【校園／愛情】戀上鄰家女孩（布甸篇）: 86. 天空就要塌下嗎
我放低部電話沉思咗一陣，無耐小息鐘聲再度響起，我返到課室之後，決定鼓起勇氣，拎起部電話覆返曉琳。
『曉琳，今晚我要俾Miss Chan留堂，但放咗學之後我嚟你屋企樓下等你可以嗎？』
出乎意料嘅係，下堂教Bio嘅鍾sir都未嚟到課室，曉琳就已經覆咗我可以。
又會覆得咁快嘅…唔通曉琳一直喺度等緊我嘅答覆？諗到呢度，我愧疚感又浮現晒出嚟。
以前上堂嗰陣，芯玲都會撩我傾啲無聊八卦嘢，但今日明顯係例外，除咗課堂上有啲咩唔明佢會問我之外，基本上佢都一副懶得理我嘅態度，但往好嗰方面諗，起碼佢無同我絕交…
不過Lunchtime就唔使旨意同佢哋三姊妹一齊食，我到呢刻先發現，原來我喺學校係無咩飯腳，雖則我唔係小毒毒，亦唔係無朋友，但過往剩係同子瑜、曉琳、家樂或者芯玲三姊妹食，好少可群埋落啲男仔堆度，結果今日我就要面臨自己一個食嘅局面…
而且我開始有個預感，往後嘅日子可能都會係咁，不過都無辦法嘅，食飯鐘聲響起，我留意到總有啲同學其實都係默默咁自己一個人行出課室，無論係男定女都好，話唔定終有一日我都要學識同自己相處。
課室裡面大部分同學都嘻嘻哈哈咁出晒去食飯，連最後一個平時唔多出聲嘅男仔都起身離開，而我就仲孤伶伶咁坐咗喺位度諗。
唔知子瑜依家點呢？忽然間我想過去子瑜班房望吓佢仲喺唔喺度，結果我一出課室門口，就喺走廊迎面撞到個傻妹。
我哋兩個即刻相視而笑，好似都已經知道對方諗緊咩。
「跟我嚟吖。」子瑜輕聲溫柔說。
子瑜想帶我去邊，其實我都毫無頭緒亦都無所謂，但係我可以估得到佢嘅原因同目的係咩。
轉咗幾個街口，嚟到一間舊式茶餐廳，舊到地板仲係鋪緊幾何三色地磚，餐巾仲係用油紙而唔係紙巾嗰種，冷氣欠奉但天花板吊住把大風扇已經夠晒涼爽。
我同子瑜入到去就揀咗個卡位對住坐，即刻有伙記埋嚟擺低兩杯水。
「呀妹，今日咁好嘅，有個男仔嚟陪你。」
「帶多啲生意俾你吖嘛。」子瑜笑咪咪咁回應。
跟住子瑜哄埋嚟同我解釋，原來頭先個伙記就係呢度嘅老闆。
「我呢排都係自己一個人嚟呢度食，貪呢度靜靜地無咩人，又唔會撞到其他同學。」
子瑜表面上好似講得好輕鬆，但我就聽到有啲心酸，呢個時候，我偷偷地摸一摸褲袋，確認條玉桂狗鎖匙扣仲喺度。
「子瑜…呢段時間辛苦你喇…」
「傻啦，唔好講咁多嘢住先啦，嗱餐牌啊，你快啲揀嘢食先，我好肚餓喇。」子瑜不斷用佢對腳仔踢我，催我快啲揀。
「我揀好喇。」
跟住我舉一舉手叫老闆落單，子瑜用眼神示意要我嗌先。
「沙嗲牛肉麵，凍奶茶。」咁我係照舊㗎啫。
「兩份吖～」子瑜幫我放返好塊餐牌。
我哋兩個又再一次相視而笑，落好單之後，我問子瑜。
「點解你咁鍾意踢我㗎？」
「因為你唔會反抗囉。」子瑜諗都無諗就答我。
「咁等我試吓還擊踢返你先。」我縮起隻腳向後拉弓，作勢準備要踢返子瑜一下。
「你夠膽就試吓啦～」子瑜漲起兩邊腮望住我。
老實講，我真係唔敢，亦都唔捨得咁做，子瑜對腳仔咁弱質纖纖，我怕輕輕力踢都會整痛佢。
話咁快兩碗沙嗲牛肉麵就送到面前，我拎起支鐵叉，浸過水抹乾淨之後再遞俾子瑜。
「今日放咗學一唔一齊探黃子俊？」
「但我今日俾Miss Chan留堂啊，唔知道要搞到幾晏。」
「嗯嗯，咁我同佢講你俾人罰留堂唔得閒啦～」
「但仲有一樣嘢…」由頭先開始我就糾結緊好唔好講出嚟。
「仲有咩？」子瑜問。
「仲有…其實今晚曉琳約咗我…」最後我都係相信自己直覺，我都係想同子瑜坦誠相對。
「哦…原來呢個先係重點…」子瑜只係耷低頭密密咁食無望到我。
「唔係呀，我係諗住趁今晚同佢講分手。」
「吓？咁突然嘅…？」其實邊會突然，只係我都感覺到子瑜唔知俾咩反應先至合適。
「我覺得，當初我唔係真係咁鍾意曉琳，可能只係一時好感令我誤以為自己鍾意佢…既然發生咗啲咁嘅事，我諗我係時候都要同佢講清楚…」
「咁你諗清楚㗎喇…？」原本我以為，我同曉琳分手對子瑜嚟講會係一件好事，但睇佢表情又唔似係。
「事到如今我都無得選擇。」
天花板把大風扇依然默默咁轉動，偶爾會因為機件殘舊嘅關係而發出一兩聲怪響，除此之外呢度環境真係好寧靜，當我講完今晚打算同曉琳提出分手之後，我哋兩個就無再講其他嘢。而子瑜成餐飯亦都好似若有所思咁。
放學鐘聲終於響起，我執埋啲嘢，就乖乖地落去教員室靜心等待Miss Chan處置。
結果罰企，寫悔改書，加埋記小過俾訓導主任訓話，唔使見家長都算我執到，不過嚟緊半年嘅學校活動，全部都要強制被逼做helper幫手，呢招唔知係咪用嚟以防我再次中途逃走…
搞掂好晒所有嘢行出教員室，望一望個鐘都差唔多六點幾，終於可以放學…我諗呢個鐘數，學校四周圍都已經空無一人，但係我怕曉琳已經等咗好耐，所以我嗱嗱臨揹返起個背囊就出發去搵曉琳。
走咗一段路之後，終於嚟到呢段同曉琳一齊行過唔知幾多次嘅斜路，行埋上去就到曉琳屋苑。呢一刻，越近曉琳屋企，我心情就越緊張。