【校園／愛情】戀上鄰家女孩（布甸篇）: 83. 鄰家女孩的秘密
兩姐弟釋懷過後，跟住我哋三個就好似平時喺屋企食飯咁傾偈，有時候我同子瑜連成一線對付黃子俊，轉個頭就到我同黃子俊組隊夾擊返黃子瑜，不過子瑜輕鬆以一敵二絲毫不落下風，反而最可怕係當佢兩姐弟同一陣線嘅時候，基本上我係完全無力招架，去到最後只能夠不停傻笑。
至於我哋傾咗啲咩？其實咪又係啲無聊嘅小朋友話題，總之見返佢兩姐弟笑容出返嚟，我就心滿意足。
望一望病房個鐘，原本都差唔多搭正一點，探訪時間接近尾聲，今朝早醫生已經同咗子瑜講佢細佬起碼要留院觀察多兩三晚，確保身體無其他大礙先可以出院，而我同子瑜下一站要去黃子俊間小學幫佢拎功課。
臨別之際，粒豆釘忽然捉住我隻手，見佢笑騎騎咁唔知又喺度打咩鬼主意。
「黃子瑜你行先啦，我有啲嘢想同陳佑男講。」
「做咩啊？有咩係我唔聽得㗎？」子瑜好奇心瞬間爆棚即刻擰返轉身。
「唔聽得，唔聽得，因為我要講你壞話所以你唔聽得。」黃子俊揮揮手堅持要子瑜避席。 不過我一聽就知粒豆釘捉住我肯定唔係想講子瑜壞話，因為頭先我哋傾偈嗰陣，黃子俊幾乎將佢家姐啲瘀事肆無忌憚咁爆晒出嚟，小至以前子瑜初初學煮飯會將糖當成鹽，大至子瑜平時返到屋企會將自己啲bra同底衫亂咁放喺佢張床呢啲私事，如果真係有咩壞話要講，啱先都已經講得七七八八。
但最後子瑜都係乖乖地聽佢細佬講行出外面等，黃子俊個衰仔趷高個頭確保佢家姐真係行開咗，就擰轉身想趟開床邊個櫃桶。
「我幫你啦。」無理由我要個包住石膏嘅小朋友郁身郁勢，一陣如果整親我點同子瑜交代。
「我個書包好似仲喺入面。」黃子俊指住個櫃。
「見到。」
「裡面有樣嘢係俾你㗎，放咗喺書包個暗格度。」黃子俊把聲細到幾乎聽唔到佢講咩，睇嚟佢真係唔想俾佢家姐知道。
「子俊哥你唔會整蠱我㗎可？」唔會失驚無神彈咗隻蟲出嚟㗎可？
「得鬼閒整蠱你啊，好心著雷劈！」
希望個衰仔係講真，唔係收埋咗啲咩鶻突嘢喺裡面整蠱我，我順住佢指示慢慢拉開佢書包暗格嗰條拉鍊，跟住我伸手入去一摸，空寥寥剩係得一舊嘢喺裡面，個手感摸落似係一條連住咗隻公仔嘅鎖匙扣，隱約感覺到隻公仔仲有兩隻大耳仔，唔通係...？
我拎出嚟攤開掌心一望，隻公仔個顏色居然同我原本想像嘅差咁遠，起初我以為係隻黃色嘅公仔，點解反而會係呢隻白色嘅...
