《我老婆唔係我女朋友》【那些年／九十年代學界／真人】 第七章全新中篇！: 【第七章】 表哥與表妹（３）
講咗咁耐，究竟Winnie是何許人也？話說去年大家都是Year 1時，有本濕狗年青人雜誌《Yeah！》搞咗個大專校花比拚（我唔記得有無大專校草比拚，亦無興趣知），敝校居然橫空推選出了一位社科楊C妮，而且排名還名列各大專院校前矛，而呢位索爆的社科之花，又是兼職模特兒（那時候未有𡃁模這種混水摸魚的貨色，她是貨真價實模特兒公司的硬照Model），就是阿材表妹Winnie Tam是也。
叫得做社科楊C妮，外貌氣質當然有返咁上下啦，又是一名長直髮的大眼美人兒，有時會綁馬尾（呢個係我故意打聽的）返學，在校內除了是各屬會爭奪的宣傳照代言人外，聞說真人的性格也是難得的gfable，熱情爽朗絕無公主病，對毒隱同學都一視同仁，從不收兵，而且好像名花「未」有主呢！
由於表妹跟著表哥一齊讀SOCI，所以我和Leon只在Year 1的基礎必修科時，遠遠望過真人，遺憾此後在商學院的課程內都沒有機會再遇上了，真箇只可遠觀，連最靠近消息人士的表哥，也是參加O Camp時，湊巧認識到的。
「妖你，男人老狗點會唔識游水㗎！」我一把推開阿材，我「妖」佢嘅原因係阿材本身唔講「鄉下話」的，費事失禮斯文，雖然剛才已經不停爆…
「咪係！表妹都識游你都唔識？你一個大男人渣唔渣啲呀，刁你鹵味。」Leon加入戰團。
「嗱，我做救生員見到男人唔救不特止，仲兼打窒佢㗎喎，同埋我淨係識用橫胸拖救囡㗎咋，你諗過先呀。」我不住兇阿材。