎！」曉琳扁扁嘴，眼仔碌碌咁望住我，從曉琳眼眸之中我漸漸留意到有股源源不絕嘅甜意散發緊出嚟。

而我亦都無為意到自己嘅笑容，早已不經意地泄露咗出嚟。

「曉琳…」





「罰你啊，你要幫我搬呢箱釘鞋去雜物房。」曉琳未等我反應得切，已經將盒紙皮箱塞咗俾我，裡面整整齊齊排滿咗一對對嘅釘鞋。

搬運過程當中，我有種僥倖嘅感覺油然而生，意想不到竟然又再一次蒙混過關，成功氹返曉琳，連我自己都覺得有啲難以置信，亦有啲唔實在。

當我放好箱釘鞋返上看台之後，芯玲同眼鏡妹妹已經走咗落去同曉琳傾緊偈，連短髮妹妹都過咗嚟，一齊圍住曉琳關心緊佢，我默默咁企喺旁邊，知道呢個時候唔應該打擾佢哋嘅girls' talk。

無耐之後，曉琳要同社幹事會開個幾分鐘嘅簡會，檢討一下聽朝早開場嘅安排，於是我就同芯玲三姊妹坐埋一邊等，佢哋話約好咗等曉琳開埋個會，然後我哋五個人就一齊去食隔離商場掃街食嘢，仲話原本只係打算全女班，無諗住叫埋我，係曉琳出到聲話要拉埋我嚟，我先不至於被遺棄。

結果個簡會都係超時完結，到我哋拉隊離開嗰陣，運動場只係剩低幾個留守到最後嘅負責老師同埋學生會啲幹事，仲有一群忙於清理垃圾嘅清潔工人，當我抬頭望向天，蔚藍天空隱約見到一撮金黃，黃昏日落嘅景色往往令人陶醉。

曉琳同芯玲四個女仔行喺前排嘻嘻哈哈咁傾偈，咁我作為男仔就自自然然殿後尾隨，不過當經過黃社看台嘅時候，我不由自主咁向看台方向偷望咗一眼，但上面早已經空空如也，黃社啲支援物品一早拆晒，一個人影都無，縱然我今日能夠照顧到一邊嘅感受，其實亦只係犧牲另一邊換取返嚟，難道就無兩全其美嘅辦法嗎？

「曉琳你真係咁易就放過個衰仔啊？唔使佢做返啲嘢補償你咩？」芯玲捉住曉琳隻手仔問。

「我...我未原諒佢㗎，除非呢，聽日社際接力佢幫我跑到個第一名返嚟，我先再考慮吓啦～」曉琳說罷驀然回首向我嫣然一笑，差啲俾佢發現我剛才目光所及。