【校園／愛情】戀上鄰家女孩（布甸篇）: 76. 命運再一次考驗
當我去到召集處帳篷嘅時候，大師兄、二師兄同埋藍社社長已經到齊晒熱緊身拉緊筋，負責幫我哋點名嗰個竟然係短髮妹妹。
「咁遲㗎你？差啲想取消你資格。」短髮妹妹拎起支筆，喺塊點名板度剔咗一下。
「你取消佢資格，佢今晚返去就要喺曉琳面前跪玻璃㗎喇。」雖然大師兄經常一臉正經，但識耐咗就知佢其實都係鍾意講笑。
「可能今晚唔係跪玻璃呢，係做第二啲嘢。」但二師兄個笑容就相當奸詐。
「你哋啲男仔成日都講埋啲唔正經嘅嘢，我走先喇。」
短髮妹妹將塊點名板抱喺胸前，嘟住嘴正想準備轉身離開帳篷，但俾我捉住佢衫袖問。
「乜你唔係幫手計時咩，點解會過咗嚟召集處做點名嘅？」
「咁本身計時就係要幫手做埋登記吖嘛，係啊，芯玲話佢哋一陣會落嚟幫你打氣，你到時唔好跑跑吓跌低，我一定會笑你。」
短髮妹妹講完之後就無再眷戀喺度，獨自一人離開返去終點位置，咁佢今日作為工作人員應該都有自己緊密嘅行程嘅，我都無謂再騷擾佢。
啊！唔記得八卦吓，芯玲佢哋話短髮妹妹會周不時行去黃社看台偷望家樂，唔知頭先佢又有無借啲意望返去看台呢？不過呢個位置同看台相隔甚遠，雖然看台上依舊一片喧鬧沸騰，但要逐個面孔辨別就略有難度。
算啦，我都係唔好望過去喇，反正咁遠都睇唔清楚邊個打邊個，重點係，我真係唔應該再係咁，專心一志跑好呢場比賽先至係我應該要做嘅事。
但仲有另一個問題係，每逢一緊張我個腸胃就會同我作對，我趁距離最後召集仲有少少時間，九秒九衝返去看台底個男廁，途中仲遇到芯玲同曉琳，加埋今日無比賽但依然戴住隱形眼鏡嘅妹妹，佢哋三個手挽手肩並肩行緊去終點方向。
芯玲個衰女包仲要笑我係攋屎仔，得曉琳關心我係咪頭先晏晝嗰餐啲嘢食唔乾淨，不過由於時間趕急，我哋都只係匆匆忙忙講咗兩句，曉琳就催我快啲去廁所，臨走前仲塞咗包紙巾俾我。
可能係得到曉琳嘅眷顧，呢次如廁非常暢順，有個咁好嘅女朋友，人生如此本應無咩需要再強求，但點解我硬係覺得內心缺少咗一啲嘢咁。
而司令台最後召集嘅廣播亦都響徹全場，就連喺廁格裡面都聽得一清二楚，我即刻著返好條褲，洗乾淨隻手就準備趕返去集合點。
不過唔知道命運係咪總係鍾意捉弄我，當我一行出廁所門，就迎面見到有個熟悉嘅女仔身影，急急腳衝落看台樓梯，偏偏臨落到地前幾級就失平衡成個人跌低咗。
「嗯，好痛…」個女仔跌到膝頭哥都損晒，但仍然無阻佢前進嘅意欲。
正當呢個時候，後面有個男仔嘗試伸出手，扶返起個女仔。
「子瑜，你唔好跑咁急啦，我可以陪你去㗎。」而個男仔就係家樂。
「唔使你陪啊，我自己一個去就可以。」 子瑜捹開咗家樂隻手，同時間佢兩個都發現咗我嘅存在，步伐終於放慢落嚟。
從子瑜焦急嘅神情話俾我知，肯定係發生咗啲事，究竟發生咩事？
「黃子瑜，做咩事啊？」我即刻走埋去子瑜面前。
「無事啊，你就快要比賽啦，唔使理我。」子瑜想擺脫我，但俾我攔住咗條樓梯口走唔到。
「你講啦，我從來都無見過你個樣咁驚，你話我知究竟發生咩事先。」
但係子瑜就係唔肯講，剩係想將我推開。
與此同時，我望一望企喺後面嘅家樂，但見佢憂慮不安嘅眼神，欲言又止，我就知道佢有意欲講俾我聽發生咩事，但又礙於子瑜喺度所以唔知講唔講出嚟好。
「講喇！」於是我近乎以命令式嘅語氣逼家樂講。
「子瑜…佢細佬出咗車禍…入咗醫院。」
吓！？今次真係一記晴天霹靂，我差啲以為自己聽錯，黃子俊個衰仔包竟然...
「妖！你做乜講出嚟啊？」子瑜即刻向後睥住家樂。
我知道家樂咁樣做，已經等如係放棄自己追到子瑜嘅機會，但佢仍然選擇將呢件講俾我知，而我本身亦都估到子瑜神色咁慌張一定係有緊要事發生咗，但我點估都估唔到係佢細佬出咗車禍，至於依家咩狀況、嚴唔嚴重我都無時間同能力去思考，呢個時候直覺話我知，我只係想陪住子瑜做一件事。
「我陪你去醫院。」
「唔得！」
「點解？」
「我唔使你理我啊，我唔要啊，你走開啦。」只見子瑜激動得眼泛淚光，隨即又繼續講落去：「就當我求下你你唔好理我啦好唔好，你返去比賽啦，曉琳佢等緊你㗎，難得你可以氹返佢，唔通你想轉個頭又再搞到人哋唔開心啊？」
雖然子瑜呢番說話係為咗我同曉琳好，但我聽完個心就硬係揦住揦住好唔安落，黃子瑜其實你呢兩日一直都有暗中留意住我哋係唔係？
但就係呢個時候我稍一不留神，就俾子瑜擺脫咗我嘅圍困，成功喺我旁邊搵到個空隙竄走咗，直奔出去。
然後下一秒鐘，子瑜就盲舂舂咁撞咗落另一個男仔度，而個男仔又想伸手扶住差啲失平衡嘅子瑜。
「係子瑜？你做咩喊到咁啊？」今次呢個男仔係藍社社長，聲線溫柔。
「唔關你事。」
跟住子瑜就繞過咗社長，頭也不回繼續向住運動場大門方向奔走，社長一臉錯愕，完全理解唔到發生咩事，而我就一直呆望住子瑜嬌小又孤獨嘅背影，直至消失喺我視線範圍之中。
隔咗一陣，我先察覺到原來社長拍緊我膊頭。
「...啱啱已經最後召集喇，再唔返去就俾大會取消資格。」藍社社長走埋嚟想拉我走，聲線平淡。
咩嘢最後召集，咩嘢取消資格，我幾乎咩都聽唔入耳，或者我個心隨住子瑜離開，已經唔再屬於呢度。