【校園／愛情】戀上鄰家女孩（布甸篇）: 93. 愛上你是種緣份
「黃子瑜我知道你聽到㗎，我會一直喺度等你，直至你出現為止，唔俾你再離開我！因為我最鍾意嘅嗰個女仔係你！！」
我都未講完，文書阿姨已經衝咗入嚟制止住我，訓導主任就緊隨其後，搞到我想講多幾句都唔得。
「陳佑男你喺度做乜嘢！？」訓導主任好似恐龍咆哮咁。
「搵人囉。」
「放低支咪同我即刻出嚟！！」
訓導主任嬲到近乎跳掣，捉咗我出走廊罰企開始訓話，我就無咩好驚嘅，反正都係我一早預料到嘅後果，我只係在乎黃子瑜佢聽唔聽到我頭先講嘅嘢。
咩擅用學校公物、違反廣播條例、行為不檢、藐視老師呢堆罪名冚唪唥搬晒出嚟，仲話我已經係慣犯，距離上次陸運會都只係隔咗個半月，我聽到呢度諗返起，原來兩次嚴重犯校規都係為咗子瑜呢個傻妹。
不過可能連訓導主任都未見過有學生好似我咁百厭，學校支廣播咪都夠膽玩，仲要用嚟向女同學示愛，佢霎時間都好似未諗到可以點樣處置我，剩係叫我喺教員室外面條走廊罰企。
我見到有啲同學離遠對住我指手劃腳食花生，當中仲有唔少係啲低年班妹豬，我望返佢哋轉頭，佢哋就耷低頭避開我眼神，都係嘅，我用個廣播器講晒俾全校知我鍾意邊個女仔，呢粒花生仲大過舊西瓜。
跟住我見校長同訓導主任急急腳入咗校務處裡面，好似好大陣仗咁。而我亦都越企越焦急，因為等咗咁耐始終都係唔見子瑜，呢段時間我只要一見附近無老師，就偷偷地拎部電話出嚟打俾子瑜，但佢始終都係無聽我電話，亦無覆我訊息。
隔多陣我見Miss Chan喺教員室走出嚟，望住我搖頭嘆息，差啲翻埋白眼，我都有自知之明嘅，我知道自己又俾咗個好大嘅麻煩佢，佢應該又要苦惱點樣同訓導主任仲有校長解話。
「你條友可唔可以俾少次麻煩我？」
「Miss Chan對唔住啊...」
「你依家出晒名啦，係人都知道你係大情聖，但我今晚就有排都唔使收工喇，我仲約咗我男朋友週年紀念日㗎。」
「係我衰仔...」
「無你咁好氣啊。」然後Miss Chan急急腳，向住校務處方向行過去，多數又要去俾校長訓話。
雖然佢平時俾我哋班嘅形象係個好嚴嘅班主任，但我知道佢其實好錫自己啲學生，如果上次陸運會單嘢唔係佢出面攬我，我又點止記一個小過咁簡單。
如是者，我又企多咗陣，訓導主任失驚無神喺校務處彈出嚟，差啲俾佢發現我㩒緊電話，佢走埋嚟嘰哩咕嚕又鬧咗我一大餐，訓話嘅內容都係千遍一律我都費事再覆述，話完我之後，就俾張單行紙我，叫我喺走廊旁邊搵個位寫悔改書。
無啲新意，又係悔改書，今個學期已經係第二次寫，我又唔係文科生，中文又唔係特別叻，都唔知仲有咩好寫，我抬住個腮望住出面個景，金碧輝煌嘅夕陽光芒映照喺操場上面，增添咗一層朦朦朧朧嘅感覺，此情此景，竟然勾起返我同曉琳當日互相獻上初吻嘅一刻，又諗返起陸運會跑去醫院搵子瑜嘅嗰份衝動。
呢個學期發生咗咁多事，我忽然間覺得，與其寫咩悔改書，不如將我哋三個嘅故事寫落去仲好…
之不過我開始擔心，子瑜可能根本唔喺學校，根本就無聽到我段廣播，但我依家又俾訓導主任困住，子瑜又唔知去咗邊，佢實會覺得我拋棄咗佢…
點算好？不如趁無人為意即刻偷走。
「喂，多得你唔少，依家全校都識我喇。」正當我糾結緊之際，冷不防有人用手指篤我背脊，把聲仲要熟口熟面。
「子瑜！！」
「陳佑男！！你咪攬到我咁實先啦，透唔到氣喇…」
「我好掛住你。」
「見到吖，人哋叫你寫悔改書，你就喺張單行紙上面寫滿晒我個名…」子瑜嘟起兩邊腮，似笑非笑咁望住我。
啊！我依家先為意到，原來我不自覺地將黃子瑜三隻字重重覆覆咁寫滿咗半張單行紙，仲要俾佢本人親自發現咗，認真夠樣衰。
「唔使揞住喇，換過張好過啦，一陣俾訓導見到小心佢嬲到直接踢你出校。」跟住子瑜喺佢書包裡面摷咗張全新嘅單行紙出嚟，換咗我面前嗰張。將嗰張滿佈我字跡嘅單行紙整整齊齊咁攝返喺佢個file仔裡面，望住佢好好咁收埋我寫滿佢名嗰張單行紙，我內心有股莫名嘅滿足感。
「子瑜你俾我嗰張單行紙仲有你啲香味。」
「你收嗲啦，幾時學到咁口花花㗎。」子瑜一嘢摙落我手臂啲肉度，不過好舒服…
「邊有喎，我句句都係真心話嚟㗎。」
「聽住先啦，你仲唔快啲寫？唔想放學啊？」
「你喺度我專心唔到...」
「咁我走囉。」個衰妹即刻轉身走。
「唔俾。」我眼明手快捉住佢個書包仔，扯返佢返嚟我身邊。
正當此時，我聞到一股殺氣逼近。
「陳佑男你又係度做乜！？」訓導主任來勢洶洶咁衝埋過嚟我同子瑜面前。
我即刻用我身軀擋喺子瑜面前，費事佢噴出嚟啲口水彈親子瑜，但子瑜就選擇企喺我隔離，我哋兩個好似連成同一陣線咁一齊對抗訓導主任。
「哦！我認得你喇，你就係黃子瑜，啱喇，呢件事你都有份，你都留低唔好走住。」訓導主任怒氣沖沖咁指住子瑜。
慘喇，我又真係無諗過會連累埋子瑜…
「唔緊要啊，我本來就係諗住落嚟搵訓導主任你自首，你罰陳佑男啲咩，同樣都可以罰埋我㗎～」子瑜雙手翹後踏前一步，一臉處之泰然咁望住訓導主任。
訓導主任瞬間俾子瑜殺咗一個措手不及，霎時之間啞口無言，呢個時候，我同子瑜就好默契咁，互相向住對方會心一笑，有陣時簡單一個眼神經已足以勝過千言萬語。