【校園／愛情】戀上鄰家女孩（布甸篇）: 96. 鄰家女孩的作戰
我又點會估到，當日我拜託子瑜幫我追曉琳，今日竟然調返轉，子瑜想我陪佢一齊追曉琳返嚟。
「子瑜。」
「做咩啊？」佢用對水汪汪嘅大眼睛望住我。
「但曉琳頭先咁樣hurt你，你唔會嬲佢咩？」
「唔會啊，因為其實我都好明白曉琳嘅感受，個傻女實在係太鍾意你，所以啊…最衰嗰個反而係你呀！！就係你搞到我哋兩個女仔咁慘！」
子瑜原來係挨住走廊幅牆望住出面個操場，但講到最尾就擰轉身開始用手指喺咁篤我心口。
我無辜㗎…
「子瑜你講得啱，最衰都係我…我無辦法同時俾到幸福你同曉琳…」但我選擇認衰仔。
「都知道你無鬼用㗎喇～所以我先想追返曉琳，我想用好姊妹嘅身份，俾返原本嘅溫暖同愛佢，正正因為我都經歷過，我唔想佢自己一個人承受呢啲痛苦。」
諗返起，過往就係我同曉琳兩個將痛苦帶俾你，無論係當日壁報板設計比賽最後一日我抌低你出去搵曉琳，抑或係有晚滂沱大雨我喺你屋企食完飯之後又抌低咗你出去搵曉琳都好。
黃子瑜，我應承你我以後一定會好好錫住你，唔俾你再要一個人孤獨寂寞。
「子瑜，咁你打算點樣追返曉琳？」
「我諗好㗎啦，見係你問到，就唔怕話你知啦，個方法就係咁咁咁…咁咁咁～你記得唔可以話俾其他人知㗎！！」
嗱，唔係我唔想講俾大家知㗎，而係我不嬲就最聽子瑜話嘅，既然佢話唔講得，我就一定會三緘其口。
「但係我哋得返一個禮拜時間準備，我仲要幫手搞聖誕party，我驚唔夠時間準備喎。」
呢個時候子瑜搭住我膊頭。
「仲有我幫你吖嘛～」
見住佢趷高對腳先至夠高搭上嚟，腳尖支撐住自己身體重量仲開始腳震震但依然一臉稚氣，黃子瑜你真係一個好女仔，
「黃子瑜。」
「又做咩啊？」
「我鍾意你。」
「死開啦～肉麻到死。」
一諗到可以同子瑜做同一件事，同鍾意嘅人向住同一個嘅目標努力，嗰種感覺就好似突然觸碰到一個機關，瞬間將我哋兩顆心連埋一齊咁。
「喂！！黃子瑜你走咁快去邊啊？」
「返屋企喇，你唔肚餓咩？」
呢日漫長嘅星期五就此過去。
然後接住落嚟嘅星期六日，連續兩日我都過咗去子瑜屋企打擾佢兩姊弟，其實都唔係嘅，我哋真係有正經嘢做㗎，而且仲幾忙下添。
「曉琳真係好叻女，一下子就諗到咁多遊戲喺聖誕party嘅時候玩。」子瑜拎住部手機苦惱緊。
「子瑜你都好叻㗎，唔使半日就諗好晒啲聖誕佈置裝飾。」
呢日星期日，步入冬天陽光依然和煦，我同子瑜喺梳化度一人一邊對住坐，各自拎住部手機上網睇下中學聖誕party有咩遊戲可以玩，地點係子瑜屋企客廳張梳化仔。
咁叫得梳化仔，尺寸就梗係唔大啦，兩個人坐都已經有啲逼，但唔知點解子瑜唔肯坐埋啲挨埋嚟。
「黃子瑜！！今年聖誕節我哋去邊度玩？」同樣坐喺客廳飯枱溫緊書嘅黃子俊忽然之間插把嘴埋嚟。
「黃子俊你同我乖乖地溫書，你唔考好個試就邊度都無得玩。」但俾佢家姐瞬間擊退。
唔知係咪就係因為粒豆釘喺隔籬，子瑜怕羞所以先唔想同我黐太埋呢？不過見佢細佬依家蹦蹦跳跳個樣，趕得切喺期中試之前好返晒拆埋石膏都係件好事。
「子瑜好惡呢～」我壓低聲線，幫佢細佬投訴。
「唔好嘈啦你。」然後子瑜一腳伸埋嚟我大髀度。
呼～難得嘅身體接觸呢，平時子瑜著住學生皮鞋踢我就踢得多，赤住對腳仔反而好似係第一次，佢腳板同腳尖幼嫩白滑嘅肌膚同我大髀磨蹭嘅一瞬間，我仲隱隱約約聞到子瑜腳上面散發出嚟嘅一絲少女香氣。
當我沉醉同回味緊嘅時候，子瑜忽然間「嘩！」一聲，雙眼發亮，好似喺手機度望到啲好奇特嘅嘢。
「咩事？」剎那間令我好奇感大增，我即刻伸隻手埋去想攞佢部手機嚟睇。
「唔睇得～」跟住子瑜一掌擋住我隻手。
「我要睇啊。」
我越要睇，個衰妹就越唔俾我睇，佢索性捉住我隻手唔俾我掂佢部手機，雖然我知道自己一定大力過佢，但我又唔捨得同女仔鬥力，結果糾纏咗一陣，我先至發現原來我哋兩個十隻手指交叉扣住對方。
就係呢個時候，我眼角睄到黃子俊個衰仔好似停低咗支筆觀賞緊我同佢家姐打打鬧鬧，子瑜亦都好似慢慢發覺我哋兩個隻手已經融為一體，我慢慢放軟手指，慢慢我哋兩個就變成十指緊扣…
至於子瑜究竟睇到咩咁驚訝？佢俾部手機我睇，解釋話佢原本搵緊啲聖誕party嘅遊戲，但無意之中個搜尋器彈咗大學O Camp啲男女意淫遊戲出嚟，你個衰妹吖…
就係咁，一個愉快嘅週末又過去，天氣報告話冷鋒將會喺呢個禮拜尾降臨，我記得子瑜同曉琳都係好怕凍。
呢日返到學校，班主任早會嗰陣，我以為Miss Chan會向全班宣佈曉琳辭任女班長然後再選一個新嘅，點知都係無發生到，後來Miss Chan同我講返，反正過埋聖誕期就期中試，之後就到新嘅學期，與其依家做人事調動不如等到下學期先處理，呢段時間我就要抵諗啲兼顧埋女班長嘅職務。
至於星期五我擅用校務處廣播器呢單嘢，似乎並無引起同學之間好大迴響，或者可能大家都習慣咗我出人意表嘅行為？
呢幾日返學嘅時候，曉琳看似好平淡無咩大礙，而子瑜亦暗中執行緊佢嘅計劃…
如是者，一個禮拜咁又過去，終於嚟到聖誕聯歡會呢個大日子——亦將會係子瑜追返曉琳嘅一日。