【校園／愛情】戀上鄰家女孩（布甸篇）: 85. 陽光不再普照時

Miss Chan一入嚟，身為男班長嘅我，已經係本能反應咁彈起身叫起立敬禮。

「得喇，今日唔使敬禮。」Miss Chan揮一揮手示意大家坐返低，下一秒鐘佢目光已經轉向我。

「男班長你出一出嚟。」

我留意到幾乎全班同學嘅目光都放咗喺我身上，除咗芯玲三姊妹同家樂，仲有幾個不問世事嘅同學之外。

「係…嚟緊…」





雖則我都唔係第一次早會嗰陣俾班主任傳召，不過今次唔同嘅係，佢直接叫咗我出去走廊度傾，雖然我都知道因咩事幹，但咁樣一嚟都話咗俾我知，件事嘅嚴重性。

呢刻，全級同學都喺課室裡面聽緊廣播，唯獨是我同Miss Chan就企咗喺走廊度，我垂頭耷耳唔敢直視佢，而佢第一句就揶揄我。

「幾叻仔吖，第一次跑社際接力就拎到冠軍…」不過都係Miss Chan咁講，我先知我哋真係羸咗比賽。

「不過你好似有啲混淆咗條終點線，明明條終點線畫得咁清楚你都仲要繼續跑，點吖，你仲有無啲咩想解釋？」

「Miss Chan你係咪已經都知道晒？」以佢嘅聰明才智同人脈關係我估佢點都收到風。





「人哋A班班主任同返我講啊，黃子瑜起碼都識得問准咗佢先至離開運動場㗎，你有無問過我啊？你有無同任何一位老師講過啊？陸運會擅自離開運動場，知唔知犯咗幾多條校規？你啲兒女私情我都唔想理你咁多，但你想我點同校長解釋先？」

講真嗰句，雖然平時Miss Chan好嚴，但佢絕對唔係啲黑人憎嘅老師，但今次我帶咗咁大個麻煩俾佢，我自己都好過意唔去。

「Miss Chan我知錯喇，我無諗住逃避責任㗎，我甘願接受一切懲罰…」

「呢層你可以放心，罰就罰硬，差在係點罰你，你今日放咗學即刻落嚟教員室搵我，不過唔記得同你講，今日曉琳請咗病假，咁女班長嘅嘢…你都做慣㗎啦。」

「知道…」我無估錯，曉琳今日真係無返學…





「做咩啊？面有難色咁喎，定係我阻住你放學去箍煲啊？」Miss Chan最後個奸笑表情...唉，話晒佢都算係後生又幾靚女，呢啲中學生拍拖嘅嘢佢以前肯定經驗豐富，所以專登笑吓我。

「返入去聽早會廣播啦，咦…另一個女主角過緊嚟搵你喎。」Miss Chan講完就抌低咗我呢個學生，自己行返入課室。

之但係，咩係另一個女主角？我側頭一望，先見到走廊盡頭有個嬌滴滴嘅女仔慢慢行緊過嚟。

原來係子瑜…

子瑜喺早會期間走出嚟做咩？可能係去廁所？唔知道佢今朝返學有無聽到啲難聽嘅說話呢？不過依家呢度實在係此地不宜久留，話晒全班同學可以透過走廊個趟窗望到我，一陣間子瑜走到埋嚟佢哋實會見到，我真係無必要再製造無謂嘅花生。

所以我趁子瑜仲未行到過嚟，先行一步走返入課室，但我依稀見到我臨入課室嘅剎那間，子瑜最後好似停低咗腳步，而我直到返埋位坐低之前，都唔敢擰過去走廊嗰方向去望子瑜有無經過。

坐低之後，我仲有另一樣野等緊個機會去做，但礙於早會完咗接住落嚟嗰兩堂都係Miss Chan嘅中文堂，我連拎部電話出嚟嘅機會都無。

鈴鈴鈴———





終於俾我捱到小息鐘聲響起…

我目送完Miss Chan離開課室之後，即刻拎埋部電話衝出課室，喺走廊搵咗個無咩人嘅角落，準備睇吓電話裡面有啲咩特別，想知道點解今朝我一拎返部電話嗰陣芯玲會叫我睇吓部電話。

我一㩒著個mon，部電話較咗做勿擾模式，但係電量幾乎係滿電，我諗…都係得一個可能性，就係曉琳幫我叉過電嚟，因為芯玲肯定唔會得閒理我部電話有無電。

解鎖之後，我就去搵有咩唔同到，首先wallpaper無變到，依然係我同曉琳喺愉景灣草地上面嘅合照，跟住相簿都無多到相，來電記錄亦都無任何特別，咁唔通係message？

我即刻打開個app，果然見到曉琳嗰個對話框框有段未讀訊息，㩒入去原來只係簡單一句...

『陳佑男...如果你個心依然仲有我嘅話，聽日放咗學之後可唔可以見個面，地點邊度都可以㗎。』

咦？曉琳講嘅係聽日，而呢段文字係尋晚send嘅，咁即係指今日放咗學之後？