【校園／愛情】戀上鄰家女孩（布甸篇）: 100. 明日總會放晴吧。
結果，我俾兩個女仔一直追殺到去我哋課室先肯罷休…跟住曉琳拉一拉子瑜隻手話。
「子瑜，頭先睇完你哋兩個玩sing con，搞到我依家都好想去唱K…」
「好啊，反正完咗sing con都放得學，早啲去唔使怕到時無位～」子瑜一口就應承咗。
就係咁，我哋三個就一齊出發，子瑜拖住曉琳隻手行喺我前面，我就好似保鏢咁喺後面護送住佢哋。
搭咗一程車去到K房，我同子瑜兩個係窮學生，原本諗住揀個最平嘅歡樂時段，包兩杯嘢飲可以唱足三個鐘，不過曉琳話佢肚餓想食嘢，所以我哋就加錢包埋嘢食。
入到房之後，曉琳就好似小朋友咁拎住個遙控器，點完呢首又點嗰首，而我就默默幫啲咪笠返好個套，眨吓眼曉琳就點咗成堆Twins嘅歌，捉住子瑜陪佢唱，好彩唔係點咩方力申同鄧麗欣捉住我唱啫。
咁講真個句，子瑜同曉琳唱歌都幾好聽，佢哋把聲分分鐘好聽過阿Sa同阿嬌，而且我越望就越覺得佢哋真係好似天生一對嘅姊妹，不過嬌滴滴嘅子瑜反而似家姐，照顧住曉琳呢個妹妹，多咗種反差感。
「喂喂陳佑男，幫我哋嗌啲嘢食吖，肚餓喇。」子瑜拎住枝咪向我下達指令。
「係嘅，請問兩位小姐今日想食啲咩？」結果我又好似個阿四咁服侍佢哋兩姊妹，我仲要專登拎起個電話聽筒企出門口外面幫佢哋落單。
無幾耐子瑜同曉琳都唱到攰，將枝咪掉咗俾我，就埋頭苦幹開餐，耐唔耐又細聲講大聲笑，咁我都好識做嘅知道女仔傾密偈嘅時候，男仔唔好亂咁插嘴，於是乎我咬住舊雞翼求其點咗幾首歌，幫佢哋接力唱落去。
「喂吔你認真啲唱啦，唔好好似個喃嘸佬，唱到拉鐵閘咁啦。」點不知我唱唔夠半首，就俾子瑜吐槽嫌棄，連曉琳都忍唔住喺旁邊偷笑咗一聲。
「唔係吖，都唱得幾好聽。」都係曉琳溫柔體貼，識得氹人開心。
「曉琳你唔使俾面佢㗎。」但子瑜你個衰妹，竟然教壞曉琳。
「都係，咁你快啲認真啲唱啦。」曉琳又有樣學樣，板起面孔教訓埋我一份，然後下一秒就嬌羞答答咁將個頭塞喺子瑜懷裡，子瑜伸手將佢攬實。
「吖子瑜我窒息透唔到氣啦～」曉琳你口不對心，表面扮掙扎實情將個頭越塞越入。
「明明係你哄個頭埋嚟嘅。」
見佢哋兩個好似以前咁糖黐豆，我都放心了，既然觀眾要求我認真啲唱，我就捨命陪紅顏，而且仲要係兩位沉魚落雁閉月羞花嘅紅顏，賣力啲唱又如何。
而當我聲嘶力竭之後，歡樂嘅時光都要宣告結束，又係時候要返屋企，我同子瑜住埋一齊，得曉琳唔係，但係子瑜話想送埋曉琳返屋企，佢仲話呢次係佢第一次陪曉琳返屋企。
又點估到，我能夠再次踏足呢條斜路送曉琳返屋企，沿路上當然勾起好多往事回憶，種種滋味點滴在心頭霎時間百感交集，去到曉琳屋苑樓下個迴旋處嗰陣，佢兩姊妹再次攬埋一齊。
睇見佢兩姊妹情深款款咁攬咗一陣之後，跟住又拖住手仔開始細細聲互訴心事，我識趣走埋一邊，回首一望先發現原來保安龍叔隔住道玻璃大門笑看風雲咁。
「夜喇曉琳，開始越嚟越凍，快啲返屋企啦。」子瑜摸摸曉琳頭仔。