「點解嘅...？」
「你啊，真係好失敗啊，連人哋黃子瑜鍾意啲咩都唔知道，其實人哋最鍾意嘅唔係布甸狗，而係呢隻玉桂狗啊知唔知道？」
大概我呢世仔應該都無咩機會，會再俾一個得十歲嘅豆釘教訓，但佢每次教訓我都係為咗子瑜著想，亦都係想可以撮合我同子瑜。
「我以為你家姐鍾意嘅係布甸狗...」
諗返起，呢個先入為主嘅諗法根深柢固咗喺我腦海已經三年有多，我誤會子瑜同我一樣鍾意布甸狗，可能就係源自於中一聖誕聯歡會交換禮物嗰陣，子瑜走出嚟接收咗我個布甸狗銀包。
「你同我老豆都係一擔擔，連子瑜鍾意啲咩都唔知道。」
俾佢咁樣講一講我又醒起，子瑜個布甸狗銀包裡面，嗰張當年喺迪士尼影嘅即影即有都係玉桂狗嚟，當時大叔就係因為張即影即有唔係子瑜鍾意嘅布甸狗而慨嘆，誰不知玉桂狗先至係子瑜嘅最愛，唔怪之得子瑜更加唔捨得掉。
「咁呢個鎖匙扣...你係想我送俾你家姐...？」而我亦都終於知道黃子俊留低我喺度嘅目的。
「陳佑男，我知道雖然你依家同緊另一個女仔玩，但你當幫我一個忙可唔可以？你可唔可以鍾意返黃子瑜？追返黃子瑜返嚟做女朋友，我唔想佢唔開心啊。」
「我...」估唔到我對住黃子俊，講唔出口其實我已經愛上咗佢家姐。
但唔係話兩個人相愛就可以走埋一齊。
「條鎖匙扣我專登買㗎...就係諗住俾你用嚟追黃子瑜，點鬼知我俾車撞，搞到咁遲先俾到你。」
我真係唔敢去諗黃子俊係咪因為買呢個鎖匙扣先至遇上車禍，如果係真嘅話，我點樣賠返個細佬俾子瑜，我又點對得住呢個小朋友對我嘅寄望。
我望住手上面呢條玉桂狗鎖匙扣，兩隻長耳仔再加埋對藍色大眼睛，細細粒越望越覺得可愛，越覺得同子瑜有幾分相似，慢慢我開始望到入晒神，黃子俊亦無再講啲咩，我將呢隻玉桂狗珍而重之袋落褲袋裡面，然後再閂返好裝書包個櫃桶，最後幫黃子俊冚返好張被。
臨走前我好奇問多句。
「喂黃子俊，你咁細個就知道咩叫追女仔？」
「點會唔識啊？我班上面啲男仔已經開始識追女仔，不過嗰個女仔唔多鍾意佢哋，反而成日黐埋嚟我度。」
聽完之後我會心一笑，跟住就同個衰仔講byebye，我行出病房一望，就見到子瑜企咗喺走廊等緊我。
「咁耐㗎？」子瑜走上前問。
我連忙摸摸褲袋，先確保隻玉桂狗嘅安全。
「我哋行？食啲嘢先再去黃子俊學校拎功課。」呢刻我竟然猶豫緊好唔好拖住子瑜隻手。
「黃子俊佢同你講咗啲咩啊？」結果發現佢擘大對眼睥住我。
「欸...無啊，無乜嘢特別。」搞到我有啲心虛。
「講唔講啊？」忽然間子瑜一嘢搣落我手臂度，最攞命嘅係佢搣起咗忽肉之後就要夾硬扭多一下，痛到我哇哇叫。
「啊呀！！我講我講，你放手先，好痛啊。」
不過子瑜依然無放開手，仲係搣住我手臂啲肉，只係無再俾力落去，唔知點解呢刻我好想再講啲嘢刺激佢再搣多我一下...
等陣先我係咪傻咗啊？定係M底發作有被虐傾向！？但係點解我又會覺得有股甜意，逐少逐少咁由手臂注入個心度嘅？
「又話講嘅？」子瑜毫無預警之下突然再俾力搣落嚟，嗰股甜意一下子好似湧泉咁注入。
「講講講，頭先黃子俊話...」
子瑜谷起兩邊腮，嬲爆爆咁望住我，等緊我講出一句完整句子，睇怕呢鋪唔搵啲嘢講嘅話，真係唔使旨意走得出黃子瑜嘅手指罅。
「佢話，佢班上面有個女仔暗戀緊佢。」危急關頭我總算執到塊浮板。
「哈哈～佢又真係無同我講過呢樣嘢。」點知真係呃到子瑜，呢個傻妹仲要笑得好開心。