【校園／愛情】戀上鄰家女孩（布甸篇）: 80. 醒來才發現是愛

以前，我總係唔知道點樣界定我同子瑜之間嘅關係，但經過芯玲點醒我之後，我知道自己只不過一直拒絕承認而已。

由我哋中一第一日返學嘅第一次相遇，如果當日唔係我手殘㩒錯閂門掣，子瑜正正常常咁入𨋢，無俾道𨋢門夾親，我哋呢段邂逅嘅形狀就會改變，好可能兩個人只會各自各返學，返到班房隨便搵個位置坐低，坐到遠一遠，最後唔知邊日先發現原來大家係鄰居關係，然後繼續正常咁過生活。

可能呢個世界有啲嘢真係早就注定咗，注定咗我同子瑜會用呢個方式相識，注定咗曉琳嘅出現，注定咗我同曉琳會走到情侶呢個階段，然後再一步一步演變到今時今日呢個局面，如果唔係黃子俊出事，如果唔係我臨陣肚痛，我可能呢世都未必會知道子瑜離開運動場嚟到醫院，而我都唔會跟住佢步伐，跑到終點嘅時候當住曉琳面前跑出運動場，坐喺醫院呢張長凳度陪住子瑜。

但係下一步應該點樣行，我完全無頭緒。

時間一分一秒咁流逝，姑娘走過嚟同我哋講探訪時間已經到，而子瑜媽咪始終都係趕唔切過嚟醫院，我有勸過子瑜不如返屋企食啲嘢先，聽日可以再嚟，反正陸運會第二日係學校假期，但係子瑜話佢唔捨得走，佢想一直喺醫院陪住黃子俊。





「但係子瑜…如果連你都冧埋，仲有邊個可以照顧你細佬？」所以我有責任要好好睇住呢個女仔。

「我無事啊。」

「但係你成晚一啲嘢都無食過，會餓壞身體㗎。」

「嗯嗯，不過我真係唔肚餓。」

「好啦好啦，我陪你坐多陣。」其實我知子瑜唔係唔肚餓，我哋挨到咁近我又點會聽唔到佢個肚仔咕咕響，只不過既然子瑜想留耐啲，我都唔會勉強佢。





就係咁，我哋兩個坐到不知時日過，因為我手機無跟身都唔知依家幾點，子瑜就一直挨住我膊頭，我搭住佢膊頭隻手亦都無縮開過。探病嘅家屬走咗，巡房嘅醫生亦都無晒，四周圍環境變得好靜，靜到甚至可以聽到子瑜嘅心跳聲，直至呢個妹豬再次打破寧靜。

「陳佑男…」

「做咩？」子瑜依然瞓緊喺我膊頭度，我哋兩個互相見唔到對方面容，但可以清楚聽到對方嘅聲音。

「你仲記唔記得我問過你，你有無鍾意過我？」

「我記得啊，跟住你仲嬲咗我，明明你應承過我唔會再嬲我。」當日子瑜見我對佢呢條問題支吾以對，跟住就嬲爆爆走開咗，我到依家仍然記憶猶新。





「哼！乜你唔知我點解嬲你㗎咩？」子瑜突然間坐直返個身，用佢對水汪汪嘅大眼睛望住我。

「但我依家知喇。」我微微一笑，再次將佢攬住，不過今次唔同嘅係，我係直接將子瑜攬入懷裡。

「吖！」子瑜俾我突如其來攬住，竟然唔小心失聲呼叫。

「殊～醫院嚟㗎呢度。」我舉起食指放喺嘴前面，壓低聲線，提醒子瑜唔可以叫得咁好聽…吖唔係，係唔可以叫得咁大聲，會騷擾病人休息。

「陳佑男，你去死啦！」結果子瑜一掌撥開我隻手指，但原來呢下掌法只係一記虛招，背後真正嘅殺著已經風馳電掣咁嚟緊。

當我回過神嘅時候，子瑜嘅腳尖已經殺到嚟我堆腳毛面前，但腳毛何其柔軟大家又唔係唔知道，面對住子瑜雷厲風行嘅腿擊，咩螳臂擋車都唔係，直頭係隕石撞地球，即使眾腳毛們下定決心奮身堅挺至最後一刻，準備壯烈犧牲，但係呢一下重擊依然唔知將幾多條腳毛踢到連根拔起。

「啊！痛！」即使痛到以為隻腳斷咗，但我都無縮開攬住子瑜隻手。

「殊～醫院嚟㗎呢度。」衰女包仲識以其人之道還治其人之身。





「救命，有無醫生？」我苦叫。

「幫你望咗，無啊。」子瑜又無講錯，當下真係四下無人。

「鬼叫你依家先發現我嗰陣時嬲咩，太遲喇～」跟住子瑜嘟起個嘴，起身跑走。

我下意識追上去，彷彿已經忘記咗自己係某人嘅男朋友。