「子瑜，咁我走啦，唔好咁掛住我。」
「嗯嗯，聽日見喇。」
過咗唔知幾耐，子瑜終於送別曉琳，臨尾曉琳嫣然一笑向我同子瑜揮揮手告別，再同幫佢開門嘅龍叔好有禮貌咁講咗聲唔該，望見曉琳嘅身影消失於電梯大堂之中，頓時有種禮成嘅感覺。
夜幕低垂，街燈泛黃光線依舊灑落柏油路面之上，附近四下無人，歸家嘅呢條斜路，以前係我送完曉琳返屋企嗰陣孤身一人自己行，今晚多咗子瑜呢個女仔陪我。
「呼呼～好開心啊今日過得。」子瑜雙手翹後，抬頭望向夜空，有粒星星特別耀眼。
「之但係，你同曉琳真係好返晒和好如初？」
「唔知道㗎，咁本身感情就係要靠兩個人去付出同經營先至會有收穫㗎嘛，至少我哋已經約好咗平安夜同聖誕節連續兩日一齊出去玩～」
「吓…剩低我點算？」話就話聽到佢兩姊妹約好咗一齊玩值得開心，但唔通我今年要Lonely Christmas？
「點知你啊～你咪…乖乖地留喺屋企溫書囉，反正放完假我哋就要考期中試。」
「搞錯啊，你唔理我就話啫，咁仲有黃子俊呢？你唔會抌低你最錫嘅細佬掛？」哼哼！今次仲唔俾我捉到你呢個衰妹無盡好家姐本份？
「我仲有你吖嘛，黃子俊就交俾你照顧喇，你係我最信得過嘅人，嘻嘻～」子瑜仲要拍拍我膊頭，想將個責任卸咗俾我就真。
「你就唔怕我會帶壞黃子俊咩？」
「唔怕啊，有咩好怕，黃子俊咁聰明，佢先唔會咁易俾你帶壞。」豈有此理你個黃子瑜吖，信唔信我將你就地正法！！
「嗱最多…Boxing Day嗰日，我送返份禮物俾你，當係報答你啦…」子瑜哄埋我耳邊講，仲要壓低聲線，有啲調皮…
咦？乜嗰日唔係就係我生日咩，我忽然間醒起今日中午芯玲笑我咩聖誕節無得拆禮物，但話時話我做乜無端白事會諗起啲咁嘅嘢。
「不過陳佑男我問你，呢樣係咩嚟？」冷不防子瑜手握拳頭伸喺我面前，然後有一條鎖匙扣垂低咗落嚟，竟然係條玉桂狗鎖匙扣，就係子俊交託俾我叫我送俾佢家姐嗰條！！
無啦啦條鎖匙扣出現喺子瑜手上，佢仲要咁樣問得我，肯定知道咗啲嘢…
「點解會喺你度嘅…」自從有日我發現條鎖匙扣喺我褲袋不翼而飛，之後我就幾乎忘記咗佢嘅存在。
「係曉琳俾我㗎，佢話有一日瞓醒喺床邊見到呢隻玉桂狗，但佢好記得自己無呢款鎖匙扣，佢諗返起就係嗰晚你上完佢屋企之後先至出現！！跟住佢就估係咪你諗住買嚟送俾我。」
「係…係啊…本來就係諗住送俾你…原來跌咗喺曉琳屋企…」我招認一半…
「咪住咪住，更正返先！係曉琳張床，唔係曉琳屋企咁簡單！！」子瑜兩邊腮又漲起，鄙視住我…
「黃子瑜你最好人，唔好嬲我啦。」
「咁你又點知道我鍾意玉桂狗？」子瑜突然咁問，我都唔知點答好，唔通話俾佢知係佢細佬通水咩…俾佢知道我整唔見黃子俊俾我嘅嘢實死多兩錢重。
「欸因為…」
「哼哼！嬲你啊！」子瑜一枝箭標咗向前跑走咗。
「黃子瑜你走咁快去邊啊，等埋我啊！」我即刻拔足狂奔追住黃子瑜跑。
「唔理你啊～」個衰妹竟然越跑越快…
——《戀上鄰家女孩（布甸篇）》全文完——