【校園／愛情】戀上鄰家女孩（布甸篇）: 98. 朋友感情再天真
俾子瑜鬧嘅我，亦都係其中一位參賽者，陪住佢一齊報咗名參加組合賽。
仲記得原本sing con報名一早已經截咗止，子瑜運用佢嘅人脈我哋先可以加到個名上去。
「子瑜，你最近好出名呢…我仲諗緊你做咩咁錯蕩會搵我，原來係想報名玩sing con。」早幾日放咗學之後，子瑜捉埋我走咗上中五嗰層其中一個班房。
而呢個人脈，就係曾經同子瑜沾上關係嘅藍社社長…曉琳仲話過呢段時間中五生正值考試期間，點解佢咁游手好閒有時間做sing con搞手…
「係啊，咁截咗止報唔到名吖嘛，所以咪搵你～」子瑜伸伸脷答。
「唉，原來喺你眼中我只係一個工具人。」
「唔好咁啦，最多請你飲嘢～」
「剩係請嘢飲夠唔夠㗎？」
子瑜同社長兩個喺度交涉，我喺隔籬搭唔到嘴，成碌木企喺度又十足十個外人，我索性出去走廊透透氣。
無幾耐，子瑜就走返出嚟拍拍我膊頭。
「嘻嘻，做咩唔出聲啊？你嬲啊？」
「我邊似咁小器呢？」
「你唔好嬲啦，你仲記唔記得開學初期有次Lunchtime曉琳咪同班藍社嘅師兄姐食晏嘅？就係你個社長話俾我知佢哋去邊間餐廳，我先幫你成到好事咋。」
我當然記得呢件事，餐飯食到一半曉琳仲走埋嚟我哋度坐，我簎咗塊沙嗲牛肉分俾曉琳食，子瑜事後仲笑我曉琳食到我口水尾，我同曉琳嘅故事亦因此拉開序幕。
我一直都唔知當日佢係點樣知道曉琳所在嘅餐廳，原來子瑜係借助社長，拉近咗我同曉琳之間嘅距離，如今佢又再次運用呢張人情牌，嘗試修補返佢同曉琳之間嘅姊妹感情。
「而且佢仲應承幫我哋播片～希望到時候可以感動到曉琳…」
子瑜仲同我講，為咗保持神秘感，我哋連組合名都改好埋…就叫做「126621」，我起初仲想問做咩要改個咁騎呢嘅名，但好快我就悟出呢個名背後嘅意思…
「有請我哋今日sing con嘅最後一對組合，呢對組合夠晒特別，組合名係一串數字，究竟蘊含咗咩意思呢？」
呢串數字嘅意思好簡單易明，曉琳係1月26號生日，而子瑜就係6月21號，佢兩姊妹真係天生一對，連個生日日期都要玩埋數字對稱。
「而佢哋參賽嘅歌曲就係…Twins嘅《朋友仔》！！」
我同子瑜緩緩走到舞台中間，台上聚光燈耀眼嘅光芒同台下漆黑一團剛好形成一種強烈對比，我嘗試尋找台下曉琳嘅身影，但因為環境實在太暗唔知佢坐咗喺邊，與此同時前奏音樂亦都慢慢播出。
「最多握握手，一起散散步，
你大量，你寛容，
你是未來濱崎步。」
「無論是為甚麼都好，
首先最錯我的態度，
懊悔昨日那麼嘈。」
子瑜首先唱出前段，本來出場前佢仲捉住我隻手話佢好緊張，但結果上到台開始唱嘅時候，子瑜表現幾穩定唔似有怯場。
「我也不想記起，為當天襯衫似你，
便心急妒忌，其實我都很小器，對不起，
只因常常在你附近，便拿著你出氣。」
「原來朋友仔感情再天真，
亦是我永遠也會愛惜的人，
明日愛他人，也記住學會不要緊。」
「原來朋友比戀人更高分，
亦讓我開始懂得不記恨，
若大家都敏感，
我更要永遠記得，拒絕再因小事怪人，
為何沒這條校訓？」
就喺伴奏響起嘅呢段時間，我同子瑜身後嘅大銀幕亮起光芒…台下漸起訝異聲。
「黃子瑜，我發現呢，收埋最多你同曉琳合照嘅嗰個人，可能係我。」前幾日，我打開手機相簿篩選緊。
「因為你係一個變態，成日偷影我哋兩個女仔～」子瑜又嘴上不饒人。
「梗係唔係啦，係因為每次你哋影合照嘅時候都係搵我影，下次我應該要收返攝影費。」
「你夠膽就試吓吖？有得俾影我哋兩個女仔係你嘅榮譽嚟～知唔知道？」
銀幕上，一張又一張子瑜同曉琳嘅合照開始映現，為咗呢一幕嘅出現，我同子瑜呢幾日花咗唔少心機將呢輯舊相剪接成呢條短片，過程當中重新回顧返我哋三個由中一至中三嘅成長，亦都勾起咗好多以前嘅回憶。
如果愛情同友情兩者之間只能選擇一個，或者子瑜嘅選擇會係寧願犧牲自己嘅幸福去成全好朋友，而我呢？我其實心裡面都無答案，只係覺得既然子瑜想做嘅，我就會陪佢一齊，結果係點都係其次。
「陳佑男，可唔可以問你一條問題？」頭先喺後台，子瑜問我。
「可以啊。」
「如果去到最尾，原來都只係我一廂情願，曉琳無諗住同我好返，咁點算好？」
你放心啦，就好似《牧羊少年奇幻之旅》所講，只要你好想好想去達成一件事嗰陣，全個宇宙都會嚟幫你，而我願意成為你嘅宇宙…
「原來朋友仔感情再天真，
亦是我永遠也會愛惜的人，
明日愛他人，也記住學會不要緊。」
「原來朋友比戀人更高分，
亦讓我開始懂得不記恨，
若大家都敏感，
我更要永遠記得，拒絕再因小事怪人，
為何沒這條校訓？」
「像望著自己的至親，
往往太奮勇鬥嘴，
以後再不懂事過人，
如何共我戀人熱吻。」
隨住尾奏音樂結束後，台下掌聲徐徐響起，但我由開始到完結嘅呢刻，仲未喺人群之中搵到曉琳嘅身影，唔知道佢依家嘅感受係點呢？
正當呢個時候，我旁邊嘅子瑜忽然間拎住枝咪對住觀眾席方向大嗌…
「曾曉琳！！你跑去邊啊！？